ຂປລ. ໃນວັນທີ 04 ຕຸລາ 2015 ທີ່ຫ້ອງວ່າການລັດຖະບານ ໄດ້ຈັດກອງປະຊຸມຄະນະຊີ້ນຳໂຄງການກໍ່ສ້າງທາງລົດໄຟ ລາວ-ຈີນ ຂຶ້ນ ພາຍໃຕ້ການເປັນປະທານຂອງ ທ່ານ ສົມສະຫວາດ ເລັ່ງສະຫວັດຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດການຜະລິດ ແລະ ຈໍລະຈອນ ທັງເປັນຫົວໜ້າຄະນະຊີ້ນຳໂຄງການດັ່ງກ່າວເຊິ່ງມີທ່ານລັດຖະມົນຕີວ່າການ, ບັນດາລັດຖະມົນຕີຊ່ວຍວ່າການ, ກົມກອງ, ຂະແໜງການ ແລະ ພະນັກງານວິຊາການໃນຄະນະຊີ້ນຳໂຄງການ, ບັນດາຜູ້ຕາງໜ້າ ສະພາແຫ່ງຊາດ, ອ້ອມຂ້າງສູນກາງ, ບັນດາແຂວງ ແລະ ນະຄອນຫຼວງ ທີ່ມີເສັ້ນທາງລົດຜ່ານ ເຂົ້າຮ່ວມ.
ກອງປະຊຸມ, ໄດ້ລາຍງານໃຫ້ຊາບ ກ່ຽວກັບການຈັດຕັ້ງປະຕິບັດໃນໂຄງການກໍ່ສ້າງທາງລົດໄຟ ລາວ-ຈີນ ໃນໄລຍະຜ່ານມາ ເຊິ່ງນັບແຕ່ໄດ້ລາຍງານຄວາມຄືບໜ້າຂອງໂຄງການ ນັບແຕ່ເດືອນມີນາ 2015 ມານີ້. ການນຳສູງສຸດ ແລະ ຄະນະຊີ້ນຳໂຄງການຂອງທັງສອງປະເທດ ກໍ່ໄດ້ພ້ອມກັນຊຸກຍູ້ໂຄງການ ໃຫ້ມີການຮ່ວມມືກັນຢ່າງສະໜິດແໜ້ນ. ຄຽງຄູ່ກັນນັ້ນ, ຄະນະປະສານງານ ກໍ່ໄດ້ມິການປະສານສົມທົບກັບຝ່າຍຈີນຫຼາຍຄັ້ງ ເພື່ອແລກປ່ຽນຂໍ້ມູນ, ປຶກສາຫາລື ແລະ ສ້າງເງື່ອນໄຂເຕັກນິກຕ່າງໆ ບໍ່ວ່າຈະເປັນທາງດ້ານການລົງທຶນ, ການເງິນ ແລະ ການສ້າງຕັ້ງບໍລິສັດຮ່ວມກັນ ຈົນສາມາດທີ່ຈະວາງສິລາລືກໄດ້. ຈາກຜົນສຳເລັດດັ່ງກ່າວນັ້ນ, ເພື່ອເປັນການສ້າງຂະບວນສະເຫຼີມສະຫຼອງ ຂ່ຳນັບຮັບຕ້ອນ ວັນຊາດທີ 2 ທັນວາ ຄົບຮອບ 40 ປີ ໃນປີ 2015 ນີ້ ທັງສອງຝ່າຍຈະໄດ້ວາງສິລາເລີກກໍ່ສ້າງໂຄງການທາງລົດໄຟ ລາວ-ຈີນ ຮ່ວມກັນ ທີ່ນະຄອນຫຼວງວຽງຈັນ ໃນມໍ່ໆນີ້.
ພ້ອມນີ້, ກອງປະຊຸມ ຍັງໄດ້ປຶກສາຫາລືກັນ ກ່ຽວກັບການກຽມພ້ອມ ເພື່ອອຳນວຍຄວາມສະດວກ ໃຫ້ແກ່ໂຄງການ ແລະ ເຮັດໃຫ້ການຈັດຕັ້ງປະຕິບັດໂຄງການ ໄດ້ຮັບໝາກຜົນເປັນຢ່າງດີ ທັງການກະກຽມດ້ານແຮງງານ, ການຕອບສະໜອງຂອງຝ່າຍລາວ ດ້ານວັດຖຸອຸປະກອນ, ເຕັກນິກ ແລະ ສະບຽງອາຫານໃຫ້ແກ່ໂຄງການ ລວມເຖິງການຄຸ້ມຄອງແລວທາງຕາມເສັ້ນທາງລົດໄຟ, ການຊົດເຊີຍ, ການກະກຽມດ້ານນິຕິກຳຕ່າງໆ, ວຽກງານການປ້ອງກັນຄວາມສະຫງົບປອດໄພ ແລະ ວຽກງານອື່ນໆທີ່ປິ່ນອ້ອມ ເພື່ອສ້າງເງື່ອນໄຂສະດວກ ໃຫ້ແກ່ການບໍລິການ ແລະ ຂົນສົ່ງ ໃນອະນາຄົດ

ທີ່ມາ ຂ່າວສານປະເທດລາວ