ສຳນັກຂ່າວຕ່າງປະເທດ ລາຍງານໃນວັນທີ 17 ພະຈິກຜ່ານມານີ້ວ່າ ທ່ານ ເຈື່ອງເຕິນຊາງ ປະທານປະເທດຫວຽດນາມ ແລະ ທ່ານ ເບນິກໂນ ອະຄີໂນ ປະທານາທິບໍດີ ແຫ່ງປະເທດຟິລິບປິນ ໄດ້ລົງນາມໃນສັນຍາ ເພື່ອຍົກລະດັບການພົວພັນຮ່ວມມື ຂຶ້ນສູ່ລະດັບຄູ່ຮ່ວມມືຍຸດທະສາດ ເພື່ອຮັດແໜ້ນສາຍພົວພັນ ລະຫວ່າງສອງປະເທດ ໃຫ້ແໜ້ນແຟ້ນຍິ່ງຂຶ້ນ.
ການລົງນາມໃນສັນຍາດັ່ງກ່າວ ມີຂຶ້ນໃນລະຫວ່າງທີ່ ທ່ານ ເຈື່ອງເຕິນຊາງ ເດີນທາງເຂົ້າຮ່ວມກອງປະຊຸມ ຜູ້ນຳກຸ່ມຮ່ວມມືທາງດ້ານເສດຖະກິດ ອາຊີ-ປາຊີຟິກ ຫລື ເອເປັກ ຊຶ່ງຈັດຂຶ້ນຢູ່ນະຄອນຫລວງມະນີລາ ປະເທດຟິລິບປິນ ໂດຍທ່ານປະທານາທິບໍດີຟິລິບປິນ ໄດ້ກ່າວວ່າ ຂໍ້ຕົກລົງດັ່ງກ່າວນີ້ ຈະເຮັດໃຫ້ການຮ່ວມມື ລະຫວ່າງ ຟິລິບປິນ-ຫວຽດນາມ ເລິກເຊິ່ງຍິ່ງຂຶ້ນ ໂດຍສະເພາະທາງດ້ານເສດຖະກິດ, ກະສິກຳ ແລະ ການປ້ອງກັນປະເທດ.