ພາຍຫຼັງທີ່ມີການລະບາດຂອງພະຍາດໄຂ້ຫວັດສັດປີກເຂົ້າມາລົບກວນ ເລີ່ມແຕ່ໄລຍະຊຸມປີ 2001-2004 ຢູ່ປະເທດເພື່ອນບ້ານ ແລະ ຢູ່ຫຼາຍປະເທດໃນໂລກ ກໍຄືຢູ່ ສປປ ລາວເຮົາ ກໍໄດ້ມີການລະບາດຂຶ້ນ ໃນປີ 2004 ອັນໄດ້ສ້າງຄວາມເສຍຫາຍເປັນຈຳນວນຫຼວງຫຼາຍ ເຊິ່ງສາເຫດຕົ້ນຕໍຂອງການລະບາດ ແມ່ນມາຈາກການເຄື່ອນຍ້າຍຂອງເຊື້ອພະຍາດ ຈາກຈຸດທີ່ມີການລະບາດ ໂດຍມາກັບສັດ ຜະລິດຕະພັນສັດ ອຸປະກອນການລ້ຽງສັດ ພາຫະນະ ແລະ ລວມທັງຄົນເຮົາ ທີ່ໄດ້ສຳຜັດກັບເຊື້ອພະຍາດ ແລະ ການສຳຜັດສັດປີກທີ່ແຂງແຮງ ທາງພະແນກກະສິກຳ-ປ່າໄມ້ນະຄອນຫຼວງວຽງຈັນ ກໍຄືຂະແໜງລ້ຽງສັດ ແລະ ການປະມົງ ກໍໄດ້ເອົາໃຈໃສ່ເຝົ້າລະວັງຢ່າງໃກ້ຊິດ ໂດຍສະເພາະ ຢູ່ຈຸດດ່ານຂົວມິດຕະພາບລາວ-ໄທ 1 ກໍໄດ້ມີການເຝົ້າລະວັງ ໄດ້ມີການສ້າງຕັ້ງຈຸດສີດພົ່ນຢາຂ້າເຊື້ອພະຍາດໄຂ້ຫວັດສັດປີກ ເພື່ອໃຫ້ບໍລິການສີດພົ່ນຢາຂ້າເຊື້ອໃຫ້ແກ່ພາຫະນະທີ່ຈະເຂົ້າມາ ສປປ ລາວ ເຮົານັ້ນ ກໍເພາະວ່ານະຄອນຫຼວງວຽງຈັນ (ຂົວມິດຕະພາບ 1 ລາວ-ໄທ) ເປັນຊ່ອງທາງຂົນສົ່ງສິນຄ້າ ແລະ ການເຂົ້າ-ອອກ ໄປ-ມາ ຂອງຜູ້ຄົນນັກທ່ອງທ່ຽວປີລະຫຼາຍລ້ານຄົນ ຊ່ອງທາງດັ່ງກ່າວ ຍິ່ງຕ້ອງໄດ້ເພີ່ມຄວາມເອົາໃຈໃສ່ໃນການສະກັດກັ້ນ ແລະ ປ້ອງກັນພະຍາດ ທີ່ອາດຈະເຂົ້າມາສ້າງຄວາມເສຍຫາຍໃຫ້ແກ່ຊີວິດ ແລະ ສັດລ້ຽງໃນບໍລິເວນກວ້າງຢູ່ນະຄອນຫຼວງ ແລະ ແຂວງອື່ນໆໄດ້.
ທ່ານນາງ ພັດສະລີ ພິດສະໄໝ ຫົວໜ້າຂະແໜງລ້ຽງສັດ ແລະ ການປະມົງ ພະແນກກະສິກຳ-ປ່າໄມ້ນະຄອນຫຼວງວຽງຈັນ ໄດ້ໃຫ້ສຳພາດວ່າ: ເມື່ອປີ 2010 ໄດ້ເກີດມີພະຍາດໄຂ້ຫວັດສັດປີກ ພະຍາດຫູໝູກ່ຳ ປາກເປືອຍລົງເລັບ ໄຂ້ບວມ ພະຍາດໄຂ້ຫວັດສາຍພັນໃໝ່ H1N1 ແລະ ໃນປີ 2013 ກໍເກີດມີພະຍາດໄຂ້ຫວັດສັດປີກສາຍພັນໃໝ່ຊະນິດ H7N9 ທີ່ກຳລັງແຜ່ເຊື້ອຈາກສັດສູ່ສັດ ແລະ ສັດສູ່ຄົນຢູ່ໃນປະເທດເພື່ອນບ້ານ ແລະ ຫຼາຍປະເທດໃນໂລກ ເຊິ່ງຢູ່ ສປປ ລາວ ກໍຖືເປັນປະເທດທີ່ມີໄພຂົ່ມຂູ່ ແລະ ມີຄວາມສ່ຽງສູງຕໍ່ການເກີດພະຍາດດັ່ງກ່າວ ອັນຈະກໍໃຫ້ເກີດຜົນກະທົບດ້ານລົບຕໍ່ສຸຂະພາບເສດຖະກິດ-ສັງຄົມ ແລະ ສິ່ງແວດລ້ອມ ດັ່ງນັ້ນ ຈຶ່ງຍັງຕ້ອງສືບຕໍ່ໃຫ້ການບໍລິການສີດພົ່ນຢາຂ້າເຊື້ອພະຍາດ ເພື່ອເປັນການປ້ອງກັນບໍ່ໃຫ້ພະຍາດຕ່າງໆມາລະບາດຢູ່ ສປປ ລາວ ຂອງພວກເຮົາອີກ.
ຢ່າງໃດກໍດີໃນໄລຍະຜ່ານມາ ໄດ້ເກີດມີຫາງສຽງຈົ່ມວ່າຂອງສັງຄົມ ກ່ຽວກັບການຂຶ້ນຄ່າບໍລິການສີດຢາຂ້າເຊື້ອພະຍາດ ໃສ່ຍານພາຫະນະທີ່ເຂົ້າມາ ສປປ ລາວ ເຊິ່ງພາຫະນະທົ່ວໄປຈາກລາຄາ 2.500 ກີບ ມາເປັນ 5.000 ກີບ ແລະ ພາຫະນະຂົນສົ່ງສັດຈາກລາຄາ 5.000 ກີບ ມາເປັນ 15.000 ກີບ ລວມທັງທີ່ໄປທີ່ມາຂອງຈຳນວນເງິນດັ່ງກ່າວ.
ທ່ານນາງ ພັດສະລີ ພິດສະໄໝ ໄດ້ຊີ້ແຈງໃຫ້ຮູ້ວ່າ: ກ່ຽວກັບການປັບຄ່າບໍລິການສີດພົ່ນຢາຂ້າເຊື້ອ ແມ່ນອີງຕາມລັດຖະບັນຍັດຂອງປະທານປະເທດແຫ່ງ ສປປ ລາວ ສະບັບເລກທີ 03/ປປທ ລົງວັນທີ 19 ພະຈິກ 2008 ວ່າດ້ວຍຄ່າທຳນຽມ ແລະ ຄ່າບໍລິການ ແລະ ບົດແນະນຳຂອງລັດຖະມົນຕີວ່າການ ກະຊວງການເງິນ ສະບັບເລກທີ 0523/ກງ ລົງວັນທີ 17 ມີນາ 2009 ກ່ຽວກັບການຈັດຕັ້ງປະຕິບັດລັດຖະບັນຍັດຂອງປະທານປະເທດແຫ່ງ ສປປ ລາວ ວ່າດ້ວຍຄ່າທຳນຽມ ແລະ ການບໍລິການ ມາດຕາ 06 ອັດຕາຄ່າບໍລິການ ດ້ານວິຊາການຂອງບັນດາຂະແໜງການກະສີກຳ ແລະ ປ່າໄມ້ ເຊິ່ງໄດ້ເລີ່ມຕົ້ນປະຕິບັດແຕ່ວັນທີ 1/6/2012 ເປັນຕົ້ນມາ ນອກຈາກນີ້ ກໍຍັງມີການແຈ້ງການຂອງທ່ານຫົວໜ້າຫ້ອງວ່າການປົກຄອງນະຄອນຫຼວງວຽງຈັນ ສະບັບເລກທີ 1134/ຫປນ.ນວ ລົງວັນທີ 7/5/2012 ເຫັນດີໃຫ້ຈັດຕັ້ງປະຕິບັດເກັບຄ່າບໍລິການ ສີດຟົ່ນຢາຂ້າເຊື້ອພະຍາດຕາມລັດຖະບັນຍັດເລກທີ 03/ປປທ ໂດຍຈຳນວນເງິນທີ່ໄດ້ຮັບທັງໝົດ ມອບເຂົ້າຄັງເງິນແຫ່ງຊາດຢ່າງລວມສູນຕາມລະບຽບການ.
ທ່ານນາງ ພັດສະລີ ພິດສະໄໝ ກ່າວຕື່ມວ່າ: ກ່ຽວກັບການຂຶ້ນຄ່າບໍລິການ ການສີດພົ່ນຢາຂ້າເຊື້ອນີ້ ພວກເຮົາກໍໄດ້ມີການແຈ້ງການອອກໄປກ່ອນໜ້ານັ້ນແລ້ວ ຕາມໜ້າໜັງສືພີມຕ່າງໆ ດັ່ງນັ້ນ ຈຶ່ງຮຽກຮ້ອງມາຍັງຜູ້ຂັບຂີ່ພາຫະນະຜ່ານໄປ-ມາ ບໍລິເວນຂົວມິດຕະພາບແຫ່ງທີ 1 ລາວ-ໄທ ໃຫ້ມີຄວາມເຂົ້າໃຈ ແລະ ໃຫ້ຄວາມຮ່ວມມືປະຕິບັດ ເພື່ອເປັນການປ້ອງກັນໄວ້ຈະເປັນການດີສຸດ.