ສຳນັກຂ່າວຕ່າງປະເທດ ລາຍງານໃນວັນທີ 11 ທັນວາຜ່ານມານີ້ວ່າ ທ່ານ ວະລາດິເມຍ ເອຍຄູນິນ ຜູ່ວ່າການລົດໄຟຣັດເຊຍ ໄດ້ນຳສະເໜີ ໂຄງການກໍ່ສ້າງ ທາງດ່ວນເຊື່ອມຕໍ່ລະຫວ່າງ ນະຄອນຫລວງປາຣີ ປະເທດຝຣັ່ງ ໄປຈົນຮອດ ນະຄອນນິວຢອກ ສະຫະລັດອາເມຣິກາ ລວມໄລຍະທາງ 20,318 ກິໂລແມັດ ໃນຊື່ໂຄງການ Trans-Eurasian Belt Development ຫລື TEPR ຊຶ່ງຈະສ້າງເຄືອຂ່າຍເສັ້ນທາງ ເຊື່ອມຕໍ່ຜ່ານເອີຣົບຕາເວັນອອກ, ຣັກເຊຍ, ລັດອະລາສກາ (ສະຫະລັດອາເມຣິກາ), ປະເທດການາດາ ແລະ ເຂົ້າສູ່ສະຫະລັດອາເມຣິກາ ໂດຍຈຸດຊ່ອງແຄບເບຣິງ ລະຫວ່າງຣັດເຊຍ ກັບລັດອະລາສກາ ຂອງສະຫະລັດອາເມຣິກາ ຈະສ້າງເປັນຂົວ ຫລື ເປັນອຸໂມງໃຕ້ນ້ຳ ເຊື່ອມຕໍ່ລະຫວ່າງສອງທະວີບເຂົ້າກັນ ຊຶ່ງຕະຫລອດທາງດ່ວນສາຍທາງນີ້ ຈະໃຊ້ເວລາເດີນທາງ 160 ຊົ່ວໂມງ ຫລື 7 ມື້ ໂດຍໃຊ້ຄວາມໄວ 130 ກິໂລແມັດຕໍ່ຊົ່ວໂມງ ໃນການເດີນທາງ.
ອະພິມະຫາໂຄງການດັ່ງກ່າວນີ້ ຖ້າເກີດເປັນຈິງ ຈະເຮັດໃຫ້ຣັດເຊຍ ກາຍເປັນສູນກາງຂອງໂລກ ດ້ວຍທ່າແຮງດ້ານເສັ້ນທາງຄົມມະນາຄົມ, ທໍ່ສົ່ງນ້ຳມັນ ແລະ ແກັສ ຊຶ່ງງົບປະມານໃນການກໍ່ສ້າງ ແມ່ນປະມານຫລາຍຮ້ອຍຕື້ໂດຣາ ແຕ່ຜົນຕອບແທນຈາກການລົງທຶນ ໃນແງ່ດ້ານເສດຖະກິດ ແມ່ນຈະກຸ້ມຄ່າຢ່າງມະຫາສານ ເຊັ່ນດຽວກັນ.
