ຂປລ. ໂດຍຕອບສະໜອງຕາມ ການເຊື້ອເຊີນຂອງທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ, ທ່ານ ນາງ ເຮເລັນ ຄລາກ ຜູ້ອໍານວຍການໃຫຍ່ອົງການສະຫະປະຊາຊາດ ເພື່ອການພັດທະນາ ພ້ອມດ້ວຍຄະນະ ໄດ້ເດີນທາງມາ ເພື່ອມາຢ້ຽມຢາມ ສປປ ລາວ ແລະ ເຂົ້າຮ່ວມກອງປະຊຸມໂຕະມົນລະດັບສູງ ຄັ້ງທີ 12 ແຕ່ວັນທີ 26-29 ພະຈິກ 2015, ໂດຍມີທ່ານ ສະເຫລີມໄຊ ກົມມະສິດ, ລັດຖະມົນຕີຊ່ວຍວ່າການກະຊວງການຕ່າງປະເທດ, ທ່ານນາງ ຄາຣິນາ ອິມໂມເນັນ, ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາປະຈໍາ ສປປ ລາວ ແລະ ຄະນະ ອອກຕ້ອນຮັບທີ່ສະຫນາມບິນສາກົນວັດໄຕ.
ໃນໄລຍະເຄື່ອນໄຫວຢູ່ນະຄອນຫລວງວຽງຈັນ, ທ່ານ ນາງ ເຮເລັນ ຄລາກ ຈະໄດ້ພົບປະກັບການນຳຂັ້ນສູງຂອງ ສປປ ລາວ ແລະ ຈະເປັນປະທານກິດຕິມະສັກ ຮ່ວມກັບ ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ໃນພິທີເປີດກອງປະຊຸມໂຕະມົນລະດັບສູງ ຄັ້ງທີ 12 ໃນວັນທີ 27 ພະຈິກ 2015 ນີ້. ນອກຈາກນັ້ນ, ທ່ານນາງ ເຮເລັນ ຄລາກ ແລະ ຄະນະ ຈະເດີນທາງໄປແຂວງຫລວງພະບາງ ເພື່ອຢ້ຽມຢາມໂຄງການຮ່ວມມື ລະຫວ່າງ ສປປ ລາວ ແລະ ອົງການເຄື່ອຂ່າຍ ສປຊ ເປັນຕົ້ນໂຄງການສົ່ງເສີມກະສິກໍາ ແລະ ໂຄງການເກັບກູ້ລະເບີດ, ພ້ອມທັງທ່ຽວຊົມສະຖານທີ່ທ່ອງທ່ຽວທຳມະຊາດ ແລະ ວັດທະນາທຳຂອງແຂວງຫລວງພະບາງ ໃນໂອກາດສະເຫລີມສະຫລອງ ການເປັນເມືອງມໍລະດົກໂລກ ຄົບຮອບ 20 ປີ ໃນເດືອນທັນວານີ້.
ແຫລ່ງຂ່າວ:
