ພິທີມອບ-ຮັບໂຄງການກໍ່ສ້າງເສັ້ນທາງແຕ່ 3 ແຍກໜອງແຕ່ງ-ບ້ານໃໝ່ ໄລຍະທີ 1 ເມືອງສີໂຄດຕະບອງ ນະຄອນຫຼວງວຽງຈັນ ໄດ້ມີຂຶ້ນວັນທີ 23 ທັນວາ 2013 ຢູ່ເສັ້ນທາງດັ່ງກ່າວ ໂດຍມີທ່ານ ສຸກັນ ມະຫາລາດ ເຈົ້າຄອງ ນວ ພ້ອມດ້ວຍຮອງເຈົ້າຄອງ ແລະ ແຂກຖືກເຊີນຈາກພາກສ່ວນຕ່າງໆເຂົ້າຮ່ວມ.
ທ່ານ ບຸນແປງ ບົວພັນ ຜູ້ອຳນວຍການລັດວິສາຫະກິດ ພັດທະນາກະສິກຳ-ອຸດສາຫະກຳ ແລະ ບໍລິການຂາອອກ-ຂາເຂົ້າ (ພກອ) ໃນນາມຜູ້ຮັບເໝົາໂຄງການໄດ້ກ່າວວ່າ: ໂຄງການກໍ່ສ້າງເສັ້ນທາງແຕ່ 3 ແຍກເສັ້ນທາງເລກທີ 13 ເໜືອ ບ້ານໜອງແຕ່ງ-ບ້ານໃໝ່ ແມ່ນໂຄງການຂອງພັກ-ລັດ ເວົ້າລວມ ເວົ້າສະເພາະຂອງ ນວ ໄດ້ມີຄວາມຕັດສິນໃຈສູງ ເພື່ອກໍ່ສ້າງໃຫ້ເປັນເສັ້ນທາງເຊື່ອມຈອດລະຫວ່າງເສັ້ນທາງເລກທີ 13 ເໜືອ-ຫາເສັ້ນທາງເລກທີ 11 ແຄມຂອງ ເຊິ່ງເປັນເສັ້ນທາງຍຸດທະສາດຂອງ ນວ ເພື່ອແນໃສ່ອຳນວຍຄວາມສະດວກໃນການສັນຈອນ ໃຫ້ປະຊາຊົນໄດ້ຊົມໃຊ້ທາງເສັ້ນນີ້ມີຄວາມຍາວ 15,625 ກິໂລແມັດ ແບ່ງເປັນ 2 ໄລຍະຄື: ໄລຍະທີ 1 ຍາວ 7,812 ກິໂລແມັດ ແມ່ນລັດວິສາຫະກິດ ພກອ ເປັນຜູ້ຮັບເໝົາ ແລະ ລົງທຶນກ່ອນ 100% ໂດຍມີໄລຍະການກໍ່ສ້າງ 2 ປີ.
ຜ່ານການປະຕິບັດໂຄງການຕົວຈິງນັບແຕ່ວັນທີ 10 ມັງກອນ 2012 ເປັນຕົ້ນມາ ມາຮອດປັດຈຸບັນແມ່ນສຳເລັດ 100% ໃນນີ້ໄດ້ກໍ່ສ້າງເປັນເສັ້ນທາງເບຕົງເສີມເຫຼັກໜາ 23 ຊັງຕີແມັດ ກວ້າງ 9 ແມັດ ມີທາງຄົນຍ່າງເບື້ອງລະ 1,5 ແມັດ ພ້ອມທັງມີລະບົບລະບາຍນ້ຳສອງຟາກທາງ ແລະ ປ້າຍສັນຍານຄົບຊຸດ ໂຄງການນີ້ນອກຈາກຈະສ້າງສຳເລັດກ່ອນຄາດໝາຍ ແລະ ຮັບປະກັນຄຸນນະພາບແລ້ວ ຍັງເຫັນວ່າສາມາດປະຢັດທຶນໃຫ້ພັກ-ລັດເປັນຈຳນວນບໍ່ໜ້ອຍ ເນື່ອງຈາກມູນຄ່າກໍ່ສ້າງຕາມສັນຍາແມ່ນ 186,21 ຕື້ກີບ ແຕ່ການປະຕິບັດຕົວຈິງໃຊ້ທຶນພຽງ 150,59 ຕື້ກີບເທົ່ານັ້ນ.
ທ່ີ່ມາhttp://www.vientianemai.net