ການທີ່ເຫັນລູກຫຼານນັກຮຽນປອດຢາເສບຕິດຄືຄວາມປາຖະໜາຂອງພໍ່ແມ່ຜູ້ປົກຄອງ ແລະ ຄູອາຈານໝົດທຸກຄົນ, ເພື່ອບັນລຸເປົ້າໝາຍຕາມທິດຊີ້ນໍາຂອງກະຊວງ ສຶກສາທິການ ແລະ ກິລາທີ່ໄດ້ກໍານົດໄວ້ຕາມ 3 ຂໍ້ແຂ່ງຂັນຄື: ສອນດີ, ຮຽນເກັ່ງ, ສ້າງສິ່ງແວດລ້ອມໃນສະຖານການສຶກສາໃຫ້ສວຍງາມໜ້າຢູ່ ແລະ ເປັນໂຮງຮຽນທີ່ປອດຢາເສບຕິດ.
ທາງຂະແໜງການທີ່ກ່ຽວຂ້ອງທຸກຂັ້ນຈິ່ງໄດ້ເອົາໃຈໃສ່ຢ່າງຈິງຈັງຕິດຕາມ ແລະ ໃຫ້ຄວາມສໍາຄັນກັບວຽກງານນີ້ ໂດຍການໃກ້ຊິດຕິດແທດສຶກສາອົບຮົມນັກຮຽນນັກສຶກສາໃຫ້ຮູ້ເຖິງຜົນຮ້າຍຂອງສິ່ງເສບຕິດເພື່ອພ້ອມກັນຕ້ານ ແລະ ສະກັດກັ້ນຕາມ 10 ບໍ່ຄື: ບໍ່ເສບ, ບໍ່ຊື້, ບໍ່ຂາຍ, ບໍ່ສົ່ງຕໍ່, ບໍ່ຈໍາໜ່າຍ, ບໍ່ທົດລອງ, ບໍ່ຊຸກເຊື່ອງ, ບໍ່ຜະລິດ, ບໍ່ໃຫ້ການຮ່ວມມື ແລະ ບໍ່ເປັນບ່ອນແວ່ພັກເຊົ່າຂອງຢາເສບຕິດ.
ຜ່ານການກວດກາປະເມີນຕົວຈິງເຫັນໄດ້ວ່າຫຼາຍໂຮງຮຽນພາຍໃນແຂວງອຸດົມໄຊມີໂຮງຮຽນປອດຢາເສບຕິດຫຼາຍແຫ່ງ ແລະ ສາມາດປະກາດເປັນໂຮງຮຽນປອດຢາເສບຕິດ 3 ສົກຮຽນຕິດຕໍ່ກັນໃນສົກປີຜ່ານມາ, ສໍາລັບສົກປີ 2015-2016 ນີ້, ທາງຄະນະກໍາມະການຂັ້ນແຂວງ, ຂັ້ນເມືອງ ແລະ ຂັ້ນໂຮງຮຽນ ສາມາດປະເມີນໂຮງຮຽນເປັນໂຮງຮຽນປອດຢາເສບຕິດ 3 ສົກຮຽນຕິດຕໍ່ກັນທົ່ວແຂວງມີເຖິງ 18 ໂຮງຮຽນ ແລະ ມີເປົ້າໝາຍສືບຕໍ່ສ້າງອີກຫຼາຍແຫ່ງ.
ສໍາລັບເມືອງໄຊ ໂຮງຮຽນປອດຢາເສບຕິດ 3 ສົກຮຽນຊ້ອນຕິດຕໍ່ກັນປະກາດໃນສົກນີ້ປະກອບມີ 4 ໂຮງຮຽນຄື: ມສ ນໍ້າແຫ່ງ, ມສ ນາຮ້ວງ, ມຕ ໂພນໂຮມ ແລະ ມຕ ບ້ານກັດ.
ເຊິ່ງພິທີປະກາດໄດ້ຈັດຂື້ນຢູ່ທີ່ໂຮງຮຽນ ມສ ນາຮ້ວງ ໃນວັນທີ 5 ພະຈິກ 2015 ນີ້, ໂດຍແມ່ນທ່ານ ເພັດສາຄອນ ຫຼວງອາໄພ ເລຂາພັກແຂວງເຈົ້າແຂວງອຸດົມໄຊເປັນຜູ່ມອບຫຼຽນກາແຮງງານຊັ້ນ III ແລະ ທ່ານ ໂອວາດ ຈັນທະວົງ ຄະນະປະຈໍາພັກແຂວງຫົວໜ້າພະແນກສຶກສາທິການ ແລະ ກິລາ ເປັນຜູ້ມອບໃບຢັ້ງຢືນ ແລະ ທຸງການສ້າງໂຮງຮຽນປອດຢາເສບຕິດ 3 ສົກຮຽນຕິດຕໍ່ກັນແຕ່ສົກປີ 2012-2015 ໃຫ້ບັນດາໂຮງຮຽນທີ່ຖືກຮັບຮອງເປັນໂຮງຮຽນປອດຢາເສບຕິດ