ກອງປະຊຸມຄະນະບໍລິຫານໂຄງການເຊື່ອມໂຍງເຂົ້າສາກົນ ດ້ານການຄ້າ (EIF) ໄດ້ຈັດຂຶ້ນວັນທີ 18 ພະຈິກ 2015 ທີ່ໂຮງແຮມລາວພລາຊາ ນະຄອນຫຼວງວຽງຈັນ ເປັນປະທານຂອງທ່ານ ສົມຈິດ ອິນທະມິດ ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ມີບັນດາປະເທດທີ່ໃຫ້ທຶນ 20 ກວ່າປະເທດ ແລະ ຜູ້ສະໜັບສະໜູນແກ່ 51 ປະເທດໃນໂລກເຂົ້າຮ່ວມ.
ທ່ານ ສົມຈິດ ອິນທະມິດ ກ່າວສະແດງຄວາມຂອບໃຈຕໍ່ EIF ທີ່ໄດ້ໃຫ້ການສະໜັບສະໜູນທາງດ້ານວິຊາການ ແລະ ທຶນຮອນເຂົ້າໃນການພັດທະນາ ແລະ ຈັດຕັ້ງປະຕິບັດບັນດາແຜນຍຸດທະສາດຂອງລາວ ແຕ່ປີ 2004 ພ້ອມກັນນີ້ ກໍ່ຍັງຈະສືບຕໍ່ສະໜັບສະໜູນແກ່ບັນດາກິດຈະກຳ ທີ່ໄດ້ກຳນົດໄວ້ໃນໄລຍະທີສອງ ເຊິ່ງຮຽກຮ້ອງໃຫ້ມີການປ່ຽນແປງແນວທາງໃນການບໍລິຫານໂຄງການ ເພື່ອສະແດງໃຫ້ເຫັນເຖິງປະສົບການ ແລະ ຄວາມສາມາດຂອງປະເທດດ້ອຍພັດທະນາກັບການຂະຫຍາຍຂອບບຸລິມະສິດ ສຳລັບໂຄງການໄລຍະທີສອງ ແລະ ບັນດາແນວຄິດເພື່ອສົ່ງເສີມຄວາມເປັນເຈົ້າການ ແລະ ເປັນຜູ້ນຳໃນການຈັດຕັ້ງປະຕິບັດໂຄງການ.
ທ່ານນາງ Yvette Stenvens ເອກອັກຄະລັດຖະທູດ ແລະ ຜູ້ຕາງໜ້າຖາວອນຂອງປະເທດຊີລາລີໂອນ ປະຈຳອົງການສະຫະປະຊາຊາດ ແລະ ອົງການການຄ້າໂລກ ທີ່ເຈນີວາ ທັງເປັນປະທານ EIF ກ່າວວ່າ: ນີ້ແມ່ນຂັ້ນຕອນສຸດທ້າຍຂອງ EIF ໄລຍະທີໜຶ່ງແລ້ວ ແລະ ນີ້ຈະເປັນໝາກຜົນສຳຄັນທີ່ຈະກ້າວຕໍ່ໃສ່ໄລຍະທີສອງ ເຊິ່ງຈະເລີ່ມຈັດຕັ້ງປະຕິບັດແຕ່ວັນທີ 1 ມັງກອນ 2016 ເປັນຕົ້ນໄປ ປະກອບມີ: ການແຕ່ງຕັ້ງຜູ້ຈັດການກອງທຶນຫຼາຍຝ່າຍສຳລັບ EIF ໄລຍະສອງ ແລະ ຮັບຮອງເອົາບັນດາໜ້າວຽກຕ່າງໆ ເຊັ່ນ: ພາລະບົດບາດ ແລະ ໜ້າທີ່ຂອງການບໍລິຫານ ການຄຸ້ມຄອງ ຕາຕະລາງແຜນງານ ການຄຸ້ມຄອງຄວາມສ່ຽງສະບັບປັບປຸງບັນດາແຜນງານໃໝ່ ແນວຄວາມຄິດທີ່ຄຸ້ມຄ່າທາງດ້ານການເງິນ ແລະ ຮູບແບບໃໝ່ຂອງບັນດາເອກະສານສຳລັບໄລຍະທີສອງ (2016-2022).
ກອງປະຊຸມຄະນະບໍລິຫານ EIF ຈັດຂຶ້ນ 3 ຄັ້ງຕໍ່ປີ ເລີ່ມແຕ່ປີ 2014 ເປັນຕົ້ນມາ ຄະນະດັ່ງກ່າວໄດ້ມີການຕົກລົງໃຫ້ມີການຈັດກອງປະຊຸມ ໂດຍແມ່ນປະເທດດ້ອຍພັດທະນາເປັນເຈົ້າພາບ ເຊິ່ງ ສປປ ລາວ ເປັນປະເທດທີ 2 ທີ່ຈັດກອງປະຊຸມດັ່ງກ່າວຕໍ່ຈາກປະເທດກຳເບຍ (Gambia).
ແຫ່ລງຂ່າວ
