ສຳນັກຂ່າວຕ່າງປະເທດ ລາຍງານໃນວັນທີ 9 ທັນວານີ້ວ່າ ກະຊວງພາຍໃນ ອາຣັບບີ ຊາອຸດິດ ໄດ້ທຳການປະຫານຊີວິດນັກໂທດ ເພີ່ມອີກ 2 ຄົນ ໃນວັນອັງຄານທີ 8 ທັນວາຜ່ານມາ ເຮັດໃຫ້ພາຍໃນປີ 2015 ນີ້ພົບວ່າ ປະເທດດັ່ງກ່າວ ໄດ້ປະຫານຊີວິດນັກໂທດເຖິງ 150 ຄົນແລ້ວ ແລະ ຖືເປັນສະຖິຕິ ທີ່ມີການປະຫານຊີວິດ ສູງທີ່ສຸດໃນຮອບ 2 ທົດສະວັດ.

ການປະຫານຊີວິດນັກໂທດທັງສອງຄົນດັ່ງກ່າວ ແມ່ນນຳໃຊ້ວິທີການຕັດຄໍ ຊຶ່ງເປັນວິທີການຫລັກ ຕາມປະເພນີບັງຄັບ ທີ່ທາງການອາຣັບບີ ຊາອຸດິດ ນຳໃຊ້ມາຢ່າງຍາວນານ.  ແນວໃດກໍຕາມ, ອີງຕາມຂໍ້ມູນໃນປີ 1995 ພົບວ່າ ອາຣັບບີ ຊາອຸດິດ ໄດ້ມີການປະຫານຊີວິດນັກໂທດ ສູງທີ່ສຸດເປັນປະຫວັດການ ເຖິງ 192 ຄົນ.