ບໍລິສັດ ລາວສະໄໝກໍ່ສ້າງຂົວ-ທາງ ແລະ ບໍລິການ ຈຳກັດຜູ້ດຽວ ໄດ້ຮັບອະນຸຍາດໃຫ້ເປັນຜູ້ພັດທະນາໂຄງການສຶກສາ ແລະ ກໍ່ສ້າງເຂື່ອນໄຟຟ້າເຊບັ້ງໄຟ 1 (ແກ້ງແກວ) ແຂວງສະຫວັນນະເຂດ ເຊິ່ງຄາດວ່າຈະເລີ່ມລົງມືກໍ່ສ້າງໃນປີ 2017 ແລະ ຈະສຳເລັດໃນປີ 2020 ມູນຄ່າ 200 ລ້ານໂດລາສະຫະລັດ ຫຼື ປະມານ 1.600 ຕື້ກີບ ໂດຍພາຍຫຼັງການກໍ່ສ້າງໂຄງການດັ່ງກ່າວສຳເລັດ ຈະສາມາດຜະລິດກະແສໄຟຟ້າໄດ້ປະມານ 90-100 ເມກາວັດ ເພື່ອຈຳໜ່າຍໃຫ້ລັດວິສາຫະກິດໄຟຟ້າລາວ 100%.
ພິທີລົງນາມບົດບັນທຶກຄວາມເຂົ້າໃຈໂຄງການນີ້ ໄດ້ຈັດຂຶ້ນວັນທີ 13 ພະຈິກ 2015 ຢູ່ບໍລິສັດ ລາວສະໄໝກໍ່ສ້າງຂົວ-ທາງ ແລະ ບໍລິການ ຈຳກັດຜູ້ດຽວ ລະຫວ່າງທ່ານ ດຣ. ບຸນທະວີ ສີສຸພັນທອງ ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນ ກັບທ່ານ ພູວົງ ກໍຣະສັກ ຜູ້ອຳນວຍການບໍລິສັດ ລາວສະໄໝກໍ່ສ້າງຂົວ-ທາງ ແລະ ບໍລິການ ຈຳກັດຜູ້ດຽວ ໂດຍຊ້ອງໜ້າທ່ານ ດຣ. ສຸພັນ ແກ້ວມີໄຊ ເຈົ້າແຂວງສະຫວັນນະເຂດ ທ່ານ ຮສ.ດຣ. ຄຳຜາດ ສຸລິນພູ ມີລັດຖະມົນຕີຊ່ວຍວ່າການກະຊວງກະສິກຳ ແລະ ປ່າໄມ້ ພ້ອມດ້ວຍພາກສ່ວນທີ່ກ່ຽວຂ້ອງ.
ທ່ານ ພູວົງ ກໍຣະສັກ ໄດ້ກ່າວວ່າ: ເຂື່ອນໄຟຟ້າເຊບັ້ງໄຟ 1 ມີຄວາມສົນໃຈເພື່ອຈະພັດທະນາ ໃຫ້ມີລັກສະນະແບບຄົບວົງຈອນມາຫຼາຍປີແລ້ວ ຄືການນຳໃຊ້ນ້ຳ ເພື່ອຜະລິດກະແສໄຟຟ້າຊົນລະກະເສດຕ້ານແລ້ງ-ຕ້ານຖ້ວມ ແລະ ການທ່ອງທ່ຽວ ຈາກນັ້ນ ຈຶ່ງໄດ້ຂໍອະນຸຍາດຈາກອຳນາດການປົກຄອງແຂວງສະຫວັນນະເຂດ ເພື່ອເຂົ້າສຶກສາ ສ້າງບົດວິພາກເສດຖະກິດ-ເຕັກນິກ ເຫັນວ່າເຂື່ອນນີ້ ຈະນຳເອົາຜົນປະໂຫຍດມາສູ່ສັງຄົມຢ່າງມະຫາສານ ແລະ ມີກຳລັງຕິດຕັ້ງຫຼາຍກວ່າທີ່ທ້ອງຖິ່ນຮັບຜິດຊອບ ສະນັ້ນ ຈຶ່ງໄດ້ຂໍອະນຸຍາດຈາກສູນກາງ ເພື່ອເຊັນບົດບັນທຶກຄວາມເຂົ້າໃຈສ້າງເຂື່ອນໄຟຟ້າເຊບັ້ງໄຟ 1 ເປັນປະເພດເຂື່ອນທີ່ມີລວງສູງນ້ຳຕົກນ້ອຍ 8 ແມັດ ແຕ່ໃຊ້ປະລິມານນ້ຳໄຫຼປະມານ 600 ແມັດກ້ອນ ເພື່ອຜະລິດໄຟຟ້າໃຫ້ໄດ້ 90-100 ເມກາວັດ ດ້ວຍປະລິມານນ້ຳໄຫຼຈາກລຳເຊບັ້ງໄຟ ລຳເຊນ້ອຍ ແລະ ເຂື່ອນນ້ຳເທີນ 2 ທີ່ໄດ້ກັກເກັບນ້ຳໄວ້ກວ່າ 450 ກິໂລຕະລາງແມັດ ຈະຄ່ອຍທະຍອຍປ່ອຍລົງສູ່ເຂື່ອນດັ່ງກ່າວ ລະດັບນ້ຳໜ້າເຂື່ອນເທົ່າກັບລະດັບນ້ຳນອງປົກກະຕິຂອງລະດູຝົນທຸກໆປີ ເປັນເຂື່ອນທີ່ແລ່ນເຄື່ອງໄດ້ດີໃນລະດູແລ້ງ ແຕ່ລະດູຝົນປະມານ 2 ເດືອນຈະຢຸດຜະລິດ ຫຼື ຜະລິດໄດ້ໜ້ອຍ ຍ້ອນສະພາບນ້ຳຂອງຂຶ້ນຍູ້ໃສ່ທ້າຍໂຮງຈັກ.
ແຫ່ລງຂ່າວ
