ທາງ​ການ​ອິນ​ໂດ​ນີ​ເຊຍ​ສັ່ງ​ຂະຫຍາຍ​ເວລາ​ການ​ປິ​ດສະໜ​າມ​ບິນ​ເທິງ​ເກາະ​ບາ​ຫລີ ກະທົບ​ຖ້ຽວ​ບິນ​ຫລາຍກວ່າ 100 ຖ້ຽວ ຫລັງ​ພູເຂົາ​ໄຟ​ເດືອດ​ຈົນ​ຖ່ານ​​ກະ​ຈາຍ​ເຕັມ​ທ້ອງ​ຟ້າ ມື້​ວັນພຸດ​ທີ່ 4 ພະ​ຈິກ 2015 ສຳ​ນັກ​ຂ່າວ​ເອ​ເອັບ​ພີ ລາຍ​ງານ​ຈາກ​ນະຄອນຫລວງ​ຈາ​ກາຕ້າ ປະເທດ​ອິນ​ໂດ​ນີ​ເຊຍ ເມື່ອ​ວັນທີ່ 4 ວ່າທາງ​ການ​ອິນ​ໂດ​ນີ​ເຊຍ​ສັ່ງ​ຂະຫຍາຍ​ເວລາ​ການ​ປິດສະໜາມບິນ​ນານາ​ຊາດ​ງູ​ລະ​ໄລ ເທິງ​ເກາະ​ບາ​ຫລີ ສະຖານ​ທີ່​ທ່ອງ​ທ່ຽວ​ທີ່​ສຳຄັນ​ຂອງ​ປະເທດ ຫລັງ​ຢຸດ​ທຳການ​ຊົ່ວ​ຄາວ​ມາ​ຕັ້ງ​ແຕ່​ມື້​ອັງ​ຄານທີ່ 3 ພະຈິກ ເນື່ອງ​ຈາກ​ພູເຂົາ​ໄຟ​ລິນ​ຈາ​ນີ ຊຶ່ງ​ຕັ້ງ​ຢູ່​ເທິງ​ເກາະ​ລອມ​ບອກ ທາງ​ຕະເວັນ​ອອກ​ຂອງ​ເກາະ​ບາ​ຫລີ ເກີດ​ເດືອດ​ຂຶ້ນ​ສົ່ງ​ເຖົ່າ​ຖ່ານ​ກະ​ຈາຍ​ຟົ້ງເຕັມ​ທ້ອງ​ຟ້າ​ເທິງສະ​ໜາມ​ບິນ ເຈົ້າ​ຫນ້າທີ່​ຂອງສະ​ໜາມ​ບິນ​ງູ​ລະ​ໄລ​ກ່າວ​ວ່າ ສະໜາມບິນຈະ​ຢຸດ​ທຳການ​ຈົນ​ເຖິງ​ເວລາ 07.45 ນ. (ຕາມ​ເວລາ​ລາວ​ຂອງ​ມື້​ວັນພະຫັດ) ເພາະ​ຖ່ານ​ພູເຂົາ​ໄຟ​ທີ່​ເດືອດ​ຂຶ້ນ​ມາ​ເຮັດໃຫ້​ທັດສະ​ວິ​ໄສ​ໃນ​ການ​ບິນ​ບໍ່​ດີ ກະທົບ​ກັບ​ຖ້ຽວ​ບິນ​ຈຳນວນ 106 ຖ້ຽວ ໃນ​ຈຳນວນ​ນີ້​ເປັນ​ສາຍ​ການ​ບິນ​ຈາກ​ນານາ​ຊາດ 59 ແຫ່ງ ແຕ່​ສະຖານນະການ​ທຸກ​ຢ່າງ​ຍັງ​ຄວບ​ຄຸມ​ໄດ້ ສາຍ​ການ​ບິນ​ເວີ​ຈິນ​ອອດສ໌​ເຕ​ເຣຍ​ແລະ​ເຈັດ​ສະ​ຕາລ໌​ໄດ້​ສັ່ງ​ຍົກ​ເລີກ​ຖ້ຽວ​ບິນ​ທີ່​ຈະ​ໄປ​ເກາະ ບາ​ຫລີ​ເມື່ອ​ມື້​ວັນອັງ​ຄານ​ທັງ​ໝົດ ທັງ​ນີ້ ຜູ້​ຊ່ຽວຊານ​ເຜີຍ​ວ່າ ເຖົ່າ​ຖ່ານ​ພູເຂົາ​ໄຟ​ເປັນ​ອັນຕະລາຍ​ກັບ​ເຄື່ອງ​ຈັກຂອງ​ເຮືອ​ບິນ​ຫລາຍກວ່າ​ລົບກວນ​ການ​ບິນ​ເສຍ​ອີກ“