ກອງ​ປະຊຸມ​ລະດັບ​ສູງ​ຂອງ​ຂະແໜງ​ການ​ຄວບ​ຄຸມ​ຢາ​ເສບ​ຕິດ ຄັ້ງ​ທີ 10 ຈັດ​ຂຶ້ນ​ວັນ​ທີ 13 ພະຈິກ 2015 ຢູ່​ໂຮງແຮມ​ດອນ​ຈັນ​ພາເລດ ໂດຍ​ມີທ່ານ ​ກຸ ຈັນ​ສີ​ນາ ປະທານ​ຄະນະ​ກຳມະການ​ແຫ່ງ​ຊາດ ເພື່ອ​ກວດກາ ແລະ ຄວບ​ຄຸມ​ຢາເສບ​ຕິດ ທ່ານ ຈອນ ວິນ​ລຽມ ເອກ​ອັກ​ຄະ​ລັດ​ຖະ​ທູດ​ອົດ​ສະ​ຕຣາລີ ປະທານ​ກຸ່ມ​ບັນດາ​ປະເທດ​ທີ່ເຄີຍ​ໃຫ້ການ​ຊ່ວຍເຫຼືອ​ ເພື່ອ​ຄວບຄຸມ​ຢາ​ເສບ​ຕິດ​ແກ່ ​ສປປ ລາວ ແລະ ທ່ານ ແສງ​ເດືອນ ພົມ​ມະວົງສາ ຜູ້ຕາງໜ້າ​ອົງການ UNODC ຮ່ວມ​ກັນເປັນ​ປະທານ ເຊິ່ງ​ມີ​ຕາງໜ້າ​ຈາກ​ອົງການ​ສາກົນ ແລະ ພາກສ່ວນ​ທີ່​ກ່ຽວຂ້ອງເຂົ້າ​ຮ່ວມ.

ທ່ານ ກຸ ຈັນ​ສີ​ນາ ໄດ້​ກ່າວ​ວ່າ: ການ​ປູກ​ຝິ່ນ​ຢູ່​ທາງ​ພາກ​ເໜືອຂອງ​ລາວ ໃນ​ປີ 2015 ນີ້ ໂດຍອີງໃສ່​ການ​ສະເລ່ຍ​ຈາກ​ຜົນ​ການສຳ​ຫຼວດ​ຂອງ​ອົງການ ​ສປຊ ແລະ ຂອງ ​ສປ ຈີນ ໄດ້​ໃຫ້​ຮູ້​ວ່າ ການ​ລັກ​ປູກ​ຝິ່ນ​ແມ່ນ​ເພີ່ມ​ຂຶ້ນເລັກ​ນ້ອຍ ​ຖ້າ​ສົມ​ທຽບໃສ່​ປີ 2014 ຜ່ານ​ມາ​ ຍ້ອນ​ວ່າ​ຫຼາຍ​ທ້ອງຖິ່ນ​ ໄດ້ຕັ້ງໜ້າ​ຈັດ​ຕັ້ງ​ປະຕິບັດ​ ຄຳ​ສັ່ງ​ຂອງ​ທ່ານ​ນາຍົກລັດຖະມົນຕີ​ ກ່ຽວ​ກັບການ​ແກ້​ໄຂ​ການ​ລັກ​ປູກ​ຝິ່ນ-ປູກກັນຊາ​ຢ່າງ​ເຂັ້ມ​ງວດ ແລະ ແຂງແຮງ​ກວ່າ​ເກົ່າ ໃນ​ປີ​ນີ້ ​ພວກ​ເຮົາໄດ້​ເຊັນ​ສັນຍາ​ຮັບ​ເອົາ​ການ​ຊ່ວຍເຫຼືອ​ລ້າ​ ຈາກ​ລັດຖະບານ​ສະຫະລັດ​ອາ​ເມ​ຣິ​ກາ ແລະ ລຸກ​ຊຳ​ບວກ ເພື່ອ​ນຳ​ມາ​ປະຕິບັດ​ໂຄງການ​ຫັນເອົາ​ປະຊາຊົນ ​ໄປ​ປະກອບ​ອາຊີບອື່ນ​ທີ່​ໝັ້ນຄົງ​ແທນ​ການ​ປູກ​ຝິ່ນ​ຢູ່ແຂວງ​ຫົວພັນ.

ສ່ວນ​ວຽກ​ງານ​ການ​ບຳບັດ​ປິ່ນປົວ​ຜູ້​ທີ່​ຕິດ​ຢາ​ເສບ​ຕິດ​ນັ້ນ ​ພາກສ່ວນ​ທີ່​ກ່ຽວຂ້ອງ​ທ້ອງຖິ່ນ​ຕ່າງໆ ໄດ້​ພາກັນ​ເອົາໃຈໃສ່​ວຽກ​ງານ​ດັ່ງກ່າວ​ດ້ວຍ​ການ​ປິ່ນປົວ​ຢູ່​ຕາມ​ສູນຕາມ​ຊຸມຊົນ ແລະ ຢູ່​ກັບ​ຄອບຄົວ ສາມາດ​ຊ່ວຍ​ກອບ​ກູ້​ເອົາ​ຜູ້​ຕິດ​ຢາເສບ​ຕິດ​ ໃຫ້​ກັບ​ຄືນ​ເປັນ​ຄົນ​ດີ​ຂອງສັງຄົມ ໃນ​ປີ​ນີ້​ໄດ້​ປະມານ 3-4 ພັນ​ເທື່ອ​ຄົນ ເພື່ອ​ສ້າງ​ເງື່ອນໄຂ ແລະ ອຳນວຍ​ຄວາມ​ສະດວກ​ໃນການ​ຄຸ້ມ​ຄອງ​ບໍລິຫານ ແລະ ເຝິກ​ວິຊາ​ຊີບ​ໃຫ້​ຜູ້​ຕິດ​ຢາ​ເສບ​ຕິດນັ້ນ​ ລັດຖະບານ​ສະຫະລັດ​ອາ​ເມ​ຣິກາ ໄດ້​ໃຫ້ການ​ສະໜັບສະໜູນ ແລະ ຊ່ວຍເຫຼືອ​ວັດຖຸ​ອຸປະກອນ ແລະ ທຶນຮອນ​ຈຳນວນ​ໜຶ່ງ ເພື່ອກໍ່ສ້າງ​ພື້ນຖານ​ວັດຖຸ​ເຕັກນິກ​ໃຫ້ແກ່​ບັນດາ​ສູນ​ຢູ່​ຕາມ​ ທ້ອງຖິ່ນຕ່າງໆ.

ນອກຈາກ​ນັ້ນແລ້ວ ​ພວກ​ເຮົາຍັງ​ໄດ້​ປະກອບສ່ວນ​ສຳຄັນ ​ເຂົ້າໃນ​ຂະ​ບວນ​ການ​ປະຕິບັດ​ວຽກງານ 3 ສ້າງ ​ທີ່​ມີ​ສ່ວນ​ພົວພັນ​ກັບຢາ​ເສບ​ຕິດ ເຊິ່ງ​ມາ​ຮອດ​ປັດຈຸບັນ ສາມາດ​ສ້າງ​ບ້ານ​ປອດ​ຢາ​ເສບຕິດ​ໄດ້​ໂດຍ​ພື້ນຖານ​ແລ້ວ 66,24% ຂອງ​ຈຳນວນ 8.117 ບ້ານ​ທັງ​ໝົດ​ໃນ​ທົ່ວ​ປະເທດ ຂະແໜງ​ການ​ສຶກ​ສາ ແລະ ກີລາ ກໍ່​ໄດ້​ຕັ້ງໜ້າ​ສ້າງ​ໂຮງຮຽນ​ມັດ​ທະຍົມ​ປອດ​ຢາ​ເສບ​ຕິດ​ໄດ້​ແລ້ວ 68,85% ຂອງ​ຈຳນວນ 1.662 ໂຮງຮຽນ​ມັດທະຍົມ​ທົ່ວ​ປະເທດ ເວົ້າ​ລວມ​ແລ້ວ ຄອບຄົວ​ໃດ​ສະຖານ​ທີ່​ໃດ​ຫາກ​ປອດ​ຢາ​ເສບ​ຕິດແລ້ວ ຢູ່​ບ່ອນ​ນັ້ນ​ຈະ​ມີ​ຄວາມ​ສະຫງົບ​ປອດ​ໄພ ແລະ ເປັນ​ລະບຽບຮຽບ​ຮ້ອຍ​ດີ​ໄດ້​ໂດຍ​ພື້ນຖານ.

ສຳລັບ​ການ​ປະຕິບັດ​ກົດໝາຍ​ຕໍ່ຜູ້​ກະທຳ​ຜິດ​ໃນ​ໄລຍະ 10 ເດືອນທີ່​ຜ່ານ​ມາ ເຈົ້າ​ໜ້າທີ່​ຕຳຫຼວດ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ ແລະ ພາກສ່ວນ​ທີ່​ກ່ຽວຂ້ອງ ​ໄດ້ຮ່ວມ​ກັນ​ປະຕິບັດ​ໜ້າທີ່​ດ້ວຍຄວາມ​ຮັບຜິດຊອບ​ສູງ ​ສາມາດມ້າງ​ຄະດີ​ໄດ້​ເກືອບ 2 ພັນ​ເລື່ອງ ຈັບ​ກຸມ​ຜູ້​ຕ້ອງ​ຫາ​ໄດ້​ເກືອບ 3 ພັນຄົນ ຢຶດ​ຢາ​ບ້າໄດ້ 5 ລ້ານ​ກວ່າເມັດ ເຮ​ໂລ​ອິນ 1 ຮ້ອຍ​ກິ​ໂລ ຝິ່ນ 49 ກິ​ໂລ ຢາ​ໄອສ 130 ກວ່າ​ກິ​ໂລ ກັນຊາ​ແຫ້ງ 3 ພັນ​ກິ​ໂລ ຢຶດ​ໄດ້ສານ​ເຄ​ມີ​ຕົ້ນ ແລະ ວັດຖຸ​ມີຄ່າອີກ​ຈຳນວນ​ໜຶ່ງ.

ແຫລ່ງຂ່າວ: