ສຳນັກຂ່າວຕ່າງປະເທດ ລາຍງານໃນວັນທີ 2 ທັນວາຜ່ານມານີ້ວ່າ ຫລັງຈາກຜ່ານການກວດສອບ ເປັນເວລາເກືອບ 1 ປີ ຕໍ່ກັບເຫດການ ເຮືອບິນສາຍການບິນ ແອຣ໌ເອເຊຍ ຖ້ຽວບິນທີ QZ8501 ຕົກໃນທະເລຊະວາ ປະເທດອິນໂດເນເຊຍ ໃນວັນທີ 28 ທັນວາ 2014 ທີ່ຜ່ານມາ ຈົນເຮັດໃຫ້ມີຜູ້ເສຍຊີວິດທັງໝົດ 162 ຄົນ ພົບວ່າ ສາເຫດຂອງອຸບັດເຫດຄັ້ງນີ້ ແມ່ນເປັນຜົນຈາກ ຮອຍເຊື່ອມຂອງລະບົບວົງຈອນບັງຄັບຫາງເສືອ ຂອງເຮືອບິນລຳດັ່ງກ່າວໄດ້ແຕກອອກ ລະບົບຈຶ່ງສົ່ງສັນຍານເຕືອນ ໄປເຖິງນັກບິນ ເມື່ອນັກບິນໄດ້ຮັບສັນຍານເຕືອນແລ້ວ ຈຶ່ງໄດ້ຕັດສິນໃຈປິດລະບົບ ເພື່ອຕິດເຄື່ອງຈັກໃໝ່ອີກເທື່ອໜຶ່ງ ເຮັດໃຫ້ລະບົບນັກບິນອັດຕະໂນມັດ (autopilot) ຢຸດການເຮັດວຽກ ແລະ ເຮືອບິນເສຍການຄວບຄຸມ ແລະ ຈາກການສືບສວນຍັງພົບອີກວ່າ ບັນຫາຄວາມຜິດປົກກະຕິ ຂອງຫາງເສືອເຮືອບິນລຳດັ່ງກ່າວນີ້ ໄດ້ເຄີຍເກີດຂຶ້ນມາແລ້ວ ເຖິງ 23 ຄັ້ງ ຕະຫລອດປີ 2014.