ກອງທຶນປົກປ້ອງຜູ້ຝາກເງິນ (ກທປ) ໄດ້ຈັດພິທີຮັບເອົາທະນາຄານເມແບງ ທະນາຄານມາຣູຮານ ເຈແປນ ທະນາຄານພາບລິກ ແລະ ທະນາຄານການຄ້າໄຊງ່ອນ-ຮ່າໂນ້ຍ ເຂົ້າເປັນສະມາຊິກ ກທປ ເຊິ່ງພິທີດັ່ງກ່າວໄດ້ຈັດຂຶ້ນໃນຕອນແລງຂອງວັນທີ 19 ທັນວາ ທີ່ໂຮງແຮມດອກຈຳປາ ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມຂອງທ່ານ ສັນຕິ ພົນເມືອງລາວ ຮອງປະທານສະພາບໍລິຫານ-ຜູ້ອຳນວຍການ ກທປ ນອກນີ້ ກໍມີບັນດາຄະນະກົມຈາກທະນາຄານແຫ່ງ ສປປ ລາວ ສະມາຊິກສະພາບໍລິຫານ-ຄະນະອຳນວຍການ ກທປ ແລະ ຜູ້ບໍລິຫານລະດັບສູງຈາກທະນາຄານທຸລະກິດຕ່າງໆ ລວມທັງ 4 ທະນາຄານສະມາຊິກໃໝ່ເຂົ້າຮ່ວມ.
ທ່ານຜູ້ອຳນວຍການ ກທປ ໄດ້ຢືນຢັນເຖິງຜົນງານໃນຮອບໜຶ່ງປີທີ່ ກທປ ຍາດມາໄດ້ ໂດຍສະເພາະ ການປະຕິບັດວຽກງານວິຊາສະເພາະ ແມ່ນປະຕິບັດໄດ້ຕາມແຜນ ບາງດ້ານກໍ່ເກີນແຜນ ໃນນີ້ຜິດດ່ຽງລາຍຮັບ-ລາຍຈ່າຍເກີນແຜນ 49% ແລະ ມາຮອດເດືອນ 12/2013 ກທປ ມີສະມາຊິກຈຳນວນ 30 ທະນາຄານ ເຊິ່ງເພີ່ມຂຶ້ນ 4 ທະນາຄານ ທັງໝົດນີ້ໄດ້ຊໍ່ສະແດງໃຫ້ເຫັນ ເຖິງການເຕີບໃຫຍ່ທາງດ້ານຈຳນວນທຶນ ຄວາມເຂັ້ມແຂງ ແລະ ການຂະຫຍາຍຕົວທາງດ້ານຂະແໜງການທະນາຄານ ທັງສ້າງຄວາມເຊື່ອໝັ້ນໃຫ້ແກ່ຜູ້ມີເງິນຝາກໃນລະບົບທະນາຄານ ເຮັດໃຫ້ບັນດາທະນາຄານທຸລະກິດ ສາມາດລະດົມແຫຼ່ງທຶນຈາກພາຍນອກໄດ້ຫຼາຍຂຶ້ນ ເພື່ອສາມາດສະໜອງສິນເຊື່ອ ປະຕິບັດການຊຳລະສະສາງ ເວົ້າລວມແລ້ວ ສາມາດສ້າງສະພາບຄ່ອງໃນການດຳເນີນທຸລະກິດຂອງຕົນ ໃຫ້ມີຜົນກຳໄລໃນເງື່ອນໄຂເສດຖະກິດທີ່ມີການແຂ່ງຂັນ ເພື່ອປະກອບສ່ວນໃນການພັດທະນາເສດຖະກິດ-ສັງຄົມຂອງ ສປປ ລາວ.
ທ່ານ ສັນຕິ ພົນເມືອງລາວ ຜູ້ອຳນວຍການ ກທປ ໄດ້ໃຫ້ກຽດມອບໃບຢັ້ງຢືນການເຂົ້າເປັນສະມາຊິກ ກທປ ໃຫ້ແກ່ທະນາຄານເມແບງ ທະນາຄານມາຣູຮານ ເຈແປນ ທະນາຄານພາບລິກ ແລະ ທະນາຄານການຄ້າໄຊງ່ອນ-ຮ່າໂນ້ຍ ໂດຍມີຜູ້ບໍລິຫານລະດັບສູງຂອງທະນາຄານທັງ 4 ແຫ່ງເປັນຜູ້ຮັບ ເຊິ່ງບັນດາທະນາຄານດັ່ງກ່າວ ລ້ວນແຕ່ມີຊື່ສຽງ ມີທຶນຮອນ ປະສົບການ ການບໍລິການທີ່ດີ ຢູ່ໃນບັນດາປະເທດທີ່ມີສຳນັກງານໃຫຍ່ຕັ້ງຢູ່ ລວມທັງສາຂາ-ໜ່ວຍບໍລິການໃນປະເທດຕ່າງໆ ການເຂົ້າເປັນສະມາຊິກ ກທປ ຍັງເປັນການເພີ່ມຄວາມເຊື່ອໝັ້ນຂອງສັງຄົມຕໍ່ທະນາຄານດັ່ງກ່າວ ທັງເປັນການຈັດຕັ້ງປະຕິບັດກົດໝາຍຂອງລາວ ແລະ ທັງປະກອບສ່ວນເຂົ້າໃນການພັດທະນາຂະແໜງການທະນາຄານ ກໍຄືການພັດທະນາເສດຖະກິດ-ສັງຄົມຂອງ ສປປ ລາວ ຕາມແນວທາງຂອງພັກ ແລະ ລັດຖະບານ.
ທີ່ມາhttp://www.vientianemai.net/teen/khao/1/10856