ກອງປະຊຸມສຳມະນາໃນຫົວຂໍ້ “ສື່ມວນຊົນອາຊຽນເກັບກຳຂ່າວງານບຸນໃຫຍ່ດ້ານວັດທະນະທຳ” ໄດ້ຈັດຂຶ້ນໃນລະຫວ່າງວັນທີ 23-26 ພະຈິກ 2015 ໂຮງແຮມລ້ານຊ້າງ ນະຄອນຫຼວງວຽງຈັນ ໂດຍການເປັນປະທານຂອງທ່ານ ສະຫວັນຄອນ ຣາຊມຸນຕຣີ ລັດຖະມົນຕີຊ່ວຍວ່າການ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ພ້ອມດ້ວຍສື່ມວນຊົນຈາກປະເທດອາຊຽນເຂົ້າຮ່ວມ.
ໃນໄລຍະກອງປະຊຸມ ຜູ້ເຂົ້າຮ່ວມຈະໄດ້ນຳສະເໜີກ່ຽວກັບງານບຸນໃຫຍ່ດ້ານວັດທະນະທຳຂອງປະເທດຕົນ ແລະ ປະສົບປະການໃນການນຳສະເໜີຂ່າວ ສິ່ງທີ່ຄວນປະຕິບັດຂອງສື່ກ່ຽວກັບງານບຸນໃຫຍ່ດ້ານວັດທະນະທຳ ພ້ອມດຽວກັນຍັງຈະໄດ້ໄປທ່ຽວຊົມງານບຸນໃຫຍ່ວັດທະນະທຳ ແລະ ແຫຼ່ງທ່ອງທ່ຽວທາງດ້ານວັດທະນະທຳ ໃນນະຄອນຫຼວງວຽງຈັນ ເຊັ່ນ: ບຸນນະມັດສະການພະທາດຫຼວງວຽງຈັນ ແລະ ອື່ນໆ.
ໂອກາດນີ້ທ່ານ ສະຫວັນຄອນ ຣາຊມຸນຕຣີ ໄດ້ກ່າວວ່າ: ການສຳມະນາຄັ້ງນີ້ ເປັນສ່ວນໜຶ່ງໃຫ້ສື່ມວນຊົນເຊື່ອມໂຍງກັນເອງ ແລະ ປະຊາຊົນອາຊຽນ ເຊື່ອມໂຍງດ້ານວັດທະນະທຳອາຊຽນ ເພື່ອກ້າວໄປສູ່ປະຊາຄົມອາຊຽນ ເຊິ່ງໄດ້ຖືກຮັບຮອງເອົາໃນກອງປະຊຸມຄັ້ງທີ 11 ຂອງລັດຖະມົນຕີອາຊຽນທີ່ຮັບຜິດຊອບວຽກງານຖະແຫຼງຂ່າວ ທີ່ນະຄອນຫຼວງກົວລາລຳເປີ ປະເທດມາເລເຊຍ 2012 ທີ່ຜ່ານມາ.
ທ່ານກ່າວເນັ້ນວ່າ: ຜູ້ນຳອາຊຽນຈະໄດ້ຮ່ວມກັນປະກາດການສ້າງຕັ້ງປະຊາຄົມອາຊຽນ ຢ່າງເປັນທາງການ ໃນທ້າຍປີ 2015 ສື່ມວນຊົນສາມາດສ້າງຄວາມເຂົ້າໃຈກັນໃຫ້ຫຼາຍຂຶ້ນ ລະຫວ່າງນັກຂ່າວອາຊຽນເອງ ແລະ ສົ່ງເສີມການໄປມາຫາສູ່ລະຫວ່າງປະຊາຊົນອາຊຽນ “ນັກຂ່າວມີບົດບາດເປັນໃຈກາງເພື່ອສົ່ງເສີມການເຊື່ອມໂຍງອາຊຽນ ແລະ ສ້າງຄວາມສາມັກຄີ ເພື່ອຊຸກຍູ້ອາຊຽນໃຫ້ກ້າວໄປສູ່ຈຸດໝາຍປາຍທາງອັນດຽວກັນ” ທຸກປະເທດອາຊຽນ ອຸດົມສົມບູນໄປດ້ວຍວັດທະນະທຳ ແລະ ຮີດຄອງປະເພນີອັນດີງາມມາແຕ່ດົນນານ ແຕ່ລະປະເທດແມ່ນປະກອບໄປດ້ວຍຫຼາຍຊົນເຜົ່າ ແລະ ແຕ່ລະຊົນເຜົ່າລ້ວນແຕ່ມີວັດທະນະທຳ ພາສາປາກເວົ້າ ເຄື່ອງແຕ່ງກາຍ ວິຖີຊີວິດ ຂະນົບທຳນຽມ ແລະ ຮີດຄອງປະເພນີທີ່ເປັນເອກະລັກຂອງຕົນ ພວກເຂົາເຈົ້າເຫຼົ່ານີ້ຢູ່ຮ່ວມກັນຢ່າງກົມກຽວ ໂດຍປາສະຈາກການຂັດແຍ່ງກັນ.
ໃນໄລຍະກອງປະຊຸມຄັ້ງນີ້ ຜູ້ຊ່ຽວຊານລາວດ້ານສື່ມວນຊົນ ດ້ານທ່ອງທ່ຽວ ແລະ ດ້ານວັດທະນະທຳ ຈະໄດ້ນຳສະເໜີ ແລະ ແລກປ່ຽນປະສົບປະການກ່ຽວກັບການລາຍງານຂ່າວກ່ຽວກັບວັດທະນະທຳ ການທ່ອງທ່ຽວທາງດ້ານວັດທະນະທຳ ຂະນົບທຳນຽມ ຮີດຄອງປະເພນີ ແລະ ວິຖີຊີວິດຂອງປະຊາຊົນລາວບັນດາເຜົ່ານຳອີກ ເຊິ່ງເປັນໂອກາດອັນດີ ຜ່ານກອງປະຊຸມຄັ້ງນີ້ ຈະໄດ້ເຮັດໃຫ້ການໂຄສະນາປະຊາສຳພັນການທ່ອງທ່ຽວ ທາງດ້ານວັດທະນະທຳຂອງລາວ ກໍ່ຄືການຮຽນຮູ້ວັດທະນະທຳຂອງບັນດາປະເທດໃນອາຊຽນໃຫ້ຫຼາຍຂຶ້ນກວ່າເກົ່າ.
ແຫ່ລງຂ່າວ
