ສຳນັກຂ່າວຕ່າງປະເທດ ລາຍງານໃນວັນທີ 28 ພະຈິກຜ່ານມານີ້ວ່າ ສະພາແຫ່ງຊາດຫວຽດນາມ ໄດ້ມີມະຕິຮັບຮອງ ໃນວັນສຸກທີ 27 ພະຈິກ 2015 ຫລຸດຜ່ອນ ໂທດປະຫານຊີວິດ ໃນຄວາມຜິດທາງອາຍາ ຂໍ້ຫາການສໍ້ລາດບັງຫລວງລົງ ໃນກໍລະນີທີ່ຈຳເລີຍ ຫາກໄດ້ສົ່ງເງິນທີ່ໄດ້ມາໂດຍບໍ່ຖືກຕ້ອງ ຄືນໃຫ້ແກ່ລັດ ຢ່າງໜ້ອຍ 3/4 ຫລື ຢ່າງໜ້ອຍ 75% ຂອງເງິນຈຳນວນດັ່ງກ່າວ. ໃນໄລຍະຜ່ານມາ ຫວຽດນາມໄດ້ຕັດສິນລົງໂທດ ປະຫານຊີວິດເຈົ້າໜ້າທີ່ຂອງລັດຫລາຍຄົນ ໃນນັ້ນລວມມີ ເຈົ້າໜ້າທີ່ລະດັບສູງ ຂອງລັດວິສາຫະກິດ Vinashin ຈຳນວນ 2 ຄົນ ຖືກສານຕັດສິນປະຫານຊີວິດ ໃນຄະດີສໍ້ລາດບັງຫລວງ ໂດຍປັດຈຸບັນ ຍັງລໍຖ້າການປະຫານຊີວິດຢູ່.
ທັງນີ້ ການປ່ຽນແປງໂທດດັ່ງກ່າວ ເປັນໄປຕາມແນວທາງການຕ່າງປະເທດຂອງຫວຽດນາມ ເພື່ອຍົກເລີກໂທດປະຫານຊີວິດ ໃນຄະດີອາຍາຫລາຍຂໍ້ຫາ ຕາມທ່າອ່ຽງລວມຂອງສາກົນ, ແນວໃດກໍຕາມ ພັກ ແລະ ລັດຖະບານຫວຽດນາມ ຍັງຈະສືບຕໍ່ ປາບປາມການສໍ້ລາດບັງຫລວງ ຊຶ່ງເປັນປະກົດການຫຍໍ້ທໍ້ ພາຍໃນຖັນແຖວພະນັກງານ – ສະມາຊິກພັກ ໃຫ້ຖົດຖອຍລົງຢ່າງຕັ້ງໜ້າ.
