ວັນ​ທີ 18 ພະຈິກ 2015 ທີ່ໂຮງແຮມ​ແລນ​ມາກ ນະຄອນຫຼວງ​ວຽງ​ຈັນ ໄດ້​ມີ​ພິທີ​ລົງ​ນາມເຊັນ​ສັນຍາ​ ໂຄງການ​ກໍ່ສ້າງເຂື່ອນ​ໄຟຟ້າ​ນ້ຳບີ ລະຫວ່າງ​ທ່ານ ​ດຣ. ບຸນ​ສະຫຼອງ ສຸດທິ​ດາ​ຣາ ປະທານ​ສະພາ​ບໍລິຫານ​ບໍລິສັດ ພາວ​ເວີ ຈຳກັດ ແລະ ທ່ານ ຈາງ ຈ້ຽນ ເຢວ້ ປະທານ ແລະ ຜູ້​ອຳນວຍ​ການ​ໃຫຍ່​ບໍລິສັດ ພາວ​ເວີ ໄຊ​ນາ ເສີນ​ຕູ່ ເອັນ​ຈີ​ເນຍ​ຣິງ ຄໍເປີ​ເຣ​ຊັນ ຈຳກັດ ໂດຍ​ເຂົ້າ​ຮ່ວມເປັນ​ສັກຂີ​ພິຍານ​ຂອງ​ທ່ານ ​ດຣ. ຄຳ​ມະນີ ອິນ​ທິ​ລາດ ລັດ​ຖະ​ມົນຕີ​ວ່າການ​ກະຊວງ​ພະລັງງານ ແລະ ບໍ່​ແຮ່ ທ່ານ ເຫຼັກໄຫຼ ສີວິໄລ ຮອງ​ເຈົ້າແຂວງ​ເຊ​ກອງ ພ້ອມດ້ວຍ​ພາກສ່ວນ​ທີ່​ກ່ຽວຂ້ອງ​ທັງສອງ​ຝ່າຍ.

ໂຄງການ​ກໍ່ສ້າງ​ເຂື່ອນ​ໄຟຟ້າ​ນ້ຳບີ ເປັນ​ເຂື່ອນ​ໄຟຟ້າ​ນ້ຳຕົກ ທີ່​ມີ​ທີ່​ຕັ້ງ​ຢູ່​ເມືອງ​ດາກ​ຈຶງ ແຂວງເຊ​ກອງ ຄາດ​ວ່າ​ຈະ​ໃຊ້​ເວລາການ​ກໍ່ສ້າງ​ປະມານ 5 ປີ ສຳເລັດລວມ​ມູນ​ຄ່າ​ປະມານ 272 ລ້ານໂດ​ລາ​ສະຫະລັດ ຫຼື ປະມານ 2.176 ຕື້​ກີບ ພາຍຫຼັງ​ການ​ກໍ່ສ້າງ​ສຳເລັດ​ຈະ​ມີ​ກຳລັງ​ຕິດ​ຕັ້ງ 135 ເມ​ກາ​ວັດ ເຊິ່ງ​ຈະ​ສາມາດຜະລິດ​ພະລັງງານ​ໄຟຟ້າ​ໄດ້​ເຖິງ 680 ກິ​ໂລ​ວັດ​ໂມງ​ຕໍ່​ປີ ສະໜອງໃຫ້​ລັດ​ວິ​ສາ​ຫະ​ກິດ​ໄຟຟ້າ​ລາວ ເພື່ອ​ຈຳໜ່າຍ​ພາຍ​ໃນ​ປະເທດ.

ບໍລິສັດ ນ້ຳບີ ພາວ​ເວີ ຈຳກັດ ຖືກ​ສ້າງຕັ້ງ​ຂຶ້ນ​ພາຍ​ໃຕ້​ການ​ຮ່ວມ​ທຶນ​ລະຫວ່າງ ບໍລິສັດ ຜະລິດ-ໄຟຟ້າ​ລາວ ມະຫາຊົນ ຖື​ຮຸ້ນ 80% ແລະ ບໍລິສັດ ຈັນ​ຖາວອນກໍ່ສ້າງ ແລະ ສ້ອມແປງ​ຂົວ​ທາງ ຈຳກັດ 20% ເພື່ອ​ສຳ​ປະທານເຂື່ອນ​ດັ່ງກ່າວ ໃນ​ຮູບ​ແບບ​ການກໍ່ສ້າງ​ເປັນ​ເຈົ້າ​ຂອງ ແລະ ຄຸ້ມຄອງ​ດຳເນີນ​ການ (BOT) ພາຍຫຼັງ​ໝົດ​ອາຍຸ​ສຳ​ປະທານ ​ກໍ່​ຈະມອບ​ໂອນ​ໃຫ້​ກັບ​ລັດຖະບານ.

ແຫລ່ງຂ່າວ: