ສຳນັກຂ່າວຕ່າງປະເທດ ລາຍງານໃນວັນທີ 3 ທັນວາຜ່ານມານີ້ວ່າ ທ່ານ ເຣເຊບ ເຕຢິບ ເອີໂດກັນ ປະທານາທິບໍດີຕວກກີ ໄດ້ອອກມາກ່າວອ້າງ ລັດຖະບານຕວກກີ ມີຂໍ້ມູນທີ່ພິສູດໄດ້ວ່າ ຣັດເຊຍກໍມີສ່ວນກ່ຽວຂ້ອງ ກັບການຄ້ານ້ຳມັນເຖື່ອນ ກັບກຸ່ມລັດອິດສະລາມ ຫລື ໄອເອັສ ໃນປະເທດຊີຣີ ເພື່ອຕອບໂຕ້ຂໍ້ກ່າວຫາຂອງຣັດເຊຍ ທີ່ລະບຸວ່າຕົນເອງ ແລະ ຄອບຄົວ ມີສ່ວນພົບພັນກັບການຄ້ານ້ຳມັນເຖື່ອນ ກັບກຸ່ມກໍ່ການຮ້າຍດັ່ງກ່າວ.
ທ່ານ ເອີໂດກັນ ໄດ້ກ່າວວ່າ ” ພວກເຮົາມີຫລັກຖານໃນມື ແລະ ຈະເປີດໂປງໃຫ້ໂລກຮູ້, ຣັດເຊຍຈຳເປັນຕ້ອງພິສູດວ່າ ສາທາລະນະລັດຕວກກີ ຊື້ນ້ຳມັນຈາກກຸ່ມໄອເອັສ ຖ້າບໍ່ດັ່ງນັ້ນ ກໍຈະຖືວ່າເປັນການໃສ່ຮ້າຍປ້າຍສີ “
ພ້ອມດຽວກັນນີ້ ຜູ້ນຳຕວກກີຍັງໄດ້ກ່າວວ່າ ເຂົາພ້ອມທີ່ຈະລາອອກຈາກຕຳແໜ່ງ ຫາກຣັດເຊຍມີຫລັກຖານພິສູດຂໍ້ກ່າວຫາ ແລະ ບອກວ່າ ແທ້ຈິງແລ້ວ ແມ່ນຣັດເຊຍເອງ ທີ່ກ່ຽວຂ້ອງກັບການຄ້ານ້ຳມັນເຖື່ອນ ພ້ອມທັງລະບຸອີກວ່າ ” ທ້າວ ຈອດ ຮັດວານີ ຊາວຊີຣີ ຊຶ່ງຖືໜັງສືຜ່ານແດນຣັດເຊຍ ຄືໜຶ່ງໃນພໍ່ຄ້າລາຍໃຫຍ່ ໃນທຸລະກິດດັ່ງກ່າວນີ້ “
ແຫລ່ງຂ່າວຍັງໄດ້ລະບຸອີກວ່າ ທ່ານ ເອີໂດກັນ ໄດ້ກ່າວເຖິງນັກຫລິ້ນໝາກເສິກຊື່ດັງຂອງຣັດເຊຍ ກໍມີສ່ວນກ່ຽວຂ້ອງກັບທຸລະກິດດັ່ງກ່າວນີ້ ຊຶ່ງໝາຍເຖິງ ທ່ານ ຄີຊານ ອິນຢຸມຊີນອບ ນັກທຸລະກິດ ແລະ ປະທານສະຫະພັນໝາກເສິກໂລກ ຊຶ່ງຖືກລັດຖະບານສະຫະລັດອາເມຣິກາ ຂວ້ຳບາດ ຈາກການກ່ຽວຂ້ອງກັບ ການຄ້ານ້ຳມັນເຖື່ອນ.