ໃຜທີ່ເຄີຍໃຊ້ Google Maps ຢູ່ປະຈຳຄົງຈະຮູ້ວ່າມັນສະດວກ ແລະ ຖືກຕ້ອງຊ່ຳໃດ ແຕ່ຖ້າເຂົ້າໄປໃນບ່ອນທີ່ອິນເຕີເນັດເຂົ້າບໍ່ເຖິງ ກໍເທົ່ານັ້ນ ເພາະສາມາດເປີດເບິ່ງໄດ້ແຕ່ແຜນທີ່ພຽງຢ່າງດຽວ ນຳທາງແລະຄົ້ນຫາສະຖານທີ່ບໍ່ໄດ້ ແຕ່ມື້ນີ້ຜູ້ໃຊ້ງານ Google Maps ຄົງຕ້ອງຮ້ອງດີໃຈ ເພາະ Google Maps ສາມາດເປີດໃຫ້ໃຊ້ງານການນຳທາງແລະຄົ້ນຫາສະຖານທີ່ແບບ Offline ໄດ້ແລ້ວ
Google Maps ອັບເດດໃໝ່ ສາມາດໃຫ້ຜູ້ໃຊ້ງານທຳການຄົ້ນຫາສະຖານທີ່ ແລະໃຊ້ລະບົບນຳທາງໄປຍັງຈຸດໝາຍທີ່ຕ້ອງການແບບບໍ່ຕ້ອງມີອິນເຕີເນັດໄດ້ແລ້ວ ພຽງແຕ່ເຈົ້າເຂົ້າໄປໃນແຜນທີ່ເມືອງນັ້ນໆ ແລ້ວກົດປຸ່ມດາວໂຫລດ ເພື່ອໂຫລດແຜນທີ່ມາເກັບໄວ້ໃນເຄື່ອງ ແຕ່ເວລາດາວໂຫລດ ແນະນຳວ່າຄວນເຮັດຜ່ານ Wi-Fi ເພາະໄຟລ໌ມີຂະໜາດໃຫຍ່ຫລາຍ ພຽງເທົ່ານີ້ກໍຮຽບຮ້ອຍແລ້ວ ແຕ່ Google Maps ແບບ Offline ນີ້ ຍັງມີຂໍ້ຈຳກັດຢູ່ທີ່ວ່າ ບໍ່ສາມາດກວດສອບການຈະລາຈອນໃນເສັ້ນທາງທີ່ຈະໄປໄດ້ ແລະຕອນນີ້ຍັງສາມາດໃຊ້ໄດ້ແຕ່ໃນລະບົບ Android ເທົ່ານັ້ນ ສາວົກ iOS ຍັງຄົງຕ້ອງລໍຖ້າຕໍ່ໄປ
