ສຳນັກຂ່າວຕ່າງປະເທດ ລາຍງານໃນວັນທີ 26 ພະຈິກນີ້ວ່າ ສຳນັກງານອົງການອຸຕຸນິຍົມວິທະຍາໂລກ ຊຶ່ງເປັນອົງການຈັດຕັ້ງ ພາຍໃນເຄືອຂ່າຍຂອງ ອົງການສະຫະປະຊາຊາດ ຫລື UN ໄດ້ເປີດເຜີຍຂໍ້ມູນວ່າ ໃນໄລຍະ 10 ເດືອນທຳອິດຂອງປີ 2015 ນີ້ ອຸນຫະພູມພື້ນຜິວຂອງໂລກ ໂດຍສະເລ່ຍສູງຂຶ້ນ 1 ອົງສາ C ແຊງໜ້າປີກາຍນີ້ ທີ່ສູງຂຶ້ນສະເລ່ຍ 0.73 ອົງສາ C ໃນຂະນະທີ່ອຸນຫະພູມຜິວນ້ຳມະຫາສະໝຸດ ປີນີ້ມີທ່າອ່ຽງທຽບເທົ່າ ຫລື ແຊງໜ້າປີຜ່ານມາ ຊຶ່ງສູງເປັນປະຫວັດການ.

ອົງການອຸຕຸນິຍົມວິທະຍາໂລກ ໄດ້ເປີດເຜີຍວ່າ ປົກກກະຕິແລ້ວ ຈະເກັບກຳຂໍ້ມູນໝົດປີ ກ່ອນຈະແຈ້ງໃຫ້ສາທາລະນະຮັບຊາບ ແຕ່ວ່າປີນີ້ ຕ້ອງໄດ້ເປີດເຜີຍຂໍ້ມູນ ໃນເບື້ອງຕົ້ນ ເພື່ອໃຫ້ທ່ວງທັນ ກັບກອງປະຊຸມກ່ຽວກັບ ການປ່ຽນແປງຂອງສະພາບພູມອາກາດໂລກ ຂອງອົງການສະຫະປະຊາຊາດ ທີ່ຈະເປີດຂຶ້ນ ໃນວັນທີ 30 ພະຈິກຈະມາເຖິງນີ້ ທີ່ນະຄອນຫລວງປາຣີ ປະເທດຝຣັ່ງ ຊຶ່ງຈະມີຜູ້ນຳຈາກທົ່ວໂລກ ກ່ວາ 140 ປະເທດເຂົ້າມຮ່ວມ.