ຂປລ. ອໍານາດການປົກຄອງ ແຂວງຊຽງຂວາງ ເມືອງແປກ ໄດ້ຕົກລົງຍົກຍ້າຍ ຕະຫລາດກະສິກໍາ ໂພນສະຫວັນ ບ່ອນເກົ່າ ໄປຢູ່ສວນພູຄໍາ (ກຸ່ມວິສາ ຫະກິດສວນພູຄຳ) ນັບແຕ່ກາງເດືອນພະຈິກນີ້ ເປັນຕົ້ນໄປ ທັງນີ້, ກໍເພື່ອຍົກລະດັບ ການບໍລິການສະອາດສະດວກ ແລະ ສະຖານທີ່ຈອດລົດ ກວ້າງ ຂວາງກວ່າເກົ່າ, ສ່ວນຕະຫລາດບ່ອນເກົ່າ ແມ່ນຈະພັດທະນາໃຫ້ເປັນ ຕະຫລາດທີ່ສະອາດ ແລະ ທັນສະໄໜ ເພາະຕະຫລາດບ່ອນເກົ່ານັ້ນ ມີຄວາມແອອັດ ຄັບແຄບ ແລະ ບໍ່ສາມາດຕອບສະ ໜອງຄວາມຕ້ອງການ ຂອງການຂະຫຍາຍຕົວ ການຊື້-ຂາຍ ສິນຄ້າກະສິກຳ ທີ່ພໍ່ແມ່ປະຊາຊົນນຳມາຂາຍທຸກໆມື້.
ທ່ານ ສໍອຸໄທ ສຸລິຍະແສງ ຫົວໜ້າຫ້ອງການອາກອນ ເມືອງແປກ ແຂວງຊຽງຂວາງ ໃຫ້ຮູ້ວ່າ: ຍ້ອນເຫັນໄດ້ເຖິງ ຄວາມຈຳເປັນ ໃນການບໍລິການ ຊື້-ຂາຍ ຂອງພໍ່ແມ່ປະຊາຊົນທີ່ນັບມື້ເພີ່ມຂຶ້ນ ແຕ່ສະຖານທີ່ບ່ອນເກົ່າຄັບແຄບ ບ່ອນຈອດລົດ ບໍ່ພຽງພໍ ແລະ ອີງໃສ່ແຜນຍຸດທະສາດທີ່ເມືອງແປກ ກໍຄື ແຂວງຊຽງຂວາງ ທີ່ຈະພັດທະນາຕະຫລາດບ່ອນເກົ່າ ໃຫ້ເປັນຕະຫລາດທີ່ສະອາດ ແລະ ທັນສະໄໝ ໃນຕໍ່ໜ້າ ດັ່ງນັ້ນ, ຈຶ່ງມີຄວາມຈຳເປັນຕ້ອງໄດ້ຍົກ ຍ້າຍມາຢູ່ສວນພູຄຳ.
ຂະນະດຽວກັນ, ທ່ານ ພູຄໍາ ອົ້ວນວນສາ ປະທານກຸ່ມວິສະຫະກິດສວນພູຄໍາ ຢືນຢັນວ່າ: ພາຍຫລັງທີ່ໄດ້ຮັບຄໍາສັ່ງຈາກຂັ້ນເທິງ ທາງກຸ່ມວິສາຫະກິດ ໄດ້ເລັ່ງລົງມືກະກຽມສະຖານທີ່ ແບ່ງເຂດຕາມປະເພດສິນຄ້າ, ກຽມສະຖານທີ່ຈອດລົດ, ພະນັກງານຄຸ້ມຄອງບໍລິການ ເພື່ອຮອງຮັບກັບການຍົກຍ້າຍຕະຫລາດ ກະສິກຳໂພນສະຫວັນ ມາຢູ່ສວນພູຄຳ ຫລື ສະໜາມບິນເກົ່າ ເມືອງແປກ ແຂວງຊຽງຂວາງ.
ແຫລ່ງຂ່າວ:
