ວັນທີ 16 ພະຈິກ 2015 ຢູ່ສະຖານເອກອັກຄະລັດຖະທູດຝຣັ່ງ ປະຈຳ ສປປ ລາວ ທ່ານ ສະເຫຼີມໄຊ ກົມມະສິດ ລັດຖະມົນຕີຊ່ວຍວ່າການກະຊວງການຕ່າງປະເທດ ພ້ອມດ້ວຍຄະນະໄດ້ເຊັນປຶ້ມໄວ້ອາໄລຕໍ່ເຫດການກໍ່ການຮ້າຍ ທີ່ນະຄອນຫຼວງປາຣີ ປະເທດຝຣັ່ງ ໃນວັນທີ 13 ພະຈິກ 2015 ຜ່ານມາ ເຮັດໃຫ້ມີຜູ້ເສຍຊີວິດ ແລະ ບາດເຈັບ.
ການເຊັນໄວ້ອາໄລຄັ້ງນີ້ມີເນື້ອໃນຂຽນວ່າ: ພວກຂ້າພະເຈົ້າ ໄດ້ຮັບຂ່າວດ້ວຍຄວາມໂສກເສົ້າກ່ຽວກັບເຫດການສະຫຍອງຂວັນ ທີ່ເກີດຈາກການກະທຳທີ່ໂຫດຮ້າຍປ່າເຖື່ອນ ໃນການບຸກໂຈມຕີຂອງກຸ່ມກໍ່ການຮ້າຍຢູ່ໂຮງລະຄອນ ຮ້ານອາຫານ ແລະ ສະໜາມກີລາແຫ່ງຊາດ ທີ່ນະຄອນຫຼວງປາຣີ ເຊິ່ງເຮັດໃຫ້ມີຜູ້ເສຍຊີວິດຈຳນວນຫຼວງຫຼາຍ ພວກຂ້າພະເຈົ້າຂໍກ່າວປະນາມຢ່າງແຂງແຮງ ຕໍ່ການກະທຳດັ່ງກ່າວຂອງກຸ່ມກໍ່ການຮ້າຍ.
ໃນນາມລັດຖະບານ ແລະ ປະຊາຊົນລາວ ຂ້າພະເຈົ້າຂໍສະແດງຄວາມເສົ້າສະຫຼົດໃຈຢ່າງສຸດຊຶ້ງ ມາຍັງລັດຖະບານ ແລະ ປະຊາຊົນ ແຫ່ງສາທາລະນະລັດຝຣັ່ງ ກໍ່ຄືຄອບຄົວຂອງຜູ້ໄດ້ຮັບເຄາະຮ້າຍ ຈາກເຫດການກະທຳອັນຮຸນແຮງດັ່ງກ່າວ ແລະ ສປປ ລາວ ຈະສືບຕໍ່ໃຫ້ການຮ່ວມມືກັບວົງຄະນາຍາດສາກົນ ໃນການຕໍ່ສູ້ຕ້ານລັດທິກໍ່ການຮ້າຍໃນທຸກຮູບແບບ.
ແຫ່ລງຂ່າວ
