ວັນທີ 5 ທັນວາ 2013 ນີ້ທີ່ຫ້ອງວ່າການນະຄອນຫຼວງວຽງຈັນ ໄດ້ມີພິທີມອບ-ຮັບໜ້າທີ່ຕຳແໜ່ງ ຫົວໜ້າຫ້ອງວ່າການປົກຄອງນະຄອນຫຼວງວຽງຈັນ ລະຫວ່າງຜູ້ເກົ່າ ແລະ ຜູ້ໃໝ່ຂຶ້ນ ຊຶ່ງມີທ່ານ ສຸກັນ ມະຫາລາດ ຄະນະເລຂາທິການສູນກາງພັກ ເລຂາຄະນະພັກ ເຈົ້າຄອງນະຄອນຫຼວງວຽງຈັນ ບັນດາທ່ານຄະນະປະຈຳພັກ ຄະນະພັກນະຄອນຫຼວງ ທ່ານເຈົ້າເມືອງ ຮອງເຈົ້າເມືອງ ຫົວໜ້າ ຮອງຫົວໜ້າພະແນກການ ແລະ ອົງການທຽບເທົ່າ ພ້ອມດ້ວຍພະນັກງານວິຊາການ ພາຍໃນຫ້ອງວ່າການປົກຄອງນະຄອນຫຼວງວຽງຈັນ ເຂົ້າຮ່ວມ.
ໂດຍອີງຕາມກົດໝາຍວ່າດ້ວຍການປົກຄອງທ້ອງຖິ່ນແຫ່ງ ສປປ ລາວ ແລະ ອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານ ຢູ່ນະຄອນຫຼວງວຽງຈັນ ດັ່ງນັ້ນ ຂັ້ນເທິງກໍຄືຄະນະເລຂາທິການສູນກາງພັກ ນາຍົກລັດຖະມົນຕີ ແລະ ທ່ານເຈົ້າຄອງນະຄອນຫຼວງວຽງຈັນ ໄດ້ອອກຄຳສັ່ງ ແລະ ຂໍ້ຕົກລົງວ່າດ້ວຍການແຕ່ງຕັ້ງ ແລະ ຍົກຍ້າຍ ທ່ານ ພອຍຄຳ ຮຸ່ງບຸນຍວງ ຄະນະປະຈຳພັກ ເລຂາພັກເມືອງ ເຈົ້າເມືອງຈັນທະບູລີ ໄປຮັບໜ້າທີ່ໃໝ່ເປັນຫົວໜ້າຫ້ອງວ່າການປົກຄອງ ນະຄອນຫຼວງວຽງຈັນ ແລະ ຍົກຍ້າຍທ່ານນາງ ບົວລອນ ວົງດາລາແສນ ຄະນະພັກ ຫົວໜ້າຫ້ອງວ່າການປົກຄອງນະຄອນຫຼວງວຽງຈັນຜູ້ເກົ່າ ໄປຮັບໜ້າທີ່ໃໝ່ເປັນເລຂາພັກເມືອງ ເຈົ້າເມືອງຈັນທະບູລີ ພ້ອມນີ້ ທ່ານເຈົ້າຄອງນະຄອນຫຼວງວຽງຈັນ ຍັງໄດ້ອອກຂໍ້ຕົກລົງແຕ່ງຕັ້ງ ທ່ານ ທອງທິບ ສີວິໄຊ ຫົວໜ້າຫ້ອງການປັບປຸງທຸລະກິດນະຄອນຫຼວງວຽງຈັນ ເປັນຮອງຫົວໜ້າຫ້ອງວ່າການປົກຄອງນະຄອນຫຼວງວຽງຈັນ ທັງເປັນຜູ້ຮັກສາການຫົວໜ້າຫ້ອງວ່າການປົກຄອງນະຄອນຫຼວງວຽງຈັນ ແລະ ແຕ່ງຕັ້ງທ່ານ ອິນປອງ ທຸມມາ ຮອງຫົວໜ້າຄະນະຈັດຕັ້ງນະຄອນຫຼວງວຽງຈັນ ແລະ ທ່ານ ສີເພັດ ທຳມະວົງ ຫົວໜ້າຂະແໜງບໍລິຫານ-ການເງິນຫ້ອງວ່າການປົກຄອງນະຄອນຫຼວງວຽງຈັນ ເປັນຮອງຫົວໜ້າຫ້ອງວ່າການປົກຄອງນະຄອນຫຼວງວຽງຈັນ.