ອົງການປົກຄອງເມືອງສັງທອງ ຮ່ວມກັບຂະແໜງຊົນລະປະທານ ພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ໄດ້ຈັດພິທີສ້າງຂະບວນການອະນາໄມລວງຄອງເໝືອງ ແລະ ເປີດນ້ຳຊົນລະປະທານ ເພື່ອຮັບໃຊ້ການຜະລິດລະດູແລ້ງ ສົກປີ 2015-2016 ຂຶ້ນໃນວັນທີ 3 ພະຈິກ 2015 ທີ່ຫ້ວຍເຕັນ ບ້ານນາສາວນາງ ເມືອງສັງທອງ ມີທ່ານ ຮສ. ດຣ. ຄຳຜາດ ສຸລິນພູມີ ລັດຖະມົນຕີຊ່ວຍວ່າການກະຊວງກະສິກຳ ແລະ ປ່າໄມ້ ທ່ານ ບຸນທອງ ພົມມະຈັນ ຫົວໜ້າຄະນະຈັດຕັ້ງນະຄອນຫຼວງວຽງຈັນ ທ່ານເຈົ້າເມືອງ ຮອງເຈົ້າເມືອງສັງທອງ ຫົວໜ້າຫ້ອງການອ້ອມຂ້າງເມືອງ ຫົວໜ້າຫ້ອງການກະສິກຳ ແລະ ປ່າໄມ້ 9 ຕົວເມືອງ ແລະ ພໍ່ແມ່ປະຊາຊົນພາຍໃນບ້ານນາສາວນາງ ເຂົ້າຮ່ວມ.
ການອະນາໄມລວງຄອງເໝືອງ ແລະ ເປີດນ້ຳຊົນລະປະທານຄັ້ງນີ້ ເປັນການສ້າງຂະບວນການເພື່ອຮັບໃຊ້ການຜະລິດລະດູແລ້ງ 2015-2016 ແລະ ມາຮອດປັດຈຸບັນ ທົ່ວເມືອງສັງທອງ ມີລະບົບຊົນລະປະທານທັງໝົດ 9 ແຫ່ງ ໃນນັ້ນມີອ່າງເກັບນ້ຳ 3 ແຫ່ງ ຈັກສູບນ້ຳດ້ວຍໄຟຟ້າ 5 ແຫ່ງ ແລະ ຝາຍນ້ຳລົ້ນ 1 ແຫ່ງ ເຊິ່ງລະບົບຊົນລະປະທານທັງໝົດ ມີຄວາມອາດສາມາດສະໜອງນ້ຳໃຫ້ແກ່ການຜະລິດລະດູແລ້ງ ສົກປີ 2015-2016 ພາຍໃນເມືອງໄດ້ 655 ເຮັກຕາ ໃນນັ້ນ ປູກເຂົ້າ 570 ເຮັກຕາ ແລະ ພືດ 85 ເຮັກຕາ ແຕ່ກໍ່ຍັງໄດ້ເຮັດການຟື້ນຟູ ແລະ ສ້ອມແປງລະບົບຫົວງານ ຄອງເໝືອງ ໃຫ້ຢູ່ໃນສະພາບດີ ກຽມພ້ອມໃນການໃຊ້ງານ ແລະ ໃຫ້ບັນລຸຕາມຕົວເລກຄາດໝາຍສູ້ຊົນໃນການສະໜອງນ້ຳ.
ສຳລັບໂຄງການຊົນລະປະທານຫ້ວຍເຕັນ ກວມເອົາ 1 ບ້ານຄື: ບ້ານນາສາວນາງ ມີເນື້ອທີ່ການຜະລິດລະດູຝົນ 110 ເຮັກຕາ ລະດູແລ້ງ 52 ເຮັກຕາ ໂຄງການດັ່ງກ່າວ ສ້າງຂຶ້ນປີ 2012 ສຳເລັດ ປີ 2014 ເປັນໂຄງການຊ່ວຍເຫຼືອລ້າຈາກປະເທດເຢຍລະມັນ ມູນຄ່າ 350.223 ເອີໂຣ ຕົວເຂື່ອນສູງ 11 ແມັດ ຍາວ 213 ແມັດ ແລະ ສັນກວ້າງ 6 ແມັດ ມີລະບົບຄອງເໝືອງທັງໝົດ 4 ເສັ້ນ ໃນນັ້ນ ຄອງເໝືອງ MC 1 ເສັ້ນຍາວ 350 ແມັດ ແລະ ຄອງເໝືອງຂັ້ນ 1 ມີ 3 ເສັ້ນຍາວ 1.900 ແມັດ ໂຄງການນີ້ແມ່ນຢາກສ້າງເປັນຕົວແບບໃນການສະໜອງນ້ຳແບບໄຫຼເອງ ໂດຍບໍ່ໄດ້ໃຊ້ພະລັງງານໄຟຟ້າ ໂດຍສະເພາະ ກໍ່ແມ່ນຢາກສ້າງໃຫ້ເມືອງສັງທອງ ກາຍເປັນເມືອງປູກຝັງ ແລະ ລ້ຽງສັດ ກາຍເປັນຊົນລະກະເສດຮອບດ້ານ.
ແຫລ່ງຂ່າວ: