ຕາມແຫລ່ງຂ່າວຈາກສໍານັກຂ່າວສານປະເທດລາວວ່າ, ກະຊວງໄປສະນີ, ໂທລະຄົມມະນາຄົມແລະ ການສື່ສານໄດ້ເປີດເຜີຍວ່າ: ພິທີສົ່ງດາວທຽມຂອງລາວດວງທໍາອິດທີ່ມີຊື່ວ່າ: ລາວແຊັດ1 (Laosat-1) ຂຶ້ນສູ່ວົງໂຄຈອນໂລກຈະຈັດຂຶ້ນໃນວັນທີ 21 ພະຈິກທີ່ຈະເຖິງນີ້, ທີ່ເມືອງຊີຊາງ ແຂວງສີສວນ ສປ ຈີນ, ຊຶ່ງດາວທຽມດວງດັ່ງກ່າວແມ່ນຂອງຂວັນອັ້ນລໍ້າຄ່າ ແລະ ເປັນປະຫວັດສາດຂອງລາວເນື່ອງໃນໂອກາດສະເຫລີມສະຫລອງວັນປະຫວັດສາດສໍາຄັນຂອງຊາດກໍຄືວັນສ້າງຕັ້ງສາທາລະນະລັດ ປະຊາທິປະໄຕ ປະຊາຊົນລາວຄົບຮອບ 40 ປີກໍຄືວັນທີ 2 ທັນວາ2015 ທີ່ຈະເຖິງນີ້ ແລະ ໃນພິທີລົງນາມຮ່ວມທຶນສ້າງຕັ້ງບໍລິສັດດາວທຽມລາວ

ຢູ່ນະຄອນຫລວງວຽງຈັນ ທີ່ໄດ້ຈັດຂຶ້ນເມື່ອບໍ່ດົນຜ່ານມານີ້, ທ່ານລັດຖະມົນຕີວ່າການກະຊວງໄປສະນີ, ໂທລະຄົມມະນາຄົມແລະ ການສື່ສານຫຽມພົມມະຈັນໄດ້ໃຫ້ຮູ້ວ່າ: ດາວທຽມລາວດວງທໍາອິດຈະຢູ່ໃນຕໍາແໜ່ງ 128,5 ອົງສາຕາເວັນອອກ, ພ້ອມເປີດເຜີຍວ່າ: ດາວທຽມດັ່ງກ່າວເລີ່ມກໍ່ສ້າງມາແຕ່ເດືອນພຶດສະພາ 2008, ໂດຍນໍາໃຊ້ເງິນກູ້ຈາກທະນາຄານຂາເຂົ້າ-ຂາອອກຂອງຈີນ ຈໍານວນ 258 ລ້ານໂດລາສະຫະລັດ ແລະພາຍຫລັງສຳເລັດ​ການ​ສົ່ງ​ດາວ​ທຽມຂຶ້ນ​ສູ່​ວົງ​ໂຄຈອນ​ແລ້ວຈະ​ມີ​ການ​ສ້າງຕັ້ງ​ບໍລິສັດ​ຮ່ວມ​ທຶນຄື:ລັດຖະບານ​ລາວຖືຮຸ້ນ 45%, ບໍລິສັດ ໄຊນາ-ປາຊີຟີກ ໂມບາຍ ເທເລຄອມມູນິເຄຊັນ ແຊັດເທີໄລ (China-Pacific Mobile Telecom munications Satellite) ຂອງ ສປ​ຈີນ 35%, ບໍລິສັດສະເປດສະຕາລເທັກໂນໂລຢີ (Space Star Technology) ຂອງ ສປ​ ຈີນ 15% ແລະບໍລິສັດເອເຊຍປາຊີຟີກ ແຊັດເທີໄລ ເທັກໂນໂລຢີ (Asia pacific Satellite Technology) ຈາກຮົງ​ກົງ 5%ການ​ຮ່ວມ​ທຶນ​ດັ່ງກ່າວແມ່ນ​ເພື່ອ​ຄວາມ​ສະດວກ​ໃນ​ວຽກ​ບໍລິການການ​ສື່ສານ​ຜ່ານ​ດາວ​ທຽມປະເພດ​ຕ່າງໆເຊັ່ນ: ການ​ສື່ສານ​ສຳລັບ​ວຽກ​ງານ​ຂອງ​ລັດ, ການ​ໃຫ້​ເຊົ່າ​ຊ່ອງ​ດາວທຽມ, ການ​ບໍລິການ​ໂທລະພາບ​ຜ່ານ​ດາວ​ທຽມ, ການ​ສື່ສານ​ສຳລັບ​ເຂດ​ຊົນນະບົດ ແລະ ຫ່າງ​ໄກ​ສອກຫລີກ,ການ​ສຶກ​ສາ ແລະ ການ​ແພດ​ທາງໄກ, ລະບົບ​ໂທລະ​ຄົມມະນາຄົມ ແລະ ອິນ​ເຕີ​ເນັດການ​ສື່ສານ​ໃນ​ວຽກງານ​ບັນເທົາ​ທຸກ ແລະ ຟື້ນ​ຟູ​ຈາກ​ໄພພິບັດ​.

ຂ່າວຈາກ ໜັງສືພິມລາວພັດທະນາ