ຍີ່​ປຸ່ນ​ກຽມ​ຈັດ​ຕັ້ງ​ສຳ​ນັກ​ງານ​ສົ່ງ​ເສີມ​ການ​ຄ້າ​ໃນ​ລາວ ​ໃນ​ປີ​ໜ້າ 2014 ເພື່ອ​ສະໜັບສະໜູນ​ໃຫ້​ບໍລິສັດ​ຈາກ​ຕ່າງແດນ​​ເຂົ້າ​ມາ​ລົງ​ທຶນ​ໃນລາວ ຫຼື​ປະເທດ​ລຸ່ມ​​ແມ່ນ້ຳ​ຂອງ​ແຫ່ງ​ນີ້.

ຂ່າວ​ຈາກໜັງສື​ພິມ ວຽງ​ຈັນ​ໄທມ໌​ ລາຍ​ງານ​ວ່າ ອົງ​ການ​ສົ່ງ​ເສີມ​ການ​ຄ້າ​ຕ່າງ​ປະເທດ​ຂອງ​ຍີ່​ປຸ່ນ ຫຼື ເຈ​ໂຊ ຖະ​ແຫຼງ​ກຽມ​ເປີດ​ສຳ​ນັກ​ງານ​ທີ່​ນະຄອນ​ຫຼວງວຽງ​ຈັນ​ ​ເຊິ່ງ​ເປັນເມືອງ​ຫຼວງ​ຂອງ​ ສາທາລະນະ​ລັດ​ ປະ​ຊາ​ທິປ​ະໄຕ​ປະຊາຊົນ​ລາວ ເນື່ອງ​ຈາກ​ປະເທດລາວ​ກຳ​ລັງຈະ​ພັດທະນາ​​ກາຍ​ເປັນ​ແຫຼ່ງ​ດຶງ​ດູດ​ເມັດ​ເງິນ​ລົງ​ທຶນ​ທີ່​ໜ້າ​ສົນ​ໃຈ ຜົນ​ຈາກ​ການ​ເມືອງ​ມີ​ສະຖຽນລະພາບ ສະຫງົບ​ສຸກ​ບໍ​ມີ​ຄວາມ​ວຸ້ນວານ ຄ່າ​ຈ້າງ​​ ແລະ ຄ່າ​ຈ້າງ​​ແຮງງານ​ຢູ່ໃນ​ລະ​ດັບ​ຕ່ຳ ແລະ​ການ​ເຕີບໂຕ​ຂອງ​ເສດຖະກິດກໍາ​ລັງ​ລຽງ​ໄຫຼ

​ເຖິ່ງ​ແມ່ນ​ວ່າຈະ​ມີ​ລາຍ​ງານ​ການສຶກສາ​ຂອງທະ​ນາ​ຄານ​ພັດທະນາ​ອີ​ຊີ ​ຫຼື ​ເອ​ດີ​ບີ​ຈະ​ລະ​ບຸ​ວ່າ ສປປລາວ​ ຍັງ​ຈັດ​ຢູ່ໃນ​ກຸ່ມ​ປະເທດທີ່ ​ພັດທະນາ​ນ້ອຍ​ທີ່ສຸດ​ໃນ​ໂລກ ແຕ່​ເສດຖະກິດ​ກໍ​ຂະຫຍາຍ​ຕົວ​ໄດ້​ໃນ​ອັດຕາ 8% ລວມປີ​ປີ 2011 ແລະ 2012 ທີ່​ຜ່ານມາ.

ປະຈຸບັນ ມີ​ບໍລິສັດ​ຍີ່​ປຸ່ນ​ປະ​ມານ 60 ແຫ່ງ ທີ່​ເຂົ້າມາ​ລົງ​ທຶນ​ທີ່ ສປປ​ລາວ ເມື່ອ​ປຽບ​ກັບ​ເມື່ອ​ປີ 2009 ມີ​ພຽງ 27 ແຫ່ງ​ເທົ່າ​ນັ້ນ ຂະນະ​ທີ່​ຄວາ​ມ​ເຄື່ອນ​ໄຫວ​ດ້ານ​ການ​ລົງ​ທຶນ​ຈາກ​ເອກະ​ຊົນ​ຂອງ​ປະເທດ​ເສດຖະກິດ​ບໍລິສັດ​ທີ່​​ໃຫຍ່​​ຕິດອັນ​ດັບ 3 ຂອງ​ໂລກ​ນັ້ນ ໄດ້​ແກ່​ການ​ລົງ​ທຶນ​ຂອງ ນິ​ຄອນ ຄຣອບ​ປໍ​ເລ​ຊັ່ນ ແລະ ​ໂຕ​ໂຍ​ຕ້າມໍ​ເຕີ ຄຣອບ​ປໍ​ເລ​ຊັ່ນ ​ເຊິ່ງ​ກຳ​ລັງ​ສ້າງ​ໂຮງ​ງານ​ຜະລິດ ​ຊິ້ນ​ສ່ວນ ເພື່ອ​ປ້ອນ​ໂຮງ​ງານ​ປະກອບ​ກ້ອງ​ຖ່າຍ​ຮູບ ​ແລະ ​ລົດ​ ຂອງ​ທຸລະກິດ​ທັງ 2 ລາຍ ທີ່​ຕັ້ງ​ຢູ່ໃນ​ປະເທດ​ໄທ.

ຂໍ້ມູນຈາກ: ວຽງຈັນໄທມ໌ ແລະ ບາງກອກບິວຊີເນັດ.