ໃນຕອນເຊົ້າວັນທີ 20 ພະຈິກ 2015 ທີ່ ອະນຸສອນສະຖານ ທ່ານ ປະທານສຸພານຸວົງ ບ້ານໂພນສະອາດ ເມືອງໄຊເຊດຖາ ນະຄອນຫຼວງວຽງຈັນ ທ່ານ ອາຈານ ນາງ ພູກ້ຽງ ກິນນະວົງ ຮອງອໍານວຍການ ໂຮງຮຽນປະຖົມສົມບູນໜອງບົວທອງໃຕ້ ເມືອງສີໂຄດຕະບອງ ນະຄອນຫຼວງວຽງຈັນ ແລະ ຄູ ອາຈານ ໄດ້ນໍາພາບັນດານ້ອງນ້ອຍນັກຮຽນ ຈໍານວນ 50 ນ້ອງ ທີ່ມີຄວາມກ້າວໜ້າດ້ານການຮຽນ ມີລະບຽບວິໄນ ແລະ ຄູນສົມບັດດີ ຄົບຕາມມາດຖານ ເງື່ອນໄຂ ໃນໂອກາດໄດ້ຮັບການຄັດເລືອກ ເຂົ້າເປັນສະມາຊິກໃໝ່ກອງເຍົາວະຊົນ 2 ທັນວາ ເຂົ້າຢ້ຽມຊົມ ແລະ ຮຽນຮູ້ມູນເຊື້ອປະຫວັດສາດ ຂອງອະດີດຜູ້ນໍາພັກ-ລັດ ໂດຍສະເພາະມູນເຊື້ອ ການຕໍ່ສູ້ອັນພິລະອາດຫານ ແລະ ແບບແຜນວິທີເຮັດວຽກຂອງອະດີດປະທານສຸພານຸວົງ.
ທ່ານຮອງອໍານວຍການ ໂຮງຮຽນປະຖົມສົມບູນໜອງບົວທອງໃຕ້ ໄດ້ໃຫ້ຮູ້ວ່າ ການນໍາພາບັນດານ້ອງໆນັກຮຽນເຂົ້າຢ້ຽມຊົມ ອະນຸສອນສະຖານ ທ່ານ ປະທານສຸພານຸວົງ ໃນຄັ້ງນີ້ ແມ່ນເພື່ອເປັນການສ້າງຂະບວນການ ຄໍານັບຮັບຕ້ອນວັນສໍາຄັນຕ່າງໆຂອງຊາດ ກໍຄື ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີ ທັງເປັນການສະແດງຄວາມຮູ້ບຸນຄຸນ ຜູ້ນໍາພັກ-ລັດ ແລະ ເພື່ອປຸກຈິດສໍານຶກໃຫ້ເຍົາວະຊົນ ອະນຸຊົນຄົນຮຸ່ນຫຼັງ ມີນໍ້າໃຈຮັກຊາດ ຮັກບ້ານເກີດເມືອງນອນຂອງຕົນ ແລະ ຮຽນຮູ້ແບບແຜນການດໍາລົງຊີວິດ ມູນເຊື້ອການຕໍ່ສູ້ອັນພິລະອາດຫານ ສະຫຼາດສ່ອງໃສ ຂອງອະດີດການນໍາພັກ-ລັດ.
ແຫລ່ງຂ່າວ: ວຽງຈັນວັນນີ້