ເຈົ້າໜ້າທີ່ ປກສ ແຂວງສາລະວັນ ໄດ້ກັກຕົວ ນາງ ລິດສະດາເພັດ ແກ້ວພິລາວັນ ອາຍຸ 42 ຢູ່ ບ້ານຫລັກສອງເມືອງ ແລະ ແຂວງສາລະວັນ, ອາດີດເປັນຫົວໜ້າບັນຊີທະນາຄານສົ່ງເສີມກະສິກໍາ ສາຂາແຂວງສາລະວັນ (ຖືກແຕ່ງຕັ້ງ ເປັນຫົວໜ້າບັນຊີຂອງທະນາສົ່ງເສີມກະສິກໍາ ສາຂາ ແຂວງສາລະວັນ ໃນປີ 2010) ເພື່ອທໍາການສືບສວນ-ສອບສວນ ຫາສາເຫດກ່ຽວກັບເງິນຂາດບັນຊີ ຂອງທະນາຄານສົ່ງເສີມກະສິກໍາ; ຜ່ານການສືບສວນ-ສອບສວນ ຂອງເຈົ້າໜ້າທີ່ ປກສ ແຂວງ ແລະ ບວກໃສ່ກັບບັນດາຂໍ້ມູນຫລັກຖານ ແລະ ເອກະສານຕ່າງໆ ຢ່າງຄົບຖ້ວນແລ້ວ ຈຶ່ງຮູ້ວ່າ: ນາງ ລິດສະດາເພັດ ແມ່ນໄດ້ມີການເຄື່ອນໄຫວກະທໍາຜິດ ແຕ່ປີ 2012-2013 ເຊີ່ງໄດ້ສວຍໃຊ້ໂອກາດທີ່ການຈັດຕັ້ງ ໄວ້ເນື້ອເຊື່ອໃຈ ເພື່ອເຄື່ອນໄຫວຍັກຍອກ ສໍ້ໂກງເອົາເງິນທະນາຄານສົ່ງເສີມກະສິກໍາ ສາຂາ ແຂວງສາລະວັນ ດ້ວຍວິທີສ້າງເອກະສານປອມຂຶ້ນມາ ເພື່ອປົກປິດເຊື່ອງອໍາ ເອົາເງິນຈາກທະນາຄານຫລາຍຄັ້ງ ຜ່ານການກວດກາຂອງເຈົ້າໜ້າທີ່ ແລະ ພາກສ່ວນທີ່ກ່ຽວຂ້ອງ ຈຶ່ງຮູ້ວ່າ: ເງິນຂາດບັນຊີໄປທັງໝົດ ຢູ່ທະນາຄານສົ່ງເສີມກະສິກໍາ ຈຳນວນ 11.336.108.000 ກີບ ແລະ ເງິນບາດ ຈໍານວນ 8.300.000 ບາດ ແຕ່ຜ່ານການໃຫ້ການຂອງຜູ້ກ່ຽວ ຮັບສາລະພາບວ່າ: ໄດ້ຍັກຍອກສໍ້ໂກງເອົາເງິນຂອງທະນາຄານ ສົ່ງເສີມກະສິກໍາແທ້ ເປັນເງິນຈໍານວນ 4.436.108.000 ກີບ ແລະ ເງິນບາດຈໍານວນ 3.300.000 ບາດ ສ່ວນເງິນຈໍານວນ 6.900.000.000 ກີບ ແລະ ເງິນບາດ ຈໍານວນ 5.000.000 ບາດ ໃນນັ້ນຜູ້ກ່ຽວອ້າງວ່າ: ໄດ້ໂອນໄປທະນາຄານສົ່ງເສີມກະສິກໍາ ສໍານັກງານໃຫຍ່, ຜ່ານການຢັ້ງຢືນຂອງທະນາຄານ ສົ່ງເສີມກະສິກໍາສໍານັກງານໃຫຍ່ ກໍໄດ້ຢັ້ງຢືນຕາມຄໍາຢັ້ງຢືນ ສະບັບເລກທີ 314/ທສກ.ສຍ, ລົງວັນທີ 17 ພະຈິກ 2014 ໄດ້ຢັ້ງຢືນວ່າ: ເງິນຈໍານວນດັ່ງກ່າວແມ່ນ ນາງ ລິດສະດາເພັດ ແກ້ວພິລາວັນ ໄດ້ສ້າງເອກະສານບັນທຶກບັນຊີ ເພື່ອເຄື່ອນຍ້າຍໃຫ້ສໍານັກງານໃຫຍ່  ມີແຕ່ເອກະສານແຕ່ບໍ່ມີເງິນສົດມອບເຂົ້າບັນຊີ, ພຽງສ້າງຂຶ້ນເພື່ອຫລອກລວງ ແລະ ເຊື່ອງອໍາການເຄື່ອນໄຫວຂອງຜູ້ກ່ຽວ ເທົ່ານັ້ນ.

ດັ່ງນັ້ນ ເຈົ້າໜ້າທີ່ຈິ່ງໄດ້ສະຫລຸບຄະດີດັ່ງກ່າວ ສົ່ງຫາໄອຍະການປະຊາຊົນ ແຂວງສາລະວັນ ເພື່ອໃຫ້ອົງການໄອຍະການປະຊາຊົນແຂວງ ໄດ້ຄົ້ນຄວ້າສໍານວນຄະດີດັ່ງກ່າວ ແລ້ວເຫັນ ວ່າ: ນາງ ລິດສະດາເພັດ ແກ້ວພິລາວັນ ແມ່ນມີຄວາມຜິດຕໍ່ກົດໝາຍອາຍາ ໃນໝວດທີ 10 ວ່າດ້ວຍອາຊະຍາກໍາພິເສດ ຕາມມາດຕາ 174 ຂໍ້ 11 ໃນສະຖານການສໍ້ລາດບັງຫລວງ ແລະ ໄອຍະການ ປະຊາຊົນ ຈຶ່ງໄດ້ສັ່ງຟ້ອງ ນາງ ລິດສະດາເພັດ ແກ້ວພິລາວັນ ຕໍ່ຄະນະສານອາຍາຂັ້ນຕົ້ນ ແຂວງສາລະວັນ.

ມາຮອດວັນທີ 26 ຕຸລາ 2014 ສານປະຊາຊົນ ແຂວງສາລະວັນ ຈຶ່ງໄດ້ນໍາເອົາສໍານວນຄະດີດັ່ງກ່າວ ອອກມາພິຈາລະນາໃນທີ່ປະຊຸມສານ ຜ່ານການໄຕ່ສວນໃນທີ່ປະຊຸມສານເຫັນວ່າ: ນາງ ລິດສະດາເພັດ ແກ້ວພິລາວັນ ແມ່ນມີຄວາມຜິດ ຕາມການສັ່ງຟ້ອງຂອງອົງການໄອຍະການ ປະຊາຊົນແທ້, ຕາມທີ່ກໍານົດໄວ້ໃນມາດຕາ 174 ຂອງກົດໝາຍອາຍາ ດັ່ງນັ້ນ, ຄະນະສານອາຍາຂອງສານປະຊາຊົນ ຂັ້ນຕົ້ນແຂວງສາລະວັນ ຈິ່ງໄດ້ຕັດສິນລົງໂທດຕັດອິດສາລະພາບ ຈໍາຄຸກຕະຫລອດຊີວິດ, ປັບໄໝ 1% ຂອງມູນຄ່າເສຍຫາຍ ພ້ອມໃຫ້ຜູ້ກ່ຽວໃຊ້ແທນເງິນ ໃຫ້ແກ່ທະນາຄານສົ່ງເສີມກະສິກໍາ ສາຂາ ແຂວງສາລະວັນ ຈໍານວນ 11.336.108.000 ກີບ ແລະ ເງິນບາດ 8.300.000 ບາດ, ຮິບຄໍາຈໍານວນ 5 ບາດ ແລະ ທີ່ດິນ ຈໍານວນ 4 ຕອນ ທີ່ເປັນຂອງຜູ້ກ່ຽວ.

ຂ່າວ: ຂປລ