ສຳນັກຂ່າວຕ່າງປະເທດ ລາຍງານໃນວັນທີ 1 ທັນວານີ້ວ່າ ທ່ານ ວະລາດິເມຍ ປູຕິນ ປະທານາທິບໍດີຣັດເຊຍ ໄດ້ອອກມາລະບຸ ໃນລະຫວ່າງເຂົ້າຮ່ວມ ກອງປະຊຸມສະຫະປະຊາຊາດ ວ່າດ້ວຍການປ່ຽນແປງຂອງສະພາບອາກາດ ຢູ່ນະຄອນຫລວງປາຣີ ປະເທດຝຣັ່ງ ໃນວັນຈັນທີ 30 ພະຈິກຜ່ານມາວ່າ ເຫດຜົນແທ້ຈິງ ທີ່ຕວກກີຍິງເຮືອບິນສູ້ຮົບ Su-24 ຂອງຣັດເຊຍຕົກ ໃນວັນທີ 24 ພະຈິກຜ່ານມານັ້ນ ແມ່ນຍ້ອນຕວກກີ ຕ້ອງການປົກປ້ອງນ້ຳມັນ ທີ່ຊື້ມາຈາກກຸ່ມລັດອິດສະລາມ ຫລື ໄອເອັສ. ທ່ານເວົ້າວ່າ ” ພວກເຮົາໄດ້ຮັບຂໍ້ມູນເພີ່ມເຕີມ ຊຶ່ງຢືນຢັນວ່າ ມີນ້ຳມັນຂອງພວກໄອເອັສ ເຂົ້າສູ່ດິນແດນຕວກກີ ແລະ ການຕັດສິນໃຈຍິງເຮືອບິນຕົກ ຖືກບົງການຢ່າງເຈາະຈົງ ເພື່ອປົກປ້ອງນ້ຳມັນດັ່ງກ່າວ “
ແນວໃດກໍຕາມ ທ່ານ ເຣເຊບ ເຕຢິບ ເອີໂດແກນ ປະທານາທິບໍດີຕວກກີ ໄດ້ອອກມາຕອບໂຕ້ວ່າ ຄຳກ່າວອ້າງທີ່ຕວກກີ ຊື້ນ້ຳມັນຈາກພວກໄອເອັສນັ້ນ ເປັນການໃສ່ຮ້າຍປ້າຍສີ ພ້ອມທັງບອກວ່າ ຕົນເອງຈະລາອອກຈາກຕຳແໜ່ງທັນທີ ຖ້າຫາກຄຳກ່າວຫາຂອງປູຕິນ ໄດ້ຮັບການພິສູດວ່າເປັນຄວາມຈິງ.