ນັກທຸລະກິດລາວລົງທຶນ 330 ລ້ານໂດລາສະຫະລັດ ກໍ່ສ້າງໂຮງງານຊີມັງຂະໜາດໃຫຍ່ຢູ່ພາກກາງຂອງລາວ (ແຂວງຄຳມ່ວນ) ຄາດວ່າຖ້າໂຄງການກໍ່ສ້າງດັ່ງກ່າວສຳເລັດສົມບູນ ຈະມີກຳລັງການຜະລິດຫຼາຍເຖິງ 5.000 ໂຕນ/ມື້.
ທ່ານ ຈິດຕະກອນ ສຸກສົມບູນ ປະທານກຸ່ມບໍລິສັດ ສຸກສົມບູນ ຈຳກັດ ໃຫ້ສຳພາດເມື່ອບໍ່ດົນມານີ້ວ່າ: ໂຄງການກໍ່ສ້າງໂຮງງານຊີມັງລາວພັດທະນາຢູ່ແຂວງຄຳມ່ວນ ທີ່ພວມດຳເນີນການກໍ່ສ້າງຢູ່ໃນປັດຈຸບັນ ເມື່ອສ້າງສຳເລັດແລ້ວ ຈະມີກຳລັງການຜະລິດຫຼາຍເຖິງ 5.000 ໂຕນ/ມື້ ເຊິ່ງທາງບໍລິສັດໄດ້ລົງທຶນໃນການກໍ່ສ້າງທັງໝົດ 330 ລ້ານໂດລາສະຫະລັດ ໃນເນື້ອທີ່ 100 ເຮັກຕາ ເລີ່ມລົງມືປະຕິບັດຈັດສັນທີ່ດິນ ປັບໜ້າດິນ ສ້າງສິ່ງອຳນວຍຄວາມສະດວກດ້ານຕ່າງໆ ແລະ ລວມທັງວຽກງານຮັກສາສິ່ງແວດລ້ອມ ເຊິ່ງໃຊ້ເວລາເຖິງ 2 ປີແລ້ວ ຂະນະນີ້ ພວກເຮົາໄດ້ບຸກເບີກ ແລະ ພັດທະນາເນື້ອທີ່ເກືອບ 3 ກິໂລແມັດ ຈາກນັ້ນ ກໍຈະວາງລະບົບຖານດິນໃນການສ້າງໂຮງງານ ເພື່ອກ້າວໄປຫາຂັ້ນຕອນກໍ່ສ້າງໂຮງງານພາຍໃນເດືອນເມສາ ປີ 2014 ນີ້ ແລະ ຈະໃຫ້ສຳເລັດໃນຕົ້ນປີ 2016 ຕາມແຜນ ຖ້າໂຮງງານຊີມັງແຫ່ງນີ້ສ້າງສຳເລັດ ມັນຈະຊ່ວຍໃຫ້ຜູ້ບໍລິໂພກພາຍໃນ ສາມາດຊື້ຊີມັງໃນລາຄາທີ່ຖືກກວ່າການນຳເຂົ້າຊີມັງຈາກຕ່າງປະເທດ ຫຼາຍເທົ່າ ແລະ ຍັງເປັນການປະກອບສ່ວນສ້າງລາຍຮັບໃຫ້ແກ່ລັດຖະບານເພີ່ມຂຶ້ນ ນອກນັ້ນຍັງເປັນການສົ່ງເສີມໃຫ້ປະຊາຊົນພາຍໃນແຂວງຄຳມ່ວນ ແລະ ແຂວງອ້ອມຂ້າງມີວຽກເຮັດງານທຳບໍ່ຕ່ຳກວ່າ 3.000 ຄົນ.
ສຳລັບວັດຖຸດິບທີ່ຈະນຳມາປ້ອນເຂົ້າໂຮງງານ 99% ແມ່ນໃຊ້ວັດຖຸດິບພາຍໃນປະເທດເຮົາ ແລະ 1% ແມ່ນຈະນຳເຂົ້າຈາກຕ່າງປະເທດ ນັ້ນແມ່ນຖ່ານຫີນ.
ທີ່ມາhttp://www.vientianemai.net