ຂປລ. ທ່ານ ສະກຸນຄໍາ ຮອງຫົວໜ້າຫ້ອງການ, ກະຊວງໄປສະນີ ໂທລະຄົມມະນາຄົມ ແລະ ການສື່ສານໄດ້ເປີດເຜີຍໃນວັນທີ 12 ພະຈິກ 2015 ນີ້ວ່າ: ທ່ານ ບຸນຍັງ ວໍລະຈິດ ຮອງປະທານປະເທດແຫ່ງ ສປປ ລາວຈະນໍາພາຄະນະເດີນທາງເຂົ້າຮ່ວມເປີດພິທີສົ່ງດາວທຽມດວງທໍາອິດຂອງລາວຄັ້ງປະຫວັດສາດຂຶ້ນສູ່ວົງໂຄຈອນ ເຊິ່ງພິທີດັ່ງກ່າວຈະຈັດຂຶ້ນໃນວັນທີ 21 ພະຈິກ 2015 ຢູ່ເມືອງຊີຊາງ ແຂວງສີສວນ ສປ.ຈີນ. ທ່າມກາງ ປວງຊົນລາວທັງຊາດຕ່າງກໍມີຄວາມອົກດີໃຈ ແລະ ພາກພູມໃຈຢ່າງຫລວງຫລາຍຕໍ່ກັບຜົນສໍາເລັດທີ່ພັກ-ລັດຖະບານ ແລະ ປະຊາຊົນລາວບັນດາເຜົ່າຍາດມາໄດ້ຕະຫລອດ 40 ປີຜ່ານມາ ພາຍຫລັງໄດ້ຮັບຊາບຂ່າວດັ່ງກ່າວນັ້ນ.
ກ່ອນໜ້ານັ້ນ ທ່ານ ຫຽມ ພົມມະຈັນ ລັດຖະມົນຕີວ່າການກະຊວງໄປສະນີ ໂທລະຄົມມະນາຄົມ ແລະ ການສື່ສານໄດ້ລາຍລະຫວ່າງພິທີເຊັນສັນຍາຮ່ວມທຶນສ້າງຕັ້ງບໍລິສັດ ດາວທຽມລາວ ໃນຕຳແໜ່ງ 128,5 ອົງສາຕາເວັນອອກ ລະຫວ່າງ ສປປ ລາວ ແລະ ສປ ຈີນ ໄດ້ມີຂຶ້ນໃນວັນທີ 30 ຕຸລາຜ່ານມານີ້ ທີ່ນະຄອນຫຼວງວຽງຈັນວ່າ: ດາວທຽມດວງທຳອິດຂອງລາວທີ່ມີຊື່ວ່າ Laosat-1 ຈະໄດ້ສົ່ງສູ່ວົງໂຄຈອນຂອງໂລກໃນວັນທີ 21 ພະຈິກທີ່ຈະມາເຖິງນີ້ ເຊິ່ງເປັນໄລຍະທີ່ປະຊາຊົນລາວທັງຊາດພວມ ສ້າງຂະບວນການຕ້ອນຮັບວັນສ້າງຕັ້ງ ສປປ ລາວ ຄົບຮອບ 40 ປີຢ່າງຟົດຟື້ນ.
ດາວທຽມລາວນີ້ ຈະເປັນຂອງຂວັນອັນລ້ຳຄ່າສຳລັບວັນປະຫວັດສາດສຳຄັນດັ່ງກ່າວ ພາຍຫລັງໄດ້ເລີ່ມກໍ່ສ້າງມາແຕ່ເດືອນພຶດສະພາ 2008 ດ້ວຍການຂໍຈອງ ແລະ ນຳໃຊ້ວົງໂຄຈອນ 128,5 ອົງສາ ດ້ວຍການນຳໃຊ້ທຶນຮອນເປັນຈຳນວນຫລາຍ ຈົນມາຮອດວັນທີ 11 ກໍລະກົດ 2012 ຈຶ່ງໄດ້ມີການເຊັນສັນຍາເງິນກູ້ກັບທະນາຄານຂາເຂົ້າ-ຂາອອກຂອງຈີນ ໃນວົງເງິນຫລາຍກວ່າ 258 ລ້ານໂດລາສະຫະລັດ.
ພາຍຫລັງສຳເລັດການສົ່ງດາວທຽມ Laosat-1 ຂຶ້ນສູ່ວົງໂຄຈອນແລ້ວ ຈະມີການສ້າງຕັ້ງບໍລິສັດຮ່ວມທຶນ ເຊິ່ງປະກອບມີລັດຖະບານລາວ ແລະ ບໍລິສັດຜູ້ມີປະສົບການດ້ານການບໍລິການດາວທຽມລະດັບສາກົນ ຄື: ລັດຖະບານລາວ 45% ບໍລິສັດ China-Pacific Mobile Telecommunications Satellite (APMT) ຂອງຈີນ 35% ບໍລິສັດ Space Star Technology (SSTC) ຂອງຈີນ 15% ແລະ ບໍລິສັດ Asia pacific Satellite Technology (APST) (ຮົງກົງ) 5% ການລົງນາມໃນສັນຍາຮ່ວມທຶນດັ່ງກ່າວ ແມ່ນເພື່ອຄວາມສະດວກໃຫ້ບໍລິສັດຮ່ວມທຶນ ມີຄວາມສະດວກໃນວຽກບໍລິການ ການສື່ສານຜ່ານດາວທຽມປະເພດຕ່າງໆຢູ່ພາຍໃນ ແລະ ຕ່າງປະເທດ ເຊັ່ນ: ການສື່ສານສຳລັບວຽກງານຂອງລັດ ການໃຫ້ເຊົ່າຊ່ອງດາວທຽມ ການບໍລິການໂທລະພາບຜ່ານດາວທຽມ ການສື່ສານສຳລັບເຂດຊົນນະບົດ ແລະ ຫ່າງໄກສອກຫລີກ ການສຶກສາ ແລະ ການແພດທາງໄກ ລະບົບໂທລະຄົມມະນາຄົມ ແລະ ອິນເຕີເນັດ ການສື່ສານໃນວຽກງານບັນເທົາທຸກ ແລະ ຟື້ນຟູຈາກໄພພິບັດ
ຂ່າວຈາກ ຂ່າວສານປະເທດລາວ
