ສຳນັກຂ່າວຕ່າງປະເທດ ລາຍງານໃນວັນທີ 11 ທັນວາຜ່ານມານນີ້ວ່າ ຊາວນິວຊີແລນ ໄດ້ລົງປະຊາມະຕິ ເລືອກຮູບແບບທຸງຊາດແບບໃໝ່ ຊຶ່ງມີທັງໝົດ 5 ແບບ ຜ່ານເຂົ້າຮອບ ຊຶ່ງໃນນັ້ນ ແບບທີ່ໄດ້ຮັບຄະແນນນິຍົມ ຫລາຍທີ່ສຸດສອງອັນດັບ ໄດ້ແກ່ອັນດັບທີໜຶ່ງ ເປັນທຸງຊາດສີດຳ-ຂາວ-ຟ້າ (ທຸງດ້ານລຸ່ມຈາກຮູບ) ຖືກເລືອກຫລາຍທີ່ສຸດ ແລະ ອັນດັບທີສອງ ທີ່ມີຄະແນນສູສີກັນຄື ທຸງສີແດງ-ຂາວ-ນ້ຳເງິນ (ທຸງດ້ານເທິງຈາກຮູບ) ຊຶ່ງທັງສອງແບບນີ້ ຍັງຈະຕ້ອງໄດ້ລໍຖ້າ ຜົນຂອງການລົງປະຊາມະຕິສຸດທ້າຍ ໃນວັນທີ 15 ທັນວາຈະມາເຖິງນີ້.

ແນວໃດກໍຕາມ, ທາງການນິວຊີແລນ ຈະມີການຈັດລົງປະຊາມະຕິຮອບ 2 ໃນເດືອນມີນາປີ 2016 ຊຶ່ງໃນຮອບດັ່ງກ່າວ ຈະເປັນການລົງຄະແນນວ່າ ຈະໃຊ້ທຸງຊາດຮູບແບບໃໝ່ ຫລື ຈະຍັງຄົງນຳໃຊ້ທຸງຊາດແບບເກົ່າຢູ່.

ທັງນີ້ ການລົງປະຊາມະຕິ ເພື່ອປ່ຽນທຸງຊາດຂອງນິວຊີແລນ ແມ່ນໄດ້ຮັບການສະໜັບສະໜູນຈາກ ນາຍົກລັດຖະມົນຕີ ຈອນ ຄີ ແຫ່ງ ນິວຊີແລນ ເນື່ອງຈາກລາວມີຄວາມເຫັນວ່າ ທຸງຊາດຂອງນິວຊີແລນໃນປັດຈຸບັນ ມີຄວາມຄ້າຍຄືກັນກັບທຸງຊາດອົດສະຕາລີ ຫລາຍເກີນໄປ ແລະ ເຫັນວ່າ ມັນຮອດເວລາແລ້ວ ທີ່ຈະບໍ່ມີຮູບທຸງຢູນຽນແຈ໊ກ ຊຶ່ງເປັນສັນຍາລັກ ຂອງອານາວນິຄົມອັງກິດ ຢູ່ໃນທຸງຊາດຂອງນິວຊີແລນ ອີກຕໍ່ໄປ.