ພາຍໃຕ້ການຊີ້ນຳ-ນຳພາຂອງພັກ-ລັດ ເຮັດໃຫ້ຂະແໜງການພະລັງງານ-ບໍ່ແຮ່ ສືບຕໍ່ເຕີບໃຫຍ່ຂະຫຍາຍຕົວ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມໄດ້ຢ່າງຫຼວງຫຼາຍ ນັບແຕ່ປີ 1975 ຈົນມາເຖິງປັດຈຸບັນ ອັດຕາການຊົມໃຊ້ໄຟຟ້າຂອງປະຊາຊົນກວມ 89% ຂະນະທີ່ບໍ່ແຮ່ກໍ່ເພີ່ມຂຶ້ນ 15-20% ຕໍ່ປີ.
ອີງຕາມຂໍ້ມູນຈາກເອກະສານໂຄສະນາ ປາຖະກະຖາ ວັນສະຖາປະນາ ສປປ ລາວ ຄົບຮອບ 40 ປີ ເຫັນໄດ້ວ່າ: ຂະແໜງພະລັງງານ-ບໍ່ແຮ່ ນັບຕັ້ງແຕ່ປີ 1975 ຂະແໜງພະລັງງານ ແລະ ບໍ່ແຮ່ ໄດ້ຮັບການພັດທະນາຢ່າງຕັ້ງໜ້າ ຈາກທີ່ທົ່ວປະເທດມີພຽງ 1 ເຂື່ອນ ໃນປີ 1975 ແຕ່ມາຮອດປີ 2015 ມີເຖິງ 30 ເຂື່ອນ ເປັນຕົ້ນແມ່ນ ເຂື່ອນໄຟຟ້າ ເທີນຫີນບູນ ພາກຂະຫຍາຍ ນ້ຳງື່ມ 5 ແລະ ເຊຂະໝານ 3 ນອກນັ້ນ ຍັງມີໂຄງການຂະໜາດໃຫຍ່ອີກຫຼາຍໂຄງການ ເຊັ່ນ: ໂຄງການໄຟຟ້າຫົງສາລິກໄນ ເຂື່ອນໄຟຟ້າໄຊຍະບູລີ ເຂື່ອນນ້ຳອູ 2 5 ແລະ 6 ເຂື່ອນເຊປຽນ-ເຊນ້ຳນ້ອຍ ເຂື່ອນນ້ຳງຽບ ແລະ ອື່ນໆ ທີ່ສາມາດຜະລິດພະລັງງານໄດ້ທັງໝົດ 5.205 ເມກາວັດ ເຊິ່ງສາມາດສະໜອງກະແສໄຟຟ້າໃຫ້ກັບທຸກໆເທສະບານແຂວງ ແລະ ເມືອງ.
ສ່ວນບໍ່ແຮ່ ກໍ່ເປັນຂະແໜງໜຶ່ງທີ່ສາມາດສ້າງລາຍຮັບໃຫ້ກັບປະເທດຊາດຫຼາຍສົມຄວນ ປັດຈຸບັນ ຍອດມູນຄ່າການຜະລິດອຸດສາຫະກຳ-ບໍ່ແຮ່ ໄດ້ສືບຕໍ່ເພີ່ມຂຶ້ນ ເຊິ່ງປະເພດແຮ່ທາດທີ່ໄດ້ຖືກຂຸດຄົ້ນໃນ ສປປ ລາວ ປະກອບມີ: ຄຳ ທອງ ຖ່ານຫີນ ກົ່ວ ແກ້ວປະເສີດ ຫີນປູນຜະລິດ ຊີມັງ ຫີນກາວ ສັງກະສີ ຟົດຟໍ ເກືອກິນ ແລະ ອື່ນໆ.
ແຫ່ລງຂ່າວ
