ສຳນັກຂ່າວຕ່າງປະເທດ ລາຍງານໃນວັນທີ 3 ທັນວານີ້ວ່າ ກະຊວງປ້ອງກັນປະເທດຣັດເຊຍ ໄດ້ຈັດງານຖະແຫລງຂ່າວ ຢູ່ນະຄອນຫລວງມົດສະກູ ໃນວັນທີ 2 ທັນວາຜ່ານມານີ້ວ່າ ລະດັບຜູ້ນຳໃນລັດຖະບານຕວກກີ ຊຶ່ງລວມທັງ ທ່ານ ເຣເຊບ ເຕຢິບ ເອີໂດກັນ ພ້ອມດ້ວຍຄອບຄົວ ມີສ່ວນກ່ຽວຂ້ອງກັບ ການຄ້າຂາຍນ້ຳມັນເຖື່ອນ ກັບກຸ່ມລັດອິດສະລາມ ຫລື ໄອເອັສ ອັນເປັນການຈັດຫາເງິນທຶນ ໃຫ້ແກ່ກຸ່ມດັ່ງກ່າວ ໂດຍ ທ່ານ ອະນາໂຕລີ ອັນໂຕນອບ ລັດຖະມົນຕີຊ່ວຍວ່າການ ກະຊວງປ້ອງກັນປະເທດຣັດເຊຍ ໄດ້ເປີດເຜີຍວ່າ ປັດຈຸບັນ ຣັດເຊຍຮູ້ເສັ້ນທາງຫລັກ ສຳລັບການລັກລອບຂົນນ້ຳມັນເຖື່ອນ ເຂົ້າສູ່ປະເທດຕວກກີ 3 ເສັ້ນທາງຫລັກ ຊຶ່ງນ້ຳມັນຖືກຂົນສົ່ງ ດ້ວຍລົດບັນທຸກຫລາຍພັນຄັນ.
ຣັດເຊຍຍັງໄດ້ເປີດເຜີຍອີກວ່າ ລາຍໄດ້ຂອງກຸ່ມລັດອິດສະລາມ ໃນເມື່ອກ່ອນຢູ່ທີ່ 3 ລ້ານໂດລາຕໍ່ມື້ ແຕ່ພາຍຫລັງການໂຈມຕີຂອງຣັດເຊຍ ໃສ່ກຸ່ມດັ່ງກ່າວຢູ່ຊີຣີ ນັບຕັ້ງແຕ່ວັນທີ 30 ກັນຍາ 2015 ຜ່ານມາ ໄດ້ທຳລາຍໂຮງເກັບນ້ຳມັນ 32 ແຫ່ງ, ໂຮງກັ່ນນ້ຳມັນ 11 ແຫ່ງ ແລະ ປ້ຳນ້ຳມັນ 23 ແຫ່ງ ລວມທັງທຳລາຍ ລົດບັນທຸກນ້ຳມັນອີກ 1,080 ຄັນ ອັນໄດ້ສົ່ງຜົນ ເຮັດໃຫ້ລາຍຮັບຂອງພວກເຂົາຫລຸດລົງ ເຫລືອປະມານ 1.5 ລ້ານໂດລາຕໍ່ມື້ເທົ່ານັ້ນ.
ພ້ອມກັນນີ້, ພາຍໃນງານຖະແຫລງຂ່າວ ຍັງໄດ້ເປີດເຜີຍອີກວ່າ ຕວກກີໄດ້ສົ່ງນັກຮົບ ຫລາຍກ່ວາ 2,000 ຄົນ ລູກປືນ 120 ໂຕນ ແລະ ຍານພາຫະນະອີກ 250 ຄັນ ໄປໃຫ້ແກ່ກຸ່ມໄອເອັສ ແລະ ກຸ່ມຕິດອາວຸດ ອັນ-ນຸສະຣາ ໃນປະເທດຊີຣີ ແລະ ຍັງມີທ່າທີສືບຕໍ່ໃຫ້ການສະໜັບສະໜູນ ຢ່າງຕໍ່ເນື່ອງອີກດ້ວຍ.
ທັງນີ້ ທ່ານ ເອີໂດກັນ ຜູ້ນຳຂອງຕວກກີ ໄດ້ອອກມາຕອບໂຕ້ ຂໍ້ກ່າວຫາຂອງຣັດເຊຍວ່າ ບໍ່ມີໃຜມີສິດ ໃນການໃສ່ຮ້າຍປ້າຍສີຕວກກີ ແລະ ປະກາດອີກວ່າ ຕົນເອງພ້ອມທີ່ຈະລາອອກ ຫາກຂໍ້ກ່າວຫາຂອງຣັດເຊຍ ໄດ້ຮັບການພິສູດວ່າເປັນຄວາມຈິງ ພ້ອມທັງຢ້ຳອີກວ່າ ເຂົາບໍ່ຢາກໃຫ້ຄວາມສຳພັນ ລະຫວ່າງຕວກກີ ແລະ ຣັດເຊຍ ຊຸດໂຊມລົງໄປກ່ວານີ້.
