ຂປລ. ວັນທີ 04 ຕຸລາ 2015 ທີ່ຫ້ອງວ່າການລັດຖະບານ ໄດ້ຈັດກອງປະຊຸມ ຄະນະຊີ້ນຳໂຄງການ ກໍ່ສ້າງທາງລົດໄຟ ລາວ-ຈີນ ຂຶ້ນ ພາຍໃຕ້ການເປັນປະທານຂອງ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານ ເສດຖະກິດການຜະລິດ ແລະ ຈໍລະຈອນ ທັງເປັນຫົວໜ້າຄະນະຊີ້ນຳ ໂຄງການດັ່ງກ່າວ ເຊິ່ງມີທ່ານ ລັດຖະມົນຕີວ່າການ, ຊ່ວຍວ່າການ, ກົມກອງ, ຂະແໜງການ ແລະ ພະນັກງານວິຊາການ ໃນຄະນະຊີ້ນຳໂຄງການ, ບັນດາຜູ້ຕາງໜ້າ ສະພາແຫ່ງຊາດ, ອ້ອມຂ້າງສູນກາງ, ບັນດາແຂວງ ແລະ ນະຄອນຫລວງ ທີ່ມີເສັ້ນທາງລົດຜ່ານ ເຂົ້າຮ່ວມ.
ກອງປະຊຸມ ໄດ້ລາຍງານໃຫ້ຊາບ ກ່ຽວກັບການຈັດຕັ້ງປະຕິບັດ ໂຄງການກໍ່ສ້າງທາງລົດໄຟ ລາວ-ຈີນ ໃນໄລຍະຜ່ານມາ ເຊິ່ງໄດ້ລາຍງານຄວາມຄືບໜ້າ ຂອງໂຄງການ ນັບແຕ່ເດືອນມີນາ 2015. ການນຳສູງສຸດ ແລະ ຄະ ນະຊີ້ນຳ ໂຄງການທັງສອງປະເທດ ກໍໄດ້ພ້ອມກັນຊຸກຍູ້ໂຄງການ ໃຫ້ມີການຮ່ວມມືກັນ ຢ່າງສະໜິດແໜ້ນ. ຄຽງຄູ່ກັນນັ້ນ, ຄະນະປະສານງານ ກໍໄດ້ມີການປະສານສົມທົບກັບ ຝ່າຍຈີນຫລາຍຄັ້ງ ເພື່ອແລກປ່ຽນຂໍ້ມູນ, ປຶກສາຫາລື ແລະ ສ້າງເງື່ອນໄຂເຕັກນິກຕ່າງໆ ບໍ່ວ່າຈະເປັນທາງດ້ານການລົງທຶນ, ການເງິນ ແລະ ການສ້າງຕັ້ງບໍລິສັດ ຮ່ວມກັນ ຈົນສາມາດທີ່ຈະວາງສີລາເລີກໄດ້. ຈາກຜົນສຳເລັດດັ່ງກ່າວນັ້ນ, ເພື່ອເປັນການສ້າງ ຂະບວນການສະເຫລີມສະຫລອງ ຄຳນັບຮັບຕ້ອນ ວັນຊາດທີ 2 ທັນວາ ຄົບຮອບ 40 ປີ ໃນປີ 2015 ນີ້ ທັງສອງຝ່າຍ ຈະໄດ້ວາງສີລາເລີກກໍ່ສ້າງ ໂຄງການທາງລົດໄຟ ລາວ-ຈີນ ຮ່ວມກັນ ທີ່ນະຄອນຫລວງວຽງຈັນ ໃນໄວໆນີ້.
ພ້ອມນີ້, ກອງປະຊຸມຍັງໄດ້ປຶກສາຫາລືກັນ ກ່ຽວກັບການກຽມພ້ອມ ເພື່ອອຳນວຍຄວາມສະດວກ ໃຫ້ແກ່ໂຄງການ ແລະ ເຮັດໃຫ້ການຈັດຕັ້ງປະຕິບັດໂຄງການ ໄດ້ຮັບໝາກຜົນເປັນຢ່າງດີ ທັງການກະກຽມດ້ານແຮງງານ, ການຕອບສະໜອງຂອງຝ່າຍລາວ ດ້ານວັດຖຸອຸປະກອນ, ເຕັກນິກ ແລະ ສະບຽງອາຫານ ໃຫ້ແກ່ໂຄງການ ລວມເຖິງການຄຸ້ມຄອງແລວທາງ ຕາມເສັ້ນທາງລົດໄຟ, ການຊົດເຊີຍ, ການກະກຽມດ້ານນິຕິກຳຕ່າງໆ, ວຽກງານການປ້ອງກັນ ຄວາມສະຫງົບປອດໄພ ແລະ ວຽກງານອື່ນໆທີ່ປິ່ນອ້ອມ ເພື່ອສ້າງເງື່ອນໄຂສະດວກ ໃຫ້ແກ່ການບໍລິການ ແລະ ຂົນສົ່ງ ໃນອະນາຄົດ.
