ຕາມການລາຍງານຈາກພະແນກຈະລາຈອນ ແລະ ມອດໄຟ ປກສ ແຂວງຄຳມ່ວນຕໍ່ນັກຂ່າວຂອງແຂວງໃນວັນທີ 28 ພະຈິກ 2013 ໃຫ້ຮູ້ວ່າ: ໃນເວລາ 24:40 ໂມງ ຂອງວັນທີ 27 ພະຈິກ 2013 ໄດ້ມີອຸບັດເຫດເກີດຂຶ້ນຢູ່ເຂດ ບ້ານໂພນສະຫວ່າງ (ຖະຫນົນ 13 ໃຕ້) ເມືອງຫີນບູນ ແຂວງຄຳມ່ວນ, ເຊິ່ງລົດໂດຍສານດັ່ງກ່າວແມ່ນມຸ່ງຫນ້າມາແຕ່ວຽງຈັນຈະໄປອັດຕະປື, ພໍມາຮອດເຂດບໍລິເວນບ້ານໂພນສະຫວ່າງ, ເມືອງຫີນບູນ ກໍ່ໄດ້ເກີດເຫດລະຫວ່າງລົດເມຂົນສົ່ງໂດຍສານຫມາຍເລກທະບຽນ ບຂ 5666 ກຳແພງນະຄອນ ຕຳກັບລົດຍົນກະບະຍີ່ຫຍໍ້ອີຊູຊູ ຫມາຍເລກທະບຽນ ກທ 0029 ຄຳມ່ວນ, ໂດຍໃນລົດເມໄດ້ມີຜູ້ໂດຍສານນັ່ງມານຳຈຳນວນ 43 ຄົນ ໃນນີ້ ສັນຊາດຈີນ 3 ຄົນ, ຫວຽດນາມ 3 ຄົນ ເຊິ່ງມີຜູ້ເສຍຊີວິດຄາທີ່ 2 ຄົນ, ບາດເຈັບເລັກນ້ອຍ 35 ຄົນ, ບາດເຈັບສົມຄວນ 5 ຄົນ, ສ່ວນລົດກະບະແມ່ນມີຜູ້ໂດຍສານ 2 ຄົນ, ເສຍຊີວິດຄາທີ່ 1 ຄົນ, ບາດເຈັບສາຫັດ 1 ຄົນ, ສ່ວນສາເຫດທີ່ແທ້ຈິງຂອງອຸບັດເຫດດັ່ງກ່າວເຈົ້າຫນ້າທີ່ພວມທຳການ ສືບສວນ-ສອບສວນຢູ່.
ຂ່າວຈາກ: ເສດຖະກິດ ສັງຄົມ