ຂ່າວໃໝ່ໆຈາກແວດວົງລົດຍົນທັງໃນແລະຕ່າງປະເທດຍັງມີມາໃຫ້ເຮົາໄດ້ເຫັນກັນຢ່າງຕໍ່ເນື່ອງ ມື້ນີ້ເຮົາມີລົດຊູເປີຄາຜີສາດຮ້າຍສຸດໂຫດຈາກຄ້າຍ W Motors ມາຝາກກັນ ແຮງທັງລົດແລະລາຄາກັນເລີຍ
ດັບເບີນຍູ ມໍເຕີ (W Motors) ຄ້າຍລົດຈາກດິນແດນຕະເວັນອອກກາງ ໄດ້ເຜີຍໂສມລົດຊູເປີຄາ Fenyr Supersport ພາຍໃນງານ ດູໄບ ມໍເຕີໂຊ ສານຕໍ່ຄວາມໂຫດຕໍ່ຈາກ Lykan Hypersport ທີ່ເຄີຍອອກລວດລາຍໃນໜັງດັງຢ່າງ Furious 7 ໂດຍ ຜີສາດຮ້າຍ Fenyr Supersport ນັ້ນມາພ້ອມກັບ ຮູບລັກສະນະອັນໜ້າຢ້ານ ຕົວຖັງແບບຟູຄາບອນໄຟ ສວຍງາມລົງຕົວ ມີອັດຕາເລັ່ງຈາກ 0-100 ກມ./ຊມ. ໃນເວລາພຽງແຕ່ 2.7 ວິນາທີ ສ່ວນຄວາມໄວສູງສຸດນັ້ນຢູ່ທີ່ 400 ກມ./ຊມ.
ສ່ວນຂຸມພະລັງຄວາມໂຫດຮ້າຍນັ້ນມາພ້ອມກັບເຄື່ອງຈັກ 6 ສູບ 4.0 ລີດ ເທີໂບຄູ່ ກຳລັງສູງສຸດຢູ່ທີ່ 900 ແຮງມ້າ ສ່ວນແຮງບິດນັ້ນຢູ່ທີ່ 1,200 ນິວຕັນແມັດ ທັງໂຫດທັງແຮງແທ້ໆ
ລົດ Fenyr Supersport ຄັນນີ້ອອກແບບແລະສ້າງມາເພື່ອຜູ້ໃຊ້ລະດັບມະຫາເສດຖີ ເພາະຜະລິດອອກມາພຽງແຕ່ 25 ຄັນໃນໂລກເທົ່ານັ້ນ ສ່ວນລາຄານັ້ນຍັງບໍ່ມີການເປີດເຜີຍແຕ່ຢ່າງໃດ ແຕ່ເດົາກັນວ່າໜ້າຈະຢູ່ເກືອບດຽວກັບ Lykan Hypersport ຊຶ່ງຢູ່ທີ່ 3.4 ລ້ານຫລຽນສະຫະລັດ
