ສຳນັກຂ່າວຕ່າງປະເທດ ລາຍງານໃນວັນທີ 1 ທັນວານີ້ວ່າ ທ່ານ ອິກໍ ຄລິມອບ ໂຄສົກກອງທັບອາກາດຣັດເຊຍ ໄດ້ອອກມາເປີດເຜີຍວ່າ ກອງທັບອາກາດຣັດເຊຍ ໄດ້ສົ່ງເຮືອບິນສູ້ຮົບແບບຖິ້ມລະເບີດ Su-34 ເຂົ້າປະຕິບັດພາລະກິດ ໂຈມຕີກຸ່ມໄອເອັສໃນປະເທດຊີຣີ ເປັນເທື່ອທຳອິດ ທ່າມກາງສະພາບຄວາມເຄັ່ງຕຶງ ລະຫວ່າງຣັດເຊຍ ແລະ ຕວກກີ ຈາກເຫດການຕວກກີ ຍິງເຮືອບິນສູ້ຮົບ Su-24 ຂອງຣັດເຊຍຕົກ.
ທ່ານ ຄລິມອບ ກ່າວວ່າ ເຮືອບິນ Su-34 ໄດ້ອອກໂຈມຕີຖ້ຽວທຳອິດ ໂດຍບໍ່ພຽງແຕ່ບັນຈຸລະເບີດອານຸພາບສູງເທົ່ານັ້ນ ມັນຍັງໄດ້ຕິດຕັ້ງຂີປະນາວຸດ ຍິງຈາກອາກາດສູ່ອາກາດພິໄສກາງ ແລະ ພິໄສໄກ ຊຶ່ງມີປະສິດທິພາບ ໃນການໂຈມຕີເປົ້າໝາຍທາງອາກາດ ພາຍໃນລັດສະໝີ 60 ກິໂລແມັດ.
