ກອງປະຊຸມໃຫຍ່ຜູ້ຕາງໜ້າສະມາຊິກສະພາການຄ້າຈີນ ປະຈຳ ສປປ ລາວ ສາຂາແຂວງຝູຈ້ຽນ ຄັ້ງທີ 1 ໄດ້ຈັດຂຶ້ນວັນທີ 18 ພະຈິກ 2015 ທີ່ເຂດເສດຖະກິດພິເສດສາມຫຼ່ຽມຄຳ ແຂວງບໍ່ແກ້ວ ໂດຍເປັນປະທານຂອງທ່ານ ຈ້າວ ເວີຍ ປະທານສະພາບໍລິຫານເຂດເສດຖະກິດພິເສດສາມຫຼ່ຽມຄຳ ທ່ານ ສົມລິດ ສີພາວັນ ຮອງເຈົ້າແຂວງບໍ່ແກ້ວ ທ່ານ ຈັນທະວີ ໂພທິສານ ຮອງສະພາບໍລິຫານເຂດເສດຖະກິດພິເສດສາມຫຼ່ຽມຄຳ ພ້ອມດ້ວຍສະມາຊິກນັກທຸລະກິດຈາກສະມາຄົມການຄ້າຈີນ ປະຈຳລາວ ສາຂາແຂວງຝູຈ້ຽນ ແລະ ແຂກຖືກເຊີນ ເຂົ້າຮ່ວມ.
ທ່ານ ຈ້າວ ໂຊ ຊີ້ ຕາງໜ້າສະພາການຄ້າຈີນສາຂາແຂວງຝູຈ້ຽນ ໄດ້ກ່າວວ່າ: ຜ່ານມານັກທຸລະກິດຂອງແຂວງຝູຈ້ຽນ ສປ ຈີນ ໄດ້ເຂົ້າມາລົງທຶນໃນລາວຫຼາຍຂຶ້ນ ເປັນຕົ້ນແມ່ນ ກະສິກຳ ການຄ້າ ແລະ ທຸລະກິດອື່ນໆ ຈຶ່ງເປັນທີ່ມາໃຫ້ພວກເຮົາໄດ້ມີການເຕົ້າໂຮມກັນເປັນກຸ່ມກ້ອນ ສ້າງຕັ້ງສະມາຄົມການຄ້າລາວ-ຈີນຝູຈ້ຽນຂຶ້ນ ເພື່ອແລກປ່ຽນບົດຮຽນທາງທຸລະກິດໃຫ້ຄວາມຮູ້ຊ່ວຍເຫຼືອເຊິ່ງກັນ ແລະ ກັນມາ ເຖິງວັນທີ 25 ກຸມພາ 2015 ໂດຍໄດ້ຮັບການສະໜັບສະໜູນຈາກລັດຖະບານລາວ ສະມາຄົມດັ່ງກ່າວ ຈຶ່ງໄດ້ສະເໜີສ້າງຕັ້ງຫ້ອງການຂຶ້ນ ເພື່ອເປັນເວທີແລກປ່ຽນການຄ້າໃຫ້ແກ່ນັກທຸລະກິດແຂວງຝູຈ້ຽນໃນລາວ ສ້າງໃຫ້ມີການສົ່ງເສີມການຄ້າແບບໃໝ່ ທີ່ໄດ້ຮັບການສະໜັບສະໜູນຈາກລັດຖະບານ ກໍ່ຄືແຂວງບໍ່ແກ້ວ ແລະ ເຂດເສດຖະກິດພິເສດສາມຫຼ່ຽມຄຳ ແລະ ມາເຖິງວັນທີ 14 ກັນຍາ 2015 ສະມາຄົມໄດ້ມີການແຕ່ງຕັ້ງໜ້າທີ່ຮັບຜິດຊອບໃຫ້ແຕ່ລະກຸ່ມໃນ 6 ແຂວງພາກເໜືອຄື: ແຂວງບໍ່ແກ້ວ ຫຼວງນ້ຳທາ ຫຼວງພະບາງ ອຸດົມໄຊ ຜົ້ງສາລີ ແລະ ແຂວງວຽງຈັນ ແຂວງລະ 10 ທ່ານ ແລະ ມີຫ້ອງການປະສານງານຂອງສະມາຄົມການຄ້າຈີນ ປະຈຳລາວ ສາຂາແຂວງຝູຈ້ຽນ ຢູ່ເຂດເສດຖະກິດພິເສດສາມຫຼ່ຽມຄຳ ແລະ ຕອນທ້າຍກອງປະຊຸມ ຍັງໄດ້ປ່ອນບັດເລືອກຕັ້ງເອົາຄະນະບໍລິຫານງານ ຈຳນວນ 4 ທ່ານ ຕື່ມອີກ.
ແຫ່ລງຂ່າວ
