ຕະຫຼອດ​ໄລຍະ 40 ປີ ແຫ່ງການ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ ວຽກງານ​ຄົມມະນາຄົມ​ຂົນສົ່ງ​ ໄດ້​ສືບຕໍ່​ຂະຫຍາຍຕົວ​ຢ່າງ​ຕໍ່​ເນື່ອງ ປັດ​ຈຸບັນ ມີ​ເສັ້ນທາງ​ຍາວ​ທັງ​ໝົດ 51.597,64 ກິໂລແມັດ ຂະນະທີ່​ການ​ຂົນສົ່ງ​ທາງ​ອາກາດ ​ກໍ່​ໄດ້ຮັບ​ການ​ປັບປຸງ​ໃຫ້​ນັບ​ມື້​ດີ​ຂຶ້ນ ສາມາດ​ສ້າງ​ເງື່ອນໄຂ​ເອື້ອ​ອຳນວຍ​ໃຫ້​ກັບ​ການ​ຂົນສົ່ງ​ທັງ​ພາຍໃນ ແລະ ຕ່າງປະເທດ.

ພາຍຫຼັງ​ທີ່​ປະເທດ​ຊາດ​ໄດ້ຮັບ​ການ​ປົດ​ປ່ອຍ ໃນ​ວັນ​ທີ 2 ທັນວາ 1975 ເປັນຕົ້ນ​ມາ ພັກ-ລັດຖະ​ບານ ໄດ້​ຖື​ເອົາ​ວຽກ​ງານ​ຄົມມະ​ນາ​ຄົມ ​ເປັນ​ປາຍ​ແຫຼມ​ໃຫ້​ແກ່ການ​ພັດທະນາ​ເສດຖະກິດ-ສັງຄົມ​ຂອງ​ຊາດ ເຮັດ​ໃຫ້​ເສັ້ນທາງທົ່ວ​ປະເທດ​ໄດ້​ຮັບ​ການ​ປັບປຸງ ແລະ ຂະຫຍາຍຕົວ​ດີ​ຂຶ້ນ​ພໍ​ສົມຄວນ ເຊິ່ງ​ມີ​ບັນດາ​ເສັ້ນທາງ​ທີ່ເຊື່ອມ​ຕໍ່​ກັບ​ອະນຸ​ພາກ​ພື້ນ ເສັ້ນທາງ​ແລວ​ເສດຖະກິດ​ຕາເວັນອອກ-ຕາເວັນຕົກ ແລະ ເໜືອ-ໃຕ້ ພ້ອມ​ນັ້ນ ຍັງ​ມີ​ເສັ້ນທາງ​ໄປຮອດ​ເຂດ​ຈຸດ​ສຸມທຸກ​ແຂວງ ເມືອງ ບ້ານ ແລະ ກຸ່ມ​ບ້ານ ທຽບໃສ່​ປີ 1976 ເສັ້ນທາງ​ທົ່ວ​ປະເທດ ມີ​ຄວາມ​ຍາວ​ພຽງ​ແຕ່ 11.504 ກິໂລແມັດ ປັດຈຸບັນ ນອກຈາກ ເສັ້ນທາງ​ຈະ​ໄດ້​ຮັບ​ການ​ພັດ​ທະນາ ແລະ ປັບປຸງ​ໃຫ້​ດີ​ຂຶ້ນ​ແລ້ວຍັງ​ປະກອບ​ມີ​ຂົວ ຈຳນວນ 2.016 ແຫ່ງ ໃນ​ນັ້ນ ຂົວ​ຂ້າມ​ນ້ຳຂອງ​ລະຫວ່າງ​ປະເທດ 5 ແຫ່ງ.

ນອກ​ນັ້ນ ຍັງ​ໄດ້​ເປີດ​ນຳ​ໃຊ້ລົດໄຟ​ລະຫວ່າງ​ສະຖານີ​ທ່າ​ນາແລ້ງ ນະຄອນຫຼວງ​ວຽງ​ຈັນ ກັບສະຖານີ​ໜອງ​ຄາຍ ປະເທດ​ໄທ ແລະ ພວມ​ສືບຕໍ່​ເຈລະຈາ​ຄວາມຄືບ​ໜ້າ ໂຄງການ​ກໍ່ສ້າງ​ເສັ້ນທາງ​ລົດໄຟ​ຄວາມ​ໄວ​ສູງ ແຕ່​ບໍ່ເຕັນ (ຊາຍ​ແດນ​ລາວ-ຈີນ) ມາຫານະຄອນຫຼວງ​ວຽງ​ຈັນ ທີ່​ຈະໄດ້​ລົງມື​ກໍ່ສ້າງ​ໃນ​ບໍ່​ຊ້າ ແລະ ຄາດ​ວ່າ​ຈະ​ສຳເລັດ​ພາຍ​ໃນ 5 ປີ​ຂ້າງ​ໜ້າ​ນີ້.

ສ່ວນ​ການ​ຂົນສົ່ງ​ທາງ​ອາກາດ​ ກໍ່​ມີ​ບາດກ້າວ​ຂະຫຍາຍຕົວເຊັ່ນ​ດຽວ​ກັນ ໂດຍ​ໄດ້​ປັບປຸງ​ສະໜາມ​ບິນ​ໃຫ້​ມີ​ຄວາມ​ທັນ​ສະໄໝ ເຮັດ​ໃຫ້​ສະໜາມ​ບິນ​ວັດ​ໄຕ ເປັນສະໜາມ​ບິນ​ແຫ່ງ​ທຳ​ອິດ​ໃນ​ປະຫວັດ​ສາດ​ຂອງ​ຊາດ​ລາວ ທີ່​ສາມາດ​ຮອງ​ຮັບ​ເຮືອບິນ​ໂບ​ອິງ 747 ລົງ​ຈອດ​ໄດ້ ພ້ອມ​ນັ້ນ ຍັງ​ໄດ້​ຍົກລະດັບ​ສະໜາມ​ບິນ​ຫຼວງ​ພະ​ບາງ ປາກ​ເຊ ໃຫ້​ເປັນ​ສະໜາມ​ບິນ ພາກ​ພື້ນ ສ່ວນ​ບັນດາ​ສະໜາມບິນ​ຂອງ​ແຂວງ ​ກໍ່​ໄດ້​ຮັບ​ການ​ກໍ່ສ້າງ ແລະ ປັບປຸງ​ໃຫ້​ດີ​ຂຶ້ນ ສາມາດ​ຮອງ​ຮັບ​ເອົາ​ເຮືອບິນ​ຂະໜາດ​ນ້ອຍ ຂະໜາດ​ກາງ ລົງຈອດ​ໄດ້ ແລະ ຍັງ​ໄດ້​ເອົາໃຈໃສ່ປັບປຸງ​ລະບົບ​ການ​ຄຸ້ມ​ຄອງການບິນ​ຜ່ານ ສາມາດ​ສ້າງ​ລາຍ​ຮັບເພີ່ມ​ຂຶ້ນ​ໃນ​ແຕ່​ລະ​ປີ ມາ​ຮອດ​ປີ 2013 ສາຍ​ການບິນ​ພາຍ​ໃນ​ປະເທດ​ມີ​ການ​ເຕີບ​ໃຫຍ່​ສະເລ່ຍ 2% ສາຍ​ການບິນ​ຕ່າງປະເທດ ປະມານ 6% ແລະ ສະເລ່ຍ​ເຮືອບິນ​ຜ່ານ​ນ່ານ​ຟ້າ​ເພີ່ມ​ຂຶ້ນ 5% ນີ້ແມ່ນ​ຜົນສຳເລັດ​ຂອງ​ການ​ນຳພາຂອງ​ພັກ​ເຮົາ ​ໃນ​ການ​ພັດທະນາພື້ນຖານ​ໂຄງ​ລ່າງ​ດ້ານ​ຄົມ​ມະນາ​ຄົມ ແລະ ການ​ຂົນສົ່ງ​ຢູ່​ປະເທດ ໃນ​ໄລຍະ 40 ປີຜ່ານມາ ພວກ​ເຮົາ​ປະຊາຊົນ​ລາວ​ບັນດາເຜົ່າ ມີ​ຄວາມ​ເອກອ້າງ​ທະ​ນົງ​ໃຈຕໍ່​ບຸນຄຸນ​ຂອງ​ພັກ-ລັດ ທີ່​ຍາມໃດ​ກໍ່​ເປັນ​ຫ່ວງ​ເປັນ​ໃຍ​ຕໍ່​ປະເທດຊາດ ແລະ ຊາຕາກຳ​ຂອງ​ປະຊາ​ຊົນ​ລາວ​ບັນດາເຜົ່າ ທີ່​ຢາກໃຫ້​ປະຊາຊົນ​ຫຼຸດ​ພົ້ນ​ອອກ​ຈາກຄວາມທຸກ​ຍາກ.

ແຫ່ລງຂ່າວ