ຜ່ານການຄົ້ນຄວ້າປະກອບຄຳຄິດຄຳເຫັນ ຂອງບັນດາຄະນະຜູ້ແທນສະມາຊິກສະພາແຫ່ງຊາດ (ສສຊ) ໃນວັນທີ 24 ທັນວາ 2013 ດ້ວຍຄວາມເອົາໃຈໃສ່ ເຊິ່ງໃນຕອນເຊົ້າພາຍຫຼັງທີ່ທ່ານນາງ ໃບຄຳ ຂັດທິຍະ ລັດຖະມົນຕີຊ່ວຍວ່າການ ກະຊວງແຮງງານ ແລະ ສະຫວັດດີການ-ສັງຄົມ ຂຶ້ນຜ່ານຮ່າງກົດໝາຍແຮງງານສະບັບປັບປຸງ ປະກອບມີ 17 ພາກ 29 ໝວດ 181 ມາດຕາ ຈາກນັ້ນ ໄດ້ພ້ອມກັນຄົ້ນຄວ້າຮ່າງກົດໝາຍສະບັບດັ່ງກ່າວ ດ້ວຍຄວາມຮັບຜິດຊອບສູງ ຈົນສາມາດລົງປະຊາມະຕິເປັນເອກະພາບກັນ ຮັບຮອງເອົາດ້ວຍຄະແນນສຽງສ່ວນຫຼາຍ 112 ຂອງຜູ້ແທນທີ່ມີສິດອອກສຽງທັງໝົດ 125 ທ່ານ.
ສຳລັບໃນຕອນບ່າຍ ທາງຄະນະຜູ້ແທນ ໄດ້ພ້ອມກັນສືບຕໍ່ຄົ້ນຄວ້າພິຈາລະນາ ຮ່າງກົດໝາຍວ່າດ້ວຍມໍລະດົກແຫ່ງຊາດ (ສະບັບປັບປຸງ) ປະກອບມີ 12 ພາກ 92 ມາດຕາ ເຊິ່ງຂຶ້ນຜ່ານໂດຍທ່ານ ສຈ.ດຣ. ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ.
ຈາກການຄົ້ນຄວ້າປະກອບຄຳຄິດຄຳເຫັນຂອງບັນດາທ່ານ ສສຊ ຢ່າງສົມເຫດສົມຜົນ ຕ່າງຄົນກໍ່ໄດ້ຍົກຫຼາຍບັນຫາຂຶ້ນມາ ເພື່ອເປັນບ່ອນອີງ ພ້ອມດຽວກັນ ທາງທ່ານລັດຖະມົນຕີຊ່ວຍວ່າການ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ກໍ່ໄດ້ຂຶ້ນຊີ້ແຈງອີກຄັ້ງ ເພື່ອເຮັດໃຫ້ຮ່າງກົດໝາຍສະບັບດັ່ງກ່າວ ມີຄວາມຮັດກຸມເໝາະສົມ ຈາກນັ້ນ ໄດ້ພ້ອມກັນຮັບຮອງເອົາຮ່າງກົດໝາຍສະບັບປັບປຸງດັ່ງກ່າວ ເປັນອັນວ່າ ຈາກການຄົ້ນຄວ້າປະກອບຄຳຄິດຄຳເຫັນຢ່າງກົງໄປກົງມາ ທັງພາກເຊົ້າ ແລະ ພາກບ່າຍ ກອງປະຊຸມໃນວັນນີ້ ຮັບຮອງເອົາຮ່າງກົດໝາຍສະບັບປັບປຸງທັງສອງສະບັບ ດ້ວຍຄະແນນສຽງສ່ວນຫຼາຍ.
ທີ່ມາhttp://www.vientianemai.net/teen/khao/1/10861