ກອງປະຊຸມລັດຖະມົນຕີກີລາອາຊຽນ ຄັ້ງທີ II ໄຂຂຶ້ນຢ່າງເປັນທາງການ ທີ່ນະຄອນຫຼວງວຽງຈັນ ໂດຍມີຜູ້ແທນຈາກປະເທດສະມາຊິກເຂົ້າຮ່ວມ ຂະນະທີ່ກອງປະຊຸມຄັ້ງນີ້ ໄດ້ປຶກສາຫາລືຫຼາຍບັນຫາ ເພື່ອພັດທະນາວຽກງານກີລາ-ກາຍະກຳ ແລະ ຮັບຮອງເອົາຖະແຫຼງການວຽກງານ ວ່າດ້ວຍການຮ່ວມມືດ້ານກີລາ ຊຶ່ງເປັນເອກະສານພື້ນຖານໃນການຮ່ວມມືກີລາອາຊຽນ ໃນຊຸມປີຕໍ່ໜ້າ.
ທ່ານ ທອງສິງ ທຳມະວົງ ນາຍົກລັດຖະມົນຕີ ໄດ້ເປັນກຽດຂຶ້ນກ່າວໄຂກອງປະຊຸມຄັ້ງນີ້ ຊຶ່ງມີບາງຕອນທ່ານໄດ້ກ່າວວ່າ: ໃນໄລຍະຜ່ານມາ ລັດຖະບານລາວ ໄດ້ຊຸກຍູ້ ແລະ ສົ່ງເສີມກີລາ-ກາຍະກຳຕະຫຼອດມາ ໂດຍໄດ້ຈັດການແຂ່ງຂັນລະດັບຊາດ ແລະ ທ້ອງຖິ່ນຢ່າງເປັນຂະບວນການຟົດຟື້ນ ແລະ ເປັນປົກກະຕິ ສຳລັບປີ 2014 ທີ່ຈະມາເຖິງນີ້ ສປປ ລາວ ຈະໄດ້ຈັດງານມະຫະກຳກີລານັກຮຽນມັດທະຍົມສຶກສາທົ່ວປະເທດຂຶ້ນ ທີ່ແຂວງຈຳປາສັກ ແລະ ງານມະຫະກຳກີລາແຫ່ງຊາດຢູ່ແຂວງອຸດົມໄຊ ແລະ ໃນໄລຍະຜ່ານມາ ສປປ ລາວ ຍັງໄດ້ຮັບກຽດເປັນເຈົ້າພາບຊີເກມ ຄັ້ງທີ 25 ໃນປີ 2009 ກີລາມະຫາວິທະຍາໄລອາຊຽນ ຄັ້ງທີ 16 ປີ 2012 ແລະ ຍັງໄດ້ເຂົ້າຮ່ວມການແຂ່ງຂັນໃນລະດັບອາຊຽນ ອາຊີ ແລະ ສາກົນ ພ້ອມນັ້ນຍັງຖືເອົາວຽກງານກີລາ-ກາຍະກຳ ເປັນການສ້າງຄວາມສາມັກຄີມິດຕະພາບ ແລະ ການເຊື່ອມໂຍງກັບບັນດາປະເທດເພື່ອນມິດ ທັງໃນພາກພື້ນ ແລະ ສາກົນ.
ສຳລັບຜົນສຳເລັດຂອງກອງປະຊຸມ ທ່ານ ດຣ. ພັນຄຳ ວິພາວັນ ລັດຖະມົນຕີວ່າການກະຊວງສຶກສາທິການ-ກີລາ ໄດ້ຖະແຫຼງຂ່າວຕໍ່ສື່ມວນຊົນວ່າ: ກອງປະຊຸມຄັ້ງນີ້ ແຕ່ລະປະເທດສະມາຊິກອາຊຽນ ໄດ້ສະເໜີບົດຮຽນ ແລະ ປະສົບການຂອງຕົນໃນການສົ່ງເສີມ ແລະ ການພັດທະນາກີລາ ເຫັນດີໃຫ້ແຕ່ລະປະເທດ ແຕ່ງຕັ້ງຈຸດປະສານງານຂອງຕົນ ຕາມເວລາອັນຄວນ ໄດ້ຮັບຟັງການລາຍງານຂອງບັນດາປະເທດສະມາຊິກ ໃນການຈັດຕັ້ງກິດຈະກຳຕ່າງໆ ເພື່ອສະຫຼອງປີ 2013 ປີແຫ່ງອຸດສາຫະກຳກີລາອາຊຽນ ເຊັ່ນ: ມາເລເຊຍ ສິງກະໂປ ບຣູໄນ ໂດຍສະເພາະແມ່ນ ສປປ ລາວ ທີ່ໄດ້ເປັນເຈົ້າພາບຈັດກອງປະຊຸມ ເຈົ້າໜ້າທີ່ອາວຸໂສກີລາອາຊຽນ ຄັ້ງທີ III ແລະ ກອງປະຊຸມລັດຖະມົນຕີກີລາອາຊຽນ ຄັ້ງທີ II.
ນອກນັ້ນ ກອງປະຊຸມຍັງໄດ້ແລກປ່ຽນຄຳເຫັນ ກ່ຽວກັບຄວາມເປັນໄປໄດ້ໃນການສະໝັກ ເປັນເຈົ້າພາບຮ່ວມກີລາເຕະບານໂລກ ໃນຊຸມປີ 2030 ຕໍ່ກັບບັນຫານີ້ ເຈົ້າໜ້າທີ່ ແລະ ພາກສ່ວນກ່ຽວຂ້ອງຂອງແຕ່ລະປະເທດ ສືບຕໍ່ຄົ້ນຄວ້າ.
ກອງປະຊຸມດັ່ງກ່າວ ໄດ້ຈັດຂຶ້ນໃນວັນທີ 5 ທັນວາ 2013 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ໂດຍມີທ່ານ ດຣ. ພັນຄຳ ວິພາວັນ ທ່ານ ເລ ເລືອງ ມິງ ເລຂາທິການໃຫຍ່ອາຊຽນ ພ້ອມບັນດາລັດຖະມົນຕີຂອງປະເທດສະມາຊິກອາຊຽນ ແລະ ບັນດາພາກສ່ວນກ່ຽວຂ້ອງ ເຂົ້າຮ່ວມ.
ຂ່າວແຈ້ງຕື່ມອີກວ່າ: ໃນຕອນຄ່ຳຂອງວັນທີ 4 ທັນວາຜ່ານມາ ທ່ານ ດຣ. ພັນຄຳ ວິພາວັນ ໄດ້ເປັນກຽດຈັດງານລ້ຽງຕ້ອນຮັບ ຄະນະຜູ້ແທນເຂົ້າຮ່ວມກອງປະຊຸມຄັ້ງນີ້ຂຶ້ນ ທີ່ໂຮງແຮມດອນຈັນພາເລດ ຊຶ່ງໃນງານດັ່ງກ່າວແມ່ນໄດ້ຮັບຊົມການສະແດງສິລະປະ ບົດເພງ ແລະ ບົດຟ້ອນຕ່າງໆທີ່ສື່ເຖິງເອກະລັກ ແລະ ວັດທະນະທຳລາວ ໂດຍສະເພາະ ແມ່ນສື່ເຖິງສາຍພົວພັນ ແລະ ການຮ່ວມມືຂອງບັນດາປະເທດສະມາຊິກອາຊຽນ.