ທ່ານ ຄຳໝັ້ນ ສຸນວິເລີດ ເຈົ້າແຂວງບໍ່ແກ້ວ ໄດ້ໃຫ້ສຳພາດຕໍ່ນັກຂ່າວ ໃນໂອກາດກະກຽມການເປີດນຳໃຊ້ຂົວມິດຕະພາບ 4 ລາວ-ໄທ ຫ້ວຍຊາຍ-ຊຽງຂອງ ໃນວັນທີ 10 ທັນວາ 2013 ນີ້ ທີ່ຫ້ອງວ່າການແຂວງບໍ່ແກ້ວວ່າ: ສະພາບການກໍ່ສ້າງຂົວມິດຕະພາບ 4 ຫ້ວຍຊາຍ-ຊຽງຂອງ ມາຮອດປັດຈຸບັນ ການກໍ່ສ້າງຂົວອາຄານດ່ານ ແລະ ສິ່ງອຳນວຍຄວາມສະດວກຕ່າງໆແມ່ນສຳເລັດ 100%.
ພາຍຫຼັງທີ່ຂົວແຫ່ງນີ້ ໄດ້ເປີດນຳໃຊ້ຢ່າງເປັນທາງການແລ້ວ ມັນຈະສາມາດສ້າງເງື່ອນໄຂທີ່ເອື້ອອຳນວຍຄວາມສະດວກຫຼາຍໆຢ່າງໃຫ້ແຂວງ ເປັນຕົ້ນແມ່ນສ້າງສະພາບແວດລ້ອມທີ່ດີ ເພື່ອດຶງດູດແຫຼ່ງທຶນ ແລະ ນັກລົງທຶນ ມາລົງທຶນຢູ່ແຂວງບໍ່ແກ້ວ ໃຫ້ນັບມື້ນັບຫຼາຍຂຶ້ນ ເພື່ອໃຫ້ແຂວງມີການພັດທະນາໄວຂຶ້ນ ແລະ ມີເງື່ອນໄຂສ້າງພື້ນຖານວັດຖຸເຕັກນິກໃຫ້ມີຄວາມເຂັ້ມແຂງ ສາມາດແຂ່ງຂັນໃນຕະຫຼາດພາກພື້ນໄດ້ ສ້າງວຽກເຮັດງານທຳໃຫ້ສັງຄົມ ແລະ ສ້າງຖານອາກອນລາຍຮັບໃຫ້ຂະຫຍາຍກວ້າງອອກ ພ້ອມນີ້ຍັງເປັນການສົ່ງເສີມການຜະລິດເປັນສິນຄ້າຂອງປະຊາຊົນ ໂດຍສະເພາະໃນການປູກຝັງ-ລ້ຽງສັດທີ່ປອດສານເຄມີ ແລະ ກະສິກຳສະອາດ ເພື່ອບໍລິໂພກພາຍໃນ ແລະ ສົ່ງອອກ ສົ່ງເສີມການຜະລິດສິນຄ້າ ບໍລິການຕາມຊາຍແດນ ຕາມແລວທາງເສດຖະກິດເໜືອ-ໃຕ້ ສົ່ງເສີມການຜະລິດທີ່ປະຊາຊົນມີມູນເຊື້ອ ແລະ ມີທ່າແຮງ ເປັນຕົ້ນແມ່ນ ເຄື່ອງທີ່ລະນຶກເພື່ອບໍລິການນັກທ່ອງທ່ຽວ ຈະສ້າງຄວາມສາມາດຂອງວິສາຫະກິດຂະໜາດກາງ ແລະ ຂະໜາດນ້ອຍໃຫ້ເຂົ້າເຖິງຕະຫຼາດຫຼາຍຂຶ້ນກວ່າເກົ່າ ເປັນການສົ່ງເສີມການທ່ອງທ່ຽວຕາມຊາຍແດນ ບໍລິການນັກທ່ອງທ່ຽວຜ່ານ ແລະ ພັດທະນາການທ່ອງທ່ຽວ ເຊື່ອມຕໍ່ກັບປະເທດໃກ້ຄຽງ ພັດທະນາຈຸດແວ່ທີ່ສາມາດດຶງດູດຜູ້ຄົນໃຫ້ທ່ຽວຊົມທຳມະຊາດ ວັດທະນາທຳຕາມແລວທາງ ພ້ອມກັນນັ້ນ ກໍໄດ້ປັບປຸງເຮືອນພັກ ໂຮງແຮມ ຮ້ານອາຫານ ຮ້ານບັນເທີງຕ່າງໆໃຫ້ໄດ້ມາດຕະຖານ ສຳລັບພະນັກງານ ຫຼື ບັນດາໜ່ວຍງານຂອງລັດ ໃນການບໍລິການດ່ານສາກົນ 4 ກໍໄດ້ຮັບການຍົກລະດັບຄວາມຮູ້ຄວາມສາມາດ ແລະ ປະສົບການໃຫ້ນັບມື້ນັບທັນສະໄໝ ນຳໃຊ້ເຕັກໂນໂລຊີໃໝ່ ເພື່ອເພີ່ມປະສິດທິພາບຂອງງານໃຫ້ສູງຂຶ້ນ ທັງສາມາດເຊື່ອມໂຍງກັບສາກົນໄດ້ເປັນຢ່າງດີ ແລະ ພັດທະນາດ້ານການບໍລິການທາງຜ່ານໃຫ້ມີຄຸນນະພາບດີ.
ໄປຄຽງຄູ່ກັນນັ້ນ ກໍໄດ້ເອົາໃຈໃສ່ພັດທະນາລະບົບການຂົນສົ່ງສິນຄ້າ ການຂົນສົ່ງໂດຍສານຜ່ານແດນລະຫວ່າງປະເທດ ແລະ ຂົງເຂດອະນຸພາກພື້ນແມ່ນ້ຳຂອງ ໃຫ້ມີປະສິດທິພາບສູງຂຶ້ນກວ່າເກົ່າ ຫຼຸດຜ່ອນເວລາຂົນສົ່ງ ແລະ ຫຼຸດຜ່ອນຕົ້ນທຶນຂອງການຂົນສົ່ງ ຫຼຸດຜ່ອນຂັ້ນຕອນລະບຽບການຕ່າງໆໃນການຜ່ານແດນ ແລະ ບັນດາຄວາມສ່ຽງຕ່າງໆ.