ສຳນັກຂ່າວຕ່າງປະເທດ ລາຍງານໃນວັນທີ12 ພະຈິກຜ່ານມານີ້ວ່າ ເຈົ້າໜ້າທີ່ຕຳຫລວດອີຕາລີ, ສະຫະຣາຊະອານາຈັກ, ນອກແວ, ແຟັງລັງ, ເຢຍລະມັນ ແລະ ສະວິດ ໄດ້ຮ່ວມກັນຈັບກຸມ ເຄືອຂ່າຍຜູ້ຖືກສົງໃສ ສະມາຊິກກຸ່ມຕິດອາວຸດ Rawti Shax ທີ່ກຳລັງວາງແຜນຊ່ວຍເຫລືອ ທ້າວ ມຸນເລາະ ເຄຣກາ ຜູ້ນຳຂອງກຸ່ມ ທີ່ກຳລັງຖືກກັກຂັງໃນຄຸກ ຢູ່ປະເທດນອກແວ ຊຶ່ງການຈັບກຸມກຸ່ມດັ່ງກ່າວ ແມ່ນເປັນສ່ວນໜຶ່ງ ໃນແຜນຕໍ່ຕ້ານການກໍ່ການຮ້າຍ ທີ່ນຳໂດຍອີຕາລີ ຊຶ່ງດຳເນີນການ ຈັບກຸມຜູ້ຖືກສົງໃສ ຕາມໝາຍຈັບຂອງສະຫະພາບເອີຣົບ ຈຳນວນ 17 ຄົນ ໃນນັ້ນຈັບໄດ້ແລ້ວ 15 ຄົນ ສ່ວນຍັງອີກ 2 ຄົນ ເຊື່ອວ່າ ຍັງຢູ່ໃນປະເທດອີຣັກ ໂດຍທັງໝົດ ຖືກຕັ້ງຂໍ້ກ່າວຫາ ກໍ່ການຮ້າຍຂ້າມຊາດ ແລະ ຈະຖືກສົ່ງຕົວ ໄປດຳເນີນຄະດີຢູ່ປະເທດອີຕາລີ.