ສຳນັກຂ່າວຕ່າງປະເທດ ລາຍງານໃນວັນທີ 9 ທັນວານີ້ວ່າ ທ່ານ ອາເໝັດ ດາວູໂຕກລູ ນາຍົກລັດຖະມົນຕີຕວກກີ ໄດ້ອອກຖະແຫລງ ຕໍ່ກອງປະຊຸມ ພັກລັດຖະບານຕວກກີວ່າ ລັດຖະບານຕວກກີ ກຳລັງພິຈາລະນາຫາມາດຕະການ ເພື່ອຕອບໂຕ້ການຂວ້ຳບາດຂອງຣັດເຊຍ ອັນເນື່ອງມາຈາກ ເຫດການກອງທັບຕວກກີ ຍິງເຮືອບິນ Su-24 ຂອງຣັດເຊຍຕົກ ບໍລິເວນຊາຍແດນຕິດປະເທດຊີຣີ ເມື່ອວັນທີ 24 ພະຈິກຜ່ານມາ ຊຶ່ງເຮັດໃຫ້ລັດຖະບານຣັດເຊຍ ເກີດຄວາມບໍ່ພໍໃຈ ແລະ ປະກາດນຳໃຊ້ ມາດຕະການຂວ້ຳບາດ ຕໍ່ກັບປະເທດຕວກກີ.
ທ່ານ ດາວູໂຕກລູ ໄດ້ກ່າວວ່າ ຄະນະລັດຖະມົນຕີ ຈະພິຈາລະນາ ເຖິງຄວາມເປັນໄປໄດ້ ໃນການຕອບໂຕ້ ມາດຕະການຂວ້ຳບາດຂອງຣັດເຊຍ ແລະ ຫວັງວ່າ ວິກິດການຄວາມຂັດແຍ່ງ ລະຫວ່າງຕວກກີ ແລະ ຣັດເຊຍ ຈະສາມາດຜ່ານພົ້ນໄປໄດ້ ໂດຍບໍ່ຈຳເປັນຕ້ອງໃຊ້ມາດຕະການຕອບໂຕ້.