ໃນລະຫວ່າງວັນທີ 9-13 ທັນວາ 2013 ທີ່ມະຫາວິທະຍາໄລວິທະຍາສາດສຸຂະພາບ ໄດ້ຈັດເຝິກອົບຮົມກ່ຽວກັບຄວາມປອດໄພຂອງຄົນເຈັບ ສະໜັບສະໜູນໂດຍອົງການອະນາໄມໂລກ ໂດຍມີທ່ານ ດຣ. ພູທອນ ວັງກອນວິໄລ ຮອງອະທິການບໍດີມະຫາວິທະຍາໄລວິທະຍາສາດສຸຂະພາບ ທ່ານ ດຣ. ເກດສົມສຸກ ບຸບຜາວັນ ຫົວໜ້າສູນພັດທະນາການສຶກສາ ທ່ານຜູ້ຕາງໜ້າຈາກອົງການອະນາໄມໂລກ ພ້ອມດ້ວຍຄູ-ອາຈານ ຈາກ ມວສ ແລະ ໂຮງໝໍສູນກາງເຂົ້າຮ່ວມ 46 ທ່ານ.
ຄວາມປອດໄພຂອງຄົນເຈັບ ເປັນບັນຫາສຳຄັນທີ່ບັນດາປະເທດ ໄດ້ເພີ່ມທະວີຍົກສູງຄວາມສຳຄັນຂອງການປັບປຸງຄວາມປອດໄພຂອງຄົນເຈັບ ໃນປີ 2002 ບັນດາປະເທດສະມາຊິກ ໄດ້ຕົກລົງຮ່ວມກັບອົງການອະນາໄມໂລກ ໃນການແກ້ໄຂຄວາມປອດໄພຂອງຄົນເຈັບ ແລະ ຮຽກຮ້ອງໃຫ້ເອົາໃຈໃສ່ກ່ຽວກັບຄວາມປອດໄພຂອງຄົນເຈັບ.
ສປປ ລາວ ເປັນປະເທດໜຶ່ງທີ່ໄດ້ເອົາໃຈໃສ່ ກ່ຽວກັບຄວາມປອດໄພຂອງຄົນເຈັບ ຈຶ່ງໄດ້ຈັດການເຝິກອົບຮົມດັ່ງກ່າວຂຶ້ນ ເພື່ອແນໃສ່ໃຫ້ຜູ້ເຂົ້າຮ່ວມຮັບຮູ້ ແລະ ເຂົ້າໃຈກ່ຽວກັບຄວາມປອດໄພຂອງຄົນເຈັບຢ່າງຖືກຕ້ອງ ແລະ ເລິກເຊິ່ງ ນຳໄປສືບຕໍ່ຜັນຂະຫຍາຍເຂົ້າເປັນຫຼັກສູດການຮຽນ-ການສອນໃນຂະແໜງການຕ່າງໆນັ້ນ ກໍເພື່ອສ້າງຄວາມເຂັ້ມແຂງໃນການຄຸ້ມຄອງຄົນເຈັບ ໃຫ້ມີຄວາມປອດໄພ.
ໃນການເຝິກອົບຮົມຄັ້ງນີ້ ຜູ້ເຂົ້າຮ່ວມກໍໄດ້ແລກປ່ຽນຖອດຖອນບົດຮຽນ ໃນການເບິ່ງແຍງຄົນເຈັບໃນກໍລະນີຕ່າງໆ ເພື່ອຮ່ວມກັນປຶກສາຫາລື ຫາແນວທາງໃຫ້ການຈັດຕັ້ງປະຕິບັດ ໃນການເບິ່ງແຍງຄົນເຈັບມີຄວາມປອດໄພຮ່ວມກັນ.