ບໍລິສັດໄດອິຈິເດັນຊິລາວຢືນຢັນ ບໍ່ໄດ້ປ່ອຍສານພິດອອກຈາກໂຮງງານ
ທ່ານນາງ ພະນິດາ ໄຊຍະວົງ ຫົວໜ້າພະແນກບໍລິຫານ, ການບັນຊີ ແລະບໍລິຫານຄຸ້ມຄອງບຸກຄະລາກອນ ບໍລິສັດ ໄດອິຈິເດັນຊິລາວ, ເຊິ່ງຜະລິດສາຍໄຟຟ້າອີເລັກໂຕຼນິກ ຢູ່ເຂດອຸດສະຫະກໍາໂນນທອງ ເມືອງໄຊເສດຖາ ນະຄອນຫລວງວຽງຈັນ ໄດ້ອອກມາຊີ້ແຈງຜ່ານສື່ມວນຊົນ ໃນວັນທີ 9 ພະຈິກນີ້, ພາຍຫລັງເກີດກະແສວິຈານ ຈາກປະຊາຊົນໃກ້ຄຽງວ່າບໍລິສັດໄດ້ລັກປ່ອຍ ສານພິດອັນຕະ ລາຍອອກມານອກໂຮງງານ ຈົນເຮັດໃຫ້ປະຊາຊົນຈໍານວນບໍ່ໜ້ອຍ ມີອາການແພ້ສານເຄມີດັ່ງກ່າວ, ໂດຍໄດ້ຢືນຢັນວ່າບໍ່ເປັນຄວາມຈິງຄືດັ່ງຖືກກ່າວຫາ.
ທ່ານ ນາງ ພະນິດາ ກ່າວວ່າ ກ່ອນໜ້ານີ້ບໍລິສັດໄດ້ຈ້າງບໍລິສັດໜຶ່ງ ມາພົ່ນຢາຂ້າແມງໄມ້ໃນໂຮງງານ, ແຕ່ບໍລິສັດດັ່ງກ່າວໄດ້ໃສ່ສານຢາຂ້າແມງໄມ້ ເກີນຂະໜາດ ແລະ ສົ່ງຜົນກະທົບຕໍ່ພະນັກງານ ຂອງໂຮງງານທີ່ມາເຮັດວຽກໃນມື້ຕໍ່ມາ ຫລາຍກວ່າ 80 ຄົນໃນ ຈໍານວນພະນັກງານ 400 ກວ່າຄົນ, ໂດຍມີອາການເຈັບຫົວ, ປວດຮາກ, ບາງຄົນມີອາການຕີນມືສັ່ນ, ຫລັງຈາກນັ້ນທາງບໍລິສັດກໍຮີບຮ້ອນ ນຳສົ່ງຄົນເຈັບໄປໂຮງໝໍໃກ້ຄ້ຽງ ເພື່ອຮັບການປິ່ນປົວຈົນມີອາການປອດໄພ, ພ້ອມທັງໃຫ້ການຊ່ວຍເຫລືອເບິ່ງແຍງ ຜູ້ທີ່ປ່ວຍໃຫ້ພັກຜ່ອນຢູ່ເຮືອນຈົນມີ ສຸຂະພາບແຂງແຮງດີ ແລະ ສາມາດມາເຮັດວຽກໄດ້ເປັນປົກ ກະຕິແລ້ວ, ສະນັ້ນ ຈຶ່ງຂໍໃຫ້ສັງຄົມເຂົ້າໃຈຕາມນີ້.
ຂ່າວຈາກ:
