ກອງປະຊຸມປຸກລະດົມຂະບວນການແຂ່ງຂັນ ຮັກຊາດ ແລະ ສ້າງບ້ານພັດທະນາ ຊຸກຍູ້ວຽກງານ 3 ສ້າງ ໄດ້ຈັດຂຶ້ນໃນວັນທີ 24 ທັນວາ 2013 ທີ່ຫໍປະຊຸມແຫ່ງຊາດ ໂດຍເປັນກຽດເຂົ້າຮ່ວມຂອງສະຫາຍ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ມີບັນດາການນຳພັກ-ລັດ ທັງສູນກາງ-ທ້ອງຖິ່ນ ແລະ ພາກສ່ວນກ່ຽວຂ້ອງ.
ສະຫາຍ ບຸນຍັງ ວໍລະຈິດ ກຳມະການກົມການເມືອງສູນກາງພັກ ຜູ້ປະຈຳການ ຄະນະເລຂາທິການສູນກາງພັກ ຮອງປະທານປະເທດ ຫົວໜ້າຄະນະຊີ້ນຳ 3 ສ້າງຂັ້ນສູນກາງ ກ່າວວ່າ: ສຳລັບສະພາບລວມກ່ຽວກັບການດຳເນີນວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານໃນ 2-3 ປີຜ່ານມາ ຕິດພັນກັບວຽກງານ 3 ສ້າງ ເຫັນໄດ້ວ່າ ໄດ້ປະກອບສ່ວນສຳຄັນ ເຂົ້າໃນການຮັບປະກັນສະຖຽນລະພາບທາງດ້ານການເມືອງ ໃຫ້ມີຄວາມໜັກແໜ້ນ ເຮັດໃຫ້ປະເທດເຮົາມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ ຮາກຖານບ້ານທົ່ວປະເທດສ່ວນໃຫຍ່ມີລະບົບການຈັດຕັ້ງແໜ້ນໜາ.
ສຳລັບການພັດທະນາຊົນນະບົດ ໄດ້ເອົາໃຈໃສ່ພັດທະນາພື້ນຖານໂຄງລ່າງຮັບໃຊ້ການຜະລິດ ແລະ ຊີວິດການເປັນຢູ່ຂອງປະຊາຊົນ ມາເຖິງປັດຈຸບັນ ບ້ານໃນຊົນນະບົດທີ່ມີໄຟຟ້າໃຊ້ ກວມ 70,23% ເສັ້ນທາງຄົມມະນາຄົມທຽວໄດ້ 2 ລະດູກວມ 80,99% ຊົນລະປະທານກວມ 36% ຂອງເນື້ອທີ່ປູກຝັງທັງໝົດ ເຮັດໃຫ້ບ້ານທຸກຍາກຫຼຸດລົງຍັງເຫຼືອ 2.291 ບ້ານ ເທົ່າກັບ 26,7% ຂອງຈຳນວນບ້ານທັງໝົດ ຈຳນວນບ້ານພັດທະນາໄດ້ເພີ່ມຂຶ້ນເປັນ 2.353 ບ້ານ ເທົ່າກັບ 27,7% ຂອງຈຳນວນບ້ານທັງໝົດ ສ່ວນຈຳນວນບ້ານໃຫຍ່ທີ່ມີຮູບລັກສະນະເປັນເມືອງນ້ອຍ ແລະ ເປັນໃຈກາງທາງດ້ານເສດຖະກິດ-ວັດທະນະທຳຢູ່ຊົນນະບົດ ກໍ່ເພີ່ມຂຶ້ນຢູ່ທ້ອງຖິ່ນຕ່າງໆ ການສົ່ງເສີມການຜະລິດເປັນສິນຄ້າມີການຂະຫຍາຍຕົວ ທັງຢູ່ໃນຕົວເມືອງ ແລະ ຊົນນະບົດ ມີຄອບຄົວຕົວແບບເກີດຂຶ້ນ ຊຶ່ງລາຍຮັບແຕ່ລະປີໄດ້ຫຼາຍລ້ານກີບ ຍ້ອນຄອບຄົວຕົວແບບເພີ່ມຂຶ້ນ ເຮັດໃຫ້ແຕ່ລະປີການຜະລິດກະສິກຳເພີ່ມຂຶ້ນສະເລ່ຍ 3,1% ໃນນັ້ນ ການຜະລິດເຂົ້າໄດ້ 3,2 ລ້ານໂຕນ ໃນປີ 2012 ແລະ 3,52 ລ້ານໂຕນ ໃນປີ 2013 ກາເຟ 52.440 ໂຕນ ສາລີ 182.600 ໂຕນ ຊີ້ນປາອາຫານມີການຂະຫຍາຍຕົວ 5% ຕໍ່ປີ ຊຶ່ງປະກອບສ່ວນເຮັດໃຫ້ເສດຖະກິດຂະຫຍາຍຕົວສະເລ່ຍໃນລະດັບ 8,1% ຕໍ່ປີ ເຮັດໃຫ້ຈຳນວນຄອບຄົວທຸກຍາກຫຼຸດລົງເຫຼືອແຕ່ 10,57% ຂອງຈຳນວນຄອບຄົວທັງໝົດ.
ການສຶກສາມີການຂະຫຍາຍຕົວດີຂຶ້ນ ບ້ານທີ່ມີໂຮງຮຽນປະຖົມເພີ່ມຂຶ້ນກວມເຖິງ 98,89% ອັດຕາການເຂົ້າຮຽນຂອງເດັກນ້ອຍໃນເກນອາຍຸເພີ່ມຂຶ້ນ ກວມ 98,97% ບ້ານຈົບປະຖົມແບບບັງຄັບ ກວມ 90,45% ແລະ ມີ 104 ເມືອງສຳເລັດການສຶກສາຊັ້ນປະຖົມພາກບັງຄັບ ສ່ວນດ້ານສາທາລະນະສຸກ ໄດ້ຂະຫຍາຍຕາໜ່າງສາທາລະນະສຸກໄປສູ່ເຂດຈຸດສຸມ ກຸ່ມບ້ານ ແລະ ບ້ານໃຫຍ່ ທົ່ວປະເທດມີສຸກສາລາທັງໝົດ 984 ແຫ່ງ ຕູ້ຢາປະຈຳບ້ານ 5.000 ກວ່າບ້ານ ພ້ອມໄດ້ສ້າງຕັ້ງກອງທຶນສຸຂະພາບສຳລັບຜູ້ທຸກຍາກຢູ່ 102 ເມືອງ ແລະ ປະຕິບັດນະໂຍບາຍອອກລູກບໍ່ເສຍຄ່າຢູ່ 62 ສຸກສາລາຂອງ 7 ແຂວງ ອັນໄດ້ສ້າງເງື່ອນໄຂໃຫ້ປະຊາຊົນຢູ່ຊົນນະບົດ ເຂົ້າເຖິງການບໍລິການດ້ານສາທາລະນະສຸກເພີ່ມຂຶ້ນ ກວມ 94,18% ສ່ວນບ້ານສາທາລະນະສຸກແມ່ນກວມເຖິງ 45,46%.
ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງພັກ ໂດຍສະເພາະພາຍຫຼັງທີ່ໄດ້ອອກມະຕິ 03 ຂອງກົມການເມືອງສູນກາງພັກ ແມ່ນໄດ້ເອົາໃຈໃສ່ຈັດຕັ້ງຜັນຂະຫຍາຍ ແລະ ເຮັດທົດລອງຢ່າງຕັ້ງໜ້າ ໂດຍສະເພາະແມ່ນ 51 ເມືອງ ແລະ 109 ບ້ານເປົ້າໝາຍສຳລັບສົກປີ 2013-2014 ຢູ່ແຕ່ລະບ້ານເປົ້າໝາຍ 3 ສ້າງ ມີໂຄງການພັດທະນາດ້ານເສດຖະກິດ-ສັງຄົມ 390 ໂຄງການ ໃນມູນຄ່າເກືອບ 94 ຕື້ກີບ ນອກນັ້ນ ທະນາຄານນະໂຍບາຍ ເພື່ອຊຸກຍູ້ສົ່ງເສີມການຜະລິດເປັນສິນຄ້າ ມີຫຼາຍກວ່າ 100 ຕື້ກີບ ໃນຈຳນວນ 800 ກວ່າກຸ່ມ ແລະ ອື່ນໆ.
ແຕ່ເຖິງຢ່າງໃດກໍ່ຕາມ ເພື່ອບັນລຸເປົ້າໝາຍສະຫັດສະວັດດ້ານການພັດທະນາ ໃນປີ 2015 ກໍ່ຄືພາປະເທດຊາດຫຼຸດພົ້ນອອກຈາກປະເທດດ້ອຍພັດທະນາໃນປີ 2020 ຄະນະພັກທຸກຂັ້ນແຕ່ສູນກາງລົງໄປເຖິງທ້ອງຖິ່ນ ຕ້ອງສືບຕໍ່ຄົ້ນຄວ້າ ແລະ ກຳແໜ້ນຄຳສັ່ງແນະນຳເລກທີ 03 ຂອງກົມການເມືອງສູນກາງພັກ ກ່ຽວກັບການສ້າງບ້ານພັດທະນາຕາມ 4 ເນື້ອໃນ 4 ຄາດໝາຍ ແລະ ມະຕິ 03 ຂອງກົມການເມືອງສູນກາງພັກ ກ່ຽວກັບ 3 ສ້າງ ຢ່າງເລິກເຊິ່ງຕື່ມອີກ ໂດຍຕ້ອງປັບປຸງລະບົບການຈັດຕັ້ງ ຊີ້ນຳກົນໄກການປະສານງານລະຫວ່າງໜ່ວຍງານ ແລະ ພາກສ່ວນຕ່າງໆຢູ່ສູນກາງ-ທ້ອງຖິ່ນ ໃຫ້ມີຄວມກະທັດຮັດກົມກຽວ ຫຼຸດຜ່ອນວຽກທີ່ຊ້ຳຊ້ອນ ແລະ ກົດໜ່ວງກັນ ຫັນພະນັກງານລົງໃຫ້ເມືອງ ໃຫ້ສອດຄ່ອງກັບຄວາມຕ້ອງການທາງດ້ານວິຊາສະເພາະ ແລະ ດ້ານຈຳນວນອັນຈຳເປັນ.
ໃນໄລຍະຈັດກອງປະຊຸມ ຍັງມີການວາງສະແດງຜະລິດຕະພັນຈາກກຸ່ມຜະລິດ ບ້ານຄອບຄົວຕົວແບບຈາກບັນດາແຂວງ ຊຶ່ງສິນຄ້າທີ່ນຳມາສະແດງ ມີທັງເປັນປະເພດກະສິກຳ ຫັດຖະກຳ ແລະ ອື່ນໆ.
ທີ່ມາhttp://www.vientianemai.net/teen/khao/1/10863