ເມື່ອວານນີ້ ( 4 ພະຈິກ 2015) ເຈົ້າໜ້າທີ່ກອງທັບເຮືອຂອງເກົາຫຼີໃຕ້ ກ່າວວ່າ ໃນອາທິດໜ້າຈະຈັດການເຝິກຊ້ອມ ທາງການທະຫານທີ່ເກາະດັອກໂດ (Dokdo) ຫຼືທີ່ຍີ່ປຸ່ນເອີ້ນວ່າເກາະທາເຄຊິມາ (Takeshima) ທີ່ຕັ້ງຢູ່ໃນເຂດທະເລຈີນໃຕ້.
ເຂົາກ່າວວ່າ “ວັນເວລາການເຝິກຊ້ອມນັ້ນ ຈະປັບຕາມສະພາບອາກາດ” ພ້ອມກ່າວວ່າກອງທັບເຮືອຈະສົ່ງເຮືອພິຄາດ 1 ລຳ ເຮືອໄວກວດການຕິດຈະຫຼວດນຳວິຖີ 1 ລຳ ແລະເຮືອບິນຮົບຫຼາຍກວ່າ 10 ລຳ ເຂົ້າຮ່ວມການເຝິກຊ້ອມ ລວມເຖິງທະຫານກອງທັບບົກພ້ອມ.
ພະແນກຂ່າວຕ່າງປະເທດຂອງສຳນັກຂ່າວ ຊິນຫົວຂອງຈີນລາຍງານວ່າ ການເຝິກຊ້ອມທາງການທະຫານນັ້ນ ເພື່ອປ້ອງກັນບໍ່ໃຫ້ກອງກຳລັງຕ່າຊາດ ຢຶດຄອງເກາະຢ່າງຜິດກົດໝາຍ ລວມໄປເຖິງການຄວບຄຸມການໃຊ້ ເຄື່ອງບິນໃນເຊິງກົນລະຍຸດອີກດ້ວຍ.
ເກາະດັອກໂດຫຼືເກາະທາເຄຊິມາ ຕັ້ງຢູ່ໃນເຂດນ່ານນ້ຳທາງຕາເວັນອອກ ຂອງແຫຼມເກົາຫຼີ ໄກຈາກເກາະອຸລລຶງໂດ (Ulleungdo) ຂອງເກົາຫຼີໃຕ້ 89 ກິໂລແມັດ ເຊິ່ງຕອນນີ້ຢູ່ໃນການຄອບຄອງ ຂອງເກົາຫຼີໃຕ້ ແຕ່ທັງເກົາຫຼີໃຕ້ ເກົາຫຼີເໜືອ ແລະຍີ່ປຸ່ນ ຢູ່ໃນລະຫວ່າງການພິພາດຍາດຊິງ ດິນແດນເກາະນີ້ ໂດຍຕັ້ງແຕ່ປີ 1986 ເປັນຕົ້ນມາ ຊ່ວງລະດູໃບໄມ້ບານຂອງທຸກປີ ທາງກອງທັບເກົາຫຼີໃຕ້ຈະຈັດການເຝິກຊ້ອມ ທາງການທະຫານໃນເກາະດັອກໂດ ຫຼືເກາະທາເຄຊິ. ແນວໃດກໍຕາມ ການເຝິກຊ້ອມດັ່ງກ່າວ ໄດ້ຮັບສຽງ ຄັດຄ້ານຈາກຍີ່ປຸ່ນ. ທັງນີ້ທ່າທີຂອງເກົາຫຼີໃຕ້ຄັ້ງນີ້ ຍັງບໍ່ມີການຕອບສະໜອງໃດໆ ຈາກຝ່າຍຍີ່ປຸ່ນເລີຍ.
ນອກຈາກນີ້ທາງເຈົ້າໜ້າທີ່ກອງທັບເຮືອ ຂອງເກົາຫຼີໃຕ້ເນັ້ນວ່າ ການເຝິກຊ້ອມທາງການທະຫານໃນອາທິດໜ້າ ບໍ່ກ່ຽວກັບຄວາມສຳພັນທາງການເມືອງ ລະຫວ່າງຍີ່ປຸ່ນ ເປັນເລື່ອງຂອງການທະຫານລ້ວນໆ.
ເມື່ອວັນທີ 2 ພະຈິກ ທີ່ຜ່ານມາ ປະທານາທິບໍດີເກົາຫຼີໃຕ້ ນາງປາກ ກຶນເຮ ແລະນາຍົກລັດຖະມົນຕີຍີ່ປຸ່ນ ທ່ານ ຊິນໂສະ ອາເບະ ໄດ້ຈັດການປະຊຸມສຸດຍອດຜູ້ນຳ ເຊິ່ງເປັນຄັ້ງທຳອິດຫຼັງຈາກນາງປາກ ຂຶ້ນດຳລົງຕຳແໜ່ງປະທານາທິບໍດີເກົາຫຼີໃຕ້ ແຕ່ກໍຍັງບໍ່ມີການກ່າວເຖິງປະເດັນ ຂໍ້ພິພາດເກາະດັອກໂດ ຫຼືເກາະທາເຄຊິແຕ່ຢ່າງໃດ.