ຂປລ. ສູນວັດທະນະທຳຈີນ ປະຈຳ ສປ ລາວ ໄດ້ຈັດງານວາງສະແດງຜົນງານວິຈິດສິນ ເຂດໜິງເຊ້ຍ ສປ ຈິນ ຂຶ້ນໃນວັນທີ 10 ທັນວາ 2015 ທີ່ ສູູນວັດທະນະທຳຈີນ ໂດຍມີ ທ່ານ ບຸນເລືອນ ບຸບຜາ ຫົວໜ້າກົມຮ່ວມມືສາກົນກະຊວງຖະແຫລງຂ່າວ, ວັດທະນະທຳ ແລະ ທ່ອງທຽວ, ທ່ານ ເຊຍ ສຽວ ຮົວະ ຫົວໜ້າສູນວັດທະນະທຳຈີນ ປະຈຳລາວ, ທ່ານ ຊຸນ ຫລີ ເຢີນ ສະມາຊິກສະມາຄົມວິຈິດສິນ ແຫ່ງ ຊາດຈີນ ແລະ ຊາວນະຄອນຫລວງວຽງຈັນເຂົ້າຮ່ວມ.
ງານວາງສະແດງ ຜົນງານວິຈິດສິນ ເຂດໜິງເຊ້ຍ ຄັ້ງນີ້ ໄດ້ນຳເອົາຜົນງານສີລະປະການແຕ້ມ, ຮູບສີລະປະການຂຽນຕົວໜັງສືຈີນ ສີນ້ຳ ແລະ ພາບພິມ ມີຫລາຍກວ່າ 40 ຜົນງານ ຈາກສີລະປິນ13 ທ່ານ ເຊິ່ງຮູບພາບທີ່ນຳມາວາງສະແດງ ສ່ວນໃຫຍ່ແມ່ນສະແດງເຖິງຄວາມ ອຸດົມສົມບູນ, ມີຊີວິດຊີວາ ແລະ ລຽບງ່າຍ ເຊິ່ງໄດ້ສະແດງເຖິງຄວາມປານິດ, ຄວາມລະອຽດອ່ອນ ປະກອບມີຮູບພາບພູເຂົາ, ແມ່ນ້ຳ, ສັດສາວ່າສິ່ງ ແລະ ດອກໄມ້ ທີ່ສະແດງໃຫ້ເຫັນເຖິງ ຄວາມສະຫງ່າງາມ ຂອງວັດທະນະທຳ ອັນເປັນມູນເຊື້ອຂອງຈີນເປັນຢ່າງດີ.
ໂອກາດທີ່ມາວາງສະແດງຜົນງານຄັ້ງນີ້, ໃນຕອນເຊົ້າວັນທີ 11 ທັນວາ 2015, ທ່ານ ຊຸນ ຫລີ ເຢີນ ຍັງໄດ້ໄປແລກປ່ຽນບົດຮຽນກ່ຽວກັບວຽກງານວິຈິດສີນ ຮ່ວມກັບຄະນະນຳ ແລະ ນັກສຶກສາຂອງສະຖາບັນວິຈິດສິນ ແຫ່ງຊາດລາວ, ໂດຍທ່ານໄດ້ຍົກໃຫ້ເຫັນເຖິງຄວາມຈະເລິນກ້າວໜ້າ ທາງດ້ານວຽກງານວິຈິດສິນ ຂອງ ສປ ຈີນ, ບົດຮຽນ ແລະ ປະສົບການຕົວຈິງທີ່ທ່ານຖອດຖອນໄດ້ ໃນການເຄື່ອນໄຫວວຽກງານວິຈິດສິນຮ່ວມກັບນັກຈິດຕະກອນຈາກທົ່ວໂລກ, ພ້ອມນີ້ ທ່ານຍັງຍົກໃຫ້ເຫັນອະລິຍະທຳ ອັນຍອດຍິ່ງຂອງ ສປ ຈິນ ທີ່ສະແດງອອກຜ່ານຜົນງານອັນປານິດຂອງຈິດຕະກອນຈີນ ເຊິ່ງມີຄຸນຄ່າສູງ, ຜົນງານບາງອັນຂອງຈິດຕະກອນຈີນ ແມ່ນບໍ່ສາມາດປະເມີນມູນຄ່າໄດ້ ເນື່ອງຈາກເປັນສິ່ງທີ່ຫາຍາກ ແລະ ມີຄວາມປານີດທີ່ສຸດ./.
ແຫ່ລງຂ່າວ
